Iburasirazuba: Plan International Rwanda yizeye umusaruro w’urubyiruko rw’abakorerabushake

  • NTAWITONDA JEAN CLAUDE
  • Mata 26, 2022
  • Hashize imyaka 2
Image

Ubuyobozi bw’Umuryango Plan International Rwanda mu Ntara y’Iburasirazuba, buratangaza ko bwizeye umusaruro w’ubukangurambaga buzakorwa n’urubyiruko rw’abakorerabushake (RYVCP) mu Ntara y’Iburasirazuba.

Byagarutsweho na Bakundukize Jacques uhagarariye umuryango Plan Rwanda mu Karere ka Gatsibo, Bugesera, Ngoma n’aka Kirehe mu Ntara y’Iburasirazuba.

Mu kiganiro gito yahaye itangazamakuru nyuma y’amahugurwa y’urubyiruko rw’abakorerabushake yasojwe ku wa Mbere tariki 25 Mata 2022 mu kigo cya Polisi cya Gishari mu Karere ka Rwamagana, Bakundukize yavuze ko hari byinshi biteze ku rubyiruko.

Avuga ko Intara y’Iburasirazuba yari ikeneye abafatanyabikorwa bigahurirana nuko na Plan International Rwanda yari ifite gahunda zo guhuza urubyiruko.

Ati: “Byahuye nuko natwe twari dufite gahunda yo guteza imbere urubyiruko duhita dufatanya.

Imwe mu mihigo urubyiruko rwahize harimo ijyanye no gukurikirana no kwita ku bibazo bibangamiye imibereho myiza y’abaturage kandi natwe ni byo twibandaho.

Twibanda ku burenganzira bw’umwana, uburenganzira bw’umugore cyane cyane n’ubw’umukobwa.

Imihigo bihaye harimo n’ihuye n’inkingi zacu nka Plan natwe dusanzwe dukoreraho bityo bikazadufasha”.

Asaba urubyiruko rw’abakorerabushake kwibumbira mu makoperative hanyuma Plan International Rwanda nayo ikazabongerera ubumenyi n’ubushobozi, hashingiwe ku mpanuro uru rubyiruko rwaherewe mu mahugurwa.

Ubuyobozi bwa Plan International Rwanda mu Ntara y’Iburasirazuba, ishimira ubuyobozi bw’iyi Ntara by’umwihariko Guverineri CG Gasana K. Emmanuel.

Bugira buti: “Dushimira ubuyobozi bw’Intara bwifuje ko imikorere y’abafatanyabikorwa yava ku rwego rw’Uturere ikazamuka ikagera ku rwego rw’Intara kugira ngo ibikorwa dukora birusheho kugera kuri benshi.

Ari Intara izabyungukiramo, ubukangurambaga buzagera ku baturage ari natwe nka Plan International bwa burenganzira bw’abana twakurikiranaga, buzabasha kugera kuri benshi bitewe n’imikoranire y’Intara n’abafatanyabikorwa”.

Bakundukize asobanura ko Plan International Rwanda ari umuryango wita cyane ku burenganzira bw’umwana ariko ukibanda cyane cyane ku burenganzira bw’umwana w’umukobwa.

Bakundukize Jacques, Umuyobozi wa Plan International Rwanda mu Karere ka Bugesera, Gatsibo, Kirehe na Ngoma (Foto Kayitare J.P)
  • NTAWITONDA JEAN CLAUDE
  • Mata 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE