Iburasirazuba: Itorero Uruyange mu nganzo y’indirimbo zirata Umuryango FPR Inkotanyi

  • Imvaho Nshya
  • Ugushyingo 6, 2023
  • Hashize amezi 4
Image

Itorero Uruyange ni itorero rigizwe n’ababyeyi b’amajigija, ibikwerere n’umubare muto w’urubyiruko. Ribarizwa mu Murenge wa Remera mu Karere ka Gatsibo mu Ntara y’Iburasirazuba.

Iri torero ritandukanye n’Uruyange, igice cy’abana cy’itorero Intayoberana rizwi mu mbyino gakondo mu Rwanda.

Imvaho Nshya yagiranye ikiganiro na Uwamariya Eugenie, Perezida w’Itorero Uruyange ryo mu Murenge wa Remera, yavuze ko itorero ryatangiye mu 2014, ababyinnyi n’abaririmbyi babarirwa muri 40.

Ni itorero ririmo kwiyubaka kuko rimaze kugabirwa inka inshuro ebyiri n’Akarere ka Gatsibo yarabyaye, irabakamirwa.

Itorero Uruyange rihugiye mu bikorwa bitandukanye birimo guhanga indirimbo zivuga ibigwi Umuryango FPR Inkotanyi.

Ni nyuma y’aho rishyiriye hanze indirimbo ivuga ibyiza by’imiyoborere myiza ya Perezida Paul Kagame.

Perezida w’Itorero Uruyange, Uwamariya yagize ati “Turimo guhimba indirimbo nshya zirata cyane Umuryango FPR Inkotanyi”.

Bashima Perezida Kagame wahisemo kurengera Abanyarwanda bose, n’ibikorwa byiza bimuranga, ngo bamutamirije urukundo amahoro Imana izayamuha.

Bamushimira ko yahagurikije izamarere akaza kurengera Abanyarwanda bityo ko ijwi ryabo rivuga amahoro.

Bagira bati “Igituma dukunda Kagame Paul yahagaritse Jenoside amahanga yose arebera, Abanyarwanda twariyunze, turahura tukaramukanya, turatumirana mu birori, turasabana inka n’abageni”.

Bamushimira ko yahagurikije izamarere akaza kurengera abanyarwanda bityo ko ijwi ryabo rivuga amahoro.

Itorero Uruyange rihamya ko kubera imiyoborere myiza, ubuyobozi bukuru bw’igihugu bwashyizeho Inteko z’Abunzi, Inkiko Gacaca, abakoze ibyaha barabihanirwa abarengana barataha.

Yasindagije ababyeyi, abageze mu zabukuru abaha inkunga y’ingoboka.

Bati “Abagore yabahaye ijambo ku Mudugudu turayobora, ku Tugari, ku Mirenge, ku Karere no ku Ntara ndetse no ku rwego rw’igihugu hashyizweho Inama y’Igihugu y’Abagore”.

Itorero Uruyange rivuga ko rifite imbogamizi z’uko nta bikoresho by’itorero rifite.

Kuva itorero ryatangira mu 2014, ryaguze umukenyero umwe ariko kugeza ubu ngo ntirigira umukenyero wundi wo gusimburanya uwo rifite.

Uwamariya Akomeza agira ati “Ingoma yacu yarabyaye, turirwariza nta muntu tugira utuba hafi. Tuba dukeneye ibiraka tugatera imbere”.

Ubuyobozi bw’Akarere ka Gatsibo bwemereye Imvaho Nshya ko bwijeje ubufasha Itorero Uruyange.

Umuyobozi w’Akarere wungirije ushinzwe imibereho myiza, Marceline Mukamana, avuga ko Itorero Uruyange mu Karere ka Gatsibo rifite ubushake bwo gutanga ubutumwa butandukanye.

Ati “Nk’Akarere dushyigikira ibikorwa byabo ni yo mpamvu twabagabiye inka, cyane cyane ariko ubona ko mu itorero ryabo bazanamo urubyiruko”.

Ubuyobozi bw’Akarere ngo buracyashakisha ubushobozi no gukemura ibibazo itorero rifite nk’imikenyero n’ingoma.

Akarere kasabye ko buri Murenge nibura waba ufite itorero ribyina nk’imwe mu nzira yo gufasha mu bukangurambaga muri gahunda za Leta.

Itorero Uruyange ribarizwa mu Murenge wa Remera mu Karere ka Gatsibo rishima intambwe imaze guterwa kubera imiyoborere myiza

KAYITARE JEAN PAUL

  • Imvaho Nshya
  • Ugushyingo 6, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE