Hatangajwe abahanzi bazaririmba muri Tour du Rwanda

  • MUTETERAZINA SHIFAH
  • Gashyantare 5, 2024
  • Hashize amezi 4
Image

Abategura Tour du Rwanda, bamaze gutangaza abahanzi bazajya baririmba mu bitaramo bizajya bibera ahantu hatandukanye amagare azanyura.

Biteganyijwe ko iri siganwa ngarukamwaka rimaze kuba ikimenyabose ku Isi, rigigiye kuba ku nshuro yaryo 16, rizatangira tariki 18 rikazamara icyumweru abaryitabiriye bazenguruka mu bice bitandukanye by’Igihugu, kuko rizarangira tariki 25 Gashyantare 2024.

Mu rwego rwo gususurutsa abazaryitabira ndetse n’abazarikurikira, Sosiyete ya KIKAC irimo gutegura ibyo bitaramo kuri uyu wa Mbere tariki 05 Gashyantare 2024, yatangaje ko yamaze kwemeranya n’abahanzi batanu barimo Mico The Best, Senderi International Hit, Juno Kizigenza, Bushali hamwe na Bwiza.

Ubuyobozi bwa KIKAC, buherutse gutangaza ko bufitanye amasezerano y’ubufatanye n’Ishyirahamwe ry’Umukino w’Amagare mu Rwanda (FERWACY), ajyanye no gutegura ibitaramo, mu rwego rwo gufasha abakunzi b’umuziki n’umukino w’amagare.

Nubwo ari abahanzi batanu gusa bamaze gutangazwa, hategerejwe n’abandi batanu bataramenyekana, bazifatanya na bagenzi babo batangajwe gutaramira abazitabira ndetse n’abakurikirana iryo siganwa.

Uretse Sender, Mico The Best ndetse na Bwiza, bagaragaye mu bitaramo bya Tour du Rwanda y’umwaka ushize, abandi batangajwe ntabwo bigeze bagaragaramo, kuko harimo Platini, Kenny Sol, Chris Eazy, Marina, na Niyo Bosco.

Ubwo iri rushanwa ryabaga ku nshuro ya 15, mu mwaka ushize wa 2023, ryegukanywe n’umunyaeritereya (Eritrea) Henok Mulubrhan ukinira Green Project, wanegukanye agace karyo ka nyuma  kari kagizwe n’intera ya kilometero 75.3, aho abasiganwa bazengurutse imwe mu mihanda y’Umujyi wa Kigali bagasoreza ku i Rebero, kiyongereye ku kandi ka Huye-Musanze kari kagizwe n’ibirometero byinshi 199.5.

Ni irushanwa ryasojwe n’abakinnyi 65 mu bakinnyi 93 batangiranye naryo.

Uyu mwaka Tour du Rwanda ikaba izaba irimo kuba ku nshuro ya gatanu, kuva yashyirwa ku rwego rwa 2.1, rikaba ritaregukanwa n’Umunyarwanda kuva ryajya kuri urwo rwego.

  • MUTETERAZINA SHIFAH
  • Gashyantare 5, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE