Hano ni iwanyu- Perezida Kagame abwira abahembwe na Trace

  • Imvaho Nshya
  • Ukwakira 22, 2023
  • Hashize amezi 4
Image

Kuri iki Cyumweru tariki ya 22 Ukwakira, Perezida wa Repubulika y’u Rwanda Paul Kagame yakiriye itsinda ry’ibyamamare n’abahanzi begukanye ibihembo bya Trace mu birori byabereye i Kigali mu Rwanda ku wa Gatandatu, abizeza ko ushaka kuba yakwita u Rwanda imuhira yisanga.

Ibyo birori byabereye muri BK Arena byitabirwa n’abantu benshi cyane, ndetse hakaba haranabaye igitaramo cy’imbaturamugabo, aho abahanzi baturutse muri Nigeria ari bo begukanye ibihembo byinshi.

Davido na Rema bo muri Nigeria batwaye ibihembo byinshi, mu gihe Bruce Mélodie yegukanye igihembo nk’umuhanzi uhiga abandi mu Rwanda.

Abandi bahawe ibihembo harimo Burna Boy wo muri Nigeria wakoze Alubumu y’Umwaka, Yemi Alade wo muri Nigeria wagize amashusho meza y’indirimbo, Viviane Chidid wo muri Senegali wabaye Umuhanzikazi wahize abandi, Roseline Layo wo muri Ivory Cost wahize abandi bahanzi bakiza mu muziki, Michael Brun wo muri Haiti wahize abandi mu kuvanga imiziki,  na Tam Sir wo muri Ivory Coast wahize abandi mu gutunganya ibihangano.   

Haza kandi KS Bloom wo muri Ivory Coast wahize abandi mu ndirimbo zo kuramya Imana, Fally Ipupa wo muri Repubulika Iharanira Demokarasi ya Congo (DRC) wahize abandi kuri “live”, Robot Boii wo muri Afurika y’Epfo wahize abandi mu kubyina, Asake wo muri Nigeria wahize abandi muri Afurika mu bakoresha Icyongereza, na Didi B wo muri Ivory Coast wahize abandi muri Afurika ku ndirimo z’Igifaransa.

Lisandro Cuxi wo muri Cape Verde yahize abandi bahanzi b’Afurika bakoresha ururimi rw’Igipolutigali, Diamond Platnumz wo muri Tanzania ahiga abandi bahanzi muri Afurika y’Iburasirazuba, Umufaransa Tayc ahiga abandi mu Bufaransa no mu Bubiligi, Central Cee ahiga abandi muri UK, na ho Rutshelle Guillaume wo muri Haiti ahiga abo mu Birwa bya Karayibe.

Goulam wo muri Comoros yahize abandi bo mu bihugu byo mu Nyanja y’u Buhinde, Ludmilla ahiga bagenzi be bo muri Brazil, na ho Dystinct wo muri Morocco ahiga bagenzi be bo muri Afurika y’Amajyaruguru.

Perezida Kagame yabanje gushimira abo bahanzi begukanye ibihembo ku bw’impano bamugeneye bishyize hamwe, anabashimira kuba barafashe umwanya wabo bakaza mu Rwanda mu gihe bakabaye bakora ibindi bikorwa binyuranye mu bice bitandukanye by’Isi.

Yaboneyeho kwifatanya na bo mu kwishimira intsinzi n’ibihembo bahawe, anashimira ubuyobozi bwa Trace bwateguye ibyo bikorwa byagenze neza ku nshuro ya mbere bibereye mu Rwanda.

Umukuru w’Igihugu yavuze ko u Rwanda rwiteguye guha ikaze uwo ari we wese washaka kwita u Rwanda imuhira muri abo bahawe ibihembo, yaba abafite iwabo cyangwa n’abatahafite kubera impamvu zitandukanye.

Yagize ati: “Ndagira ngo mbizeze ko hano ari iwanyu. Ndabizi ko hafi ya mwese hano mufite aho mwita imuhira, kandi icyo ni ikintu cyiza, ariko mushobora na hano kuhafata nk’imuhira kure y’imuhira.”

Ku batagira aho bita mu rugo, yabasangije amateka y’uko yamaze imyaka irenga 30 atagira aho yita imuhira, ari na yo mpamvu yamenye agaciro ko kugira aho umuntu yita iwabo.

Ati: “Ibyo byanyigishije agaciro ko kugira ahantu wita imuhira. Ndabizi ko bisobanutse kandi ari ingirakamaro kuri buri wese aho yaba ari hose. Ni yo mpamvu nagira ngo mbabwire ko abifuza kugira hano imuhira kure y’imuhira mbahaye ikaze.”

Perezida Kagame yavuze ko ari iby’igiciro kubana n’abahanzi bimakaza injyana nyafurika ndetse n’ishingiye ku muco n’amateka by’uyu mugabane (Afro-music), ashimangira ko u Rwanda ruha ikaze ikintu cyose cyimakaza isano muzi y’Afurika.

Yaboneyeho kwizeza abo bahanzi n’ubuyobozi bwa Trace ko u Rwanda ruzabana na bo uko bishoboka kose, rutanga umusanzu no kongerera agaciro ku kintu icyo ari baharanira gushyira imbere.

Yanashimye kuba Trace yarabaye umuyoboro wahindukiye benshi irembo bigaragarizamo, ndetse bakanahanyuza ibitekerezo n’imbamutima zifasha benshi ku Isi binyuze mu nzego zitandukanye z’ubuhanzi.  

NTAWITONDA JEAN CLAUDE

  • Imvaho Nshya
  • Ukwakira 22, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE