Gushyigikirwa n’ababyeyi byatumye Ariel Wayz abigiraho byinshi

  • MUTETERAZINA SHIFAH
  • Gashyantare 25, 2024
  • Hashize amezi 2
Image

Umuhanzikazi Nyarwanda Uwayezu Ariel uzwi nka Ariel Wayz yashimiye ababyeyi be imbere y’Abanyarwanda, uburyo bamushyigikira mu bikorwa bye bya muzika kuko ari kimwe mu byamuteye imbaraga yo kuwukora.

Mu kiganiro yagiriye kuri Televiziyo y’Igihugu, Ariel Wayz yagarutse ku ndirimbo ye nshya yise “Wowe Gusa”, avuga ko yahisemo gukoresha ababyeyi be kugira ngo bitange ubutumwa.

Yagize ati: “Igitekerezo nyamukuru cyari u Rwanda rwacu, tubikorera hafi yo ku ivuko, ndetse dukoresha n’ababyeyi banjye, kuko bifite ubutumwa bitanga, kuko mu muco wacu ababyeyi kudushyigikira ni ikintu cyiza cyane.”

Uyu muhanzi avuga ko afite ababyeyi badasanzwe kuko batigeze bamugora.

Ati: “Mfite ababyeyi batangaje cyane, ndabakunda cyane ndabubaha, baranyumva kandi baranshyigikira. Ndabyibuka papa yari afite ikiriyo yari bujyemo, ariko arigomwa arabireka turajyana noneho nanamutwara mu ntara.”

Yongeraho ati: “Rero ndashaka kubashimira imbere y’Abanyarwanda bose, byarandenze, byanyigishije ibintu byinshi cyane.”

Agaruka ku kuntu byari byifashe aho bafatiraga amashusho, Wayz yavuze ko bitari byoroshye.

Ati: “Kuri set stress zari nyinshi, ku bahanzi bigenga barabyumva, ariko kuba bari bahari barampumurizaga, nkumva biri bugende neza, bakanambwira ngo impamvu biri kukugora ni uko bigiye kuba byiza kurushaho, byari ibintu birenze kubagira kuri set baramfashije.”

Kuri Wayz asanga kugira ababyeyi bamufasha  kandi bamwumva, ari byo byamugize uwo ari we.

Ati: “Byamfashije kuba Ariel ugira umutima ukomeye, kandi uhagarara ku ijambo rye, kuko buriya iyo umubyeyi akweretse ko yagufasha ntabwo uba ugomba gutandukira. Rero mpora ngendana ako kantu mu mutwe, sinemerewe gukora ikosa, kuko ubufasha no kunyumva banyeretse si ngomba kubatenguha.”

Kuba atarashyize ahagaragara ibihangano byinshi umwaka ushize, Wayz asanga ari nk’umwaka wo kwiga no kureba ibitaragenze neza.

Ati: “Umwaka washize kuri jye wari umwaka wo kwiga, kureba ibitaragenze neza n’uko byakosorwa. Ni yo mpamvu uyu mwaka twawutangiye neza kandi mfite n’indi mishinga, uyu mwaka wo banyitege.”

Ngo iyo amaze gukora igihangano cye, umuntu wa mbere acyumvisha ni nyina, ndetse na mukuru we kugira ngo bamubwire uko babyumva, kandi ko n’iyo bamubwira ko atari byiza atabyumva nk’urwango.

Agaruka ku mpamvu akora indirimbo ze mu njyana zitandukanye, Wayz yavuze ko abona ari umugisha yahawe kuba ashobora kuzikoramo zose, kandi abantu bakazikunda.

Avuga ko atifuza kumenyekana mu njyana imwe, kuko icyo yakunze akagishyiraho umutima agikora kandi kigakundwa.

Uretse ababyeyi be, Ariel Wayz avuga ko ashimira itsinda ryabo bakorana mu rugendo rw’umuziki we, kuko ari bake beza, ku buryo babikora bikagenda neza.

Ariel wayz azwi mu ndirimbo zitandukanye zirimo Agasinye, You should know, Away, Wowe gusa, n’izindi.

Uretse indirimbo Wowe gusa, Ariel wayz yavuze ko muri uyu mwaka afite imishinga nyinshi irimo no gushyira ahagaragara umuzingo we (Album).

  • MUTETERAZINA SHIFAH
  • Gashyantare 25, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE