Dosiye ya Prince Kid yashyikirijwe Ubushinjacyaha irimo ibyaha 3

  • Imvaho Nshya
  • Gicurasi 4, 2022
  • Hashize imyaka 2
Image

Dosiye ya Ishimwe Dieudonné wamenyekanye cyane nka ‘Prince Kid’, uherutse gutabwa muri yombi akurikiranyweho ibyaha by’ihohoterwa rishingiye ku gitsina bikekwa ko yakoreye abakobwa bitabiriye irushanwa rya Miss Rwanda mu bihe bitandukanye, yamaze gushyikirizwa Ubushinjacyaha.

Biteganyijwe ko iyo dosiye ibanza gusuzumwa n’ubushinjacyaha mbere yo kohereza Prince Kid imbere y’urukiko, ngo aburanishwe ku byaha akekwaho.

Prince Kid wari Umuyobozi wa Rwanda Inspiration BackUp itegura Miss Rwanda yatawe muri yombi ku wa 26 Mata 2022, akaba akurikiranyweho ibyaha bitatu ari byo “gukoresha undi imibonano mpuzabitsina ku gahato, gusaba cyangwa gukora ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.”

Umuvugizi w’Urwego rw’Igihugu rw’Ubugenzacyaha (RIB) Dr. Murangira B Thierry, yabwiye itangazamakuru ko Ishimwe Dieudonné wateguraga irushanwa rya Miss Rwanda guhera mu mwaka wa 2014 akurikiranyweho gukora ibyo byaha mu bihe bitandukanye.

Yasabye Abanyarwanda kwirinda ibyaha by’ihohoterwa iryo ari ryo ryose by’umwihariko irishingiye ku gitsina, anashishikariza abakorewe ihohoterwa gutinyuka bakagana RIB cyangwa bakajya ku biro bya “Isange One Stop Center” bibegereye.

  • Imvaho Nshya
  • Gicurasi 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE