DC Clement yatangiye urugendo rw’imitoma ku mbuga nkoranyambaga

  • MUTETERAZINA SHIFAH
  • Mata 22, 2024
  • Hashize ibyumweru 4
Image

Umunyamakuru umenyerewe cyane mu myidagaduro cyane cyane ku mbuga nkoranyambaga Clement Niyigaba uzwi nka DC Clement, nyuma yo gusaba umukunzi we Manzi Ariane kubana nk’umugore n’umugabo, batangiye urugendo rwo guterana imitoma ku mbuga nkoranyambaga.

Nyuma y’iminsi 2 gusa uyu musore aganjwe n’amarangamutima akagaragariza inshuti n’abavandimwe urwo akunda Ariane bari bamaze igihe mu rukundo, mugitondo cyo kuri uyu wa Mbere tariki 22 Mata 2024, yanyarukiye ku rubuga rwe rwa Instagram maze atomora uyu mukobwa bitegura kurushinga.

Yagize ati “Mu maso yawe mbonamo ejo hanjye heza, mu kumwenyura kwawe mbonamo umunezero, wangize umuntu unezerewe, bavuga ko iyo uzi burya uba uzi, ni byo, ndabizi ko ugushaka kwanjye ari uko namarana ubuzima bwose nsigaje ku Isi ndi kumwe nawe, ndagukunda birenze kukubwira Ariane wanjye.”

Umukobwa nawe ntiyazuyaje yahise amusubiza ati: “Urakoze cyane igice kindi cyanjye mu bingize, reka dutangire uru rugendo rushya turi kumwe.”

Ni ibintu byishimiwe na benshi mu bakunda bakanabakurikirira hafi ku mbuga nkoranyambaga zabo, aho batangiye kubagaragariza ko babishimiye.

Mu babishimiye harimo Anita Pendo, Jojo Breezy, Mc Nario, Prosper Nkomezi n’abandi.

Uretse kuba Manzi Ariane yasabwe na DC Clement ko bazashyingiranwa, yanamenyekanye cyane ubwo yajyaga guhatanira ikamba rya Nyampinga w’u Rwanda 2022, ahagarariye Umujyi wa Kigali, ariko ntiyagira amahirwe yo gukomeza.

Ibirori byo kwambika impeta uyu mukobwa byabaye ku mugoroba wo ku wa Gatandatu tariki 20 Mata 2024, byitabirwa n’ibyamamare bitandukanye birimo Muyoboke Alex wamenyekanye nka Manager w’abahanzi batandukanye, umuhanzi Rugamba Yvery wanaririmbiye abitabiriye, umunyamideri Isimbi Vestine uzwi nka Isimbi Model, Niyitegeka william Julius uzwi nka Chita, umenyerewe nk’umusangiza w’amagambo mu birori bitandukanye.

Biteganyijwe ko ubukwe bw’aba bombi buzaba muri Gicurasi uyu mwaka, bikaba bivugwa ko Dc Clement amusabye ko yamubera umugore nyuma y’imyaka ibiri bakundana.

  • MUTETERAZINA SHIFAH
  • Mata 22, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE