Davido, Tiwa Savage na Diamond bahurijwe mu gitaramo gikomeye i Kigali

  • NTAWITONDA JEAN CLAUDE
  • Kamena 15, 2023
  • Hashize amezi 10
Image

Abanya-Nigeria bakunzwe ku Isi barimo  David Adedeji Adeleke [Davido], Tiwatope Savage [Tiwa Savage] n’Umunya-Tanzania uhagaze bwuma muri Afurika Naseeb Abdul Juma Issack [Diamond Platnumz]; bategerejwe i Kigali mu Iserukiramuco ryateguwe na ‘Giants of Africa’ ryiswe ‘Giant of Africa  Festival’.

Ni bitaramo bizabera muri BK Arena, aho amatike yo kubyitabira azatangira kugurishwa ku wa 22 Kamena 2022.

Abahanzi batumiwe barimo Davido, Diamond Platnumz na Tiwa Savage n’abandi bahanzi barimo Umunyafurika y’Epfo Tyla Laura Seethal wamamaye nka Tyla ndetse na Bruce Melodie uri mu bahanzi bakunzwe kurusha abandi mu Rwanda.

Giants of Africa Festival izabera i Kigali mu Rwanda guhera taliki 13 isozwe ku wa 19 Kanama 2023, ari na bwo hazaba igitaramo cyatumiwemo aba bahanzi bakomeye muri Afurika.

Mu gihe cy’icyumweru kimwe cy’iri serukiramuco, hazaba guhatana kw’amakipe, aho hagati mu mukino hazajya haba haririmba umuhanzi watoranyijwe.

Giants of Africa Festival izaba urubuga rwiza ku rubyiruko rwo mu Rwanda ruri hagati y’imyaka 20 na 30, ruzahabwa amahugurwa ajyanye no kwiteza imbere hashingiwe ku byo buri wese ashaka kwerekezamo.

Abasore n’inkumi kandi bazahurira mu irushanwa rizasiga hamenyekanye uwegukanye ‘Giants of Africa Festival 2023’. Iki gikorwa kizitabirwa n’abo mu bihugu birenga 16.

Abategura iri serukiramuco bashyize hanze abahanzi bazaririmbamo. 

Mu barimo, Davido ni ubwa gatatu azaba ataramiye mu Rwanda kuko yaherukaga kuza mu gitaramo cyabaye mu ntangiriro za 2018. Iki gitaramo cyari cyiswe “30 Billion Tour” cyari kigamije kumenyekanisha album yari yashyize hanze muri ibyo bihe.

Tiwa Savage ni ku nshuro ya mbere agiye kuririmbira mu Rwanda ndetse byagiye bivugwa ko azahakorera igitaramo bikarangirira mu magambo.

Uyu mugore aherutse kubaka amateka yo kuririmbira mu birori byo kwimika Umwami w’u Bwongereza, Charles III.

Tyla na we ni ubwa mbere agiye kuririmbira mu Rwanda. Uyu muhanzi w’imyaka 22 yamamaye mu ndirimbo nka “Been Thinking”, “Getting Late” n’izindi. Aheruka gukorana indirimbo na Ayra Starr bise “Girl Next Door”.

Diamond Platnumz yaherukaga mu Rwanda mu 2019 ubwo yari yitabiriye Iwacu Muzika Festival. Umwaka ushize yari ahafite igitaramo mu Ukuboza ariko birangira gipfuye.

Giants of Africa igamije guteza imbere urubyiruko binyuze mu mukino wa Basketball. Ni umuryango watangijwe na Masai Ujiri usanzwe ari Umuyobozi wa Toronto Raptors yo muri NBA.

Abahungu n’abakobwa 250 bazitabira iserukiramuco rizabera i Kigali ni abo muri Sénégal, Mali, Nigeria, Cameroun, Repubulika Iharanira Demokarasi ya Congo, Sudani y’Epfo, Uganda, Rwanda, Tanzania, Kenya na Somalia.

  • NTAWITONDA JEAN CLAUDE
  • Kamena 15, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE