Chorale de Kigali ifatanyije n’Ishyirahamwe Nyafurika rigamije guteza imbere muzika ya korali muri Afurika (African Choral and Gospel Championship, ACGC), bateguye iserukiramuco ry’indirimbo rizitabirwa na korali zikomeye mu bihugu by’Afurika y’Epfo, Nigeria na Ghana.
Ni iserukiramuco ryateguwe nk’igitekerezo cya ACGC, bakigejeje kuri Chorale de Kigali, nka korali imaze gukomera mu ruhando rwa Afurika kuba yaryakira ndetse no kuba u Rwanda rugaragaza ubushake bwo kwakira inama n’ibindi bikorwa bihuza abantu benshi.
Mu kiganiro n’itangazamakuru ubuyobozi bwa Chorale de Kigali bwatangaje ko rizabera mu Intare Arena, muri Car Free Zone no mu Karere ka Musanze kuva ku italiki ya 23 Werurwe kugera ku wa 28 Werurwe 2022.
Kugeza ubu korali eshatu zo muri Nigeria zirimo iyitwa Bacmac Choir, Lagos City Choir, All Female Choir na Bakamoso yo muri Afurika y’Epfo.
Muri Ghana hazaturukayo korali zikomeye zirimo iyitwa Harmonious, Accra Diocesan Choir, Akoo Show Choir, Grace Chorale, Heavenly Jewels n’iyitwa Symphonials Choir.
Uretse Chorale de Kigali kandi mu Rwanda indi korali izitabira iri serukiramuco ni Alarm Ministries, Choeur International et Ensemble Instrumental de Kigali na Korali Ishema Ryacu.
Shema Patrick wo muri Chorale de Kigali yavuze ko ibijyanye n’imyiteguro byarangiye igisigaye ari ukuzataramira Abaturarwanda babafasha kwegerana n’Imana binyuze mu ndirimbo.
Shema yasobanuye ko igitaramo gifungura iri serukiramuco kizabera muri Intare Arena ku italiki ya 23 Werurwe, mu gihe ikizakurikiraho kizabera muri Car Free Zone mu Mujyi wa Kigali mu gihe hari ikindi kizabera mu Mujyi wa Musanze hafi na Diyosezi ya Ruhengeri n’igisoza kizabera muri Intare Arena.
Ni iserukiramuco rizanarangwa n’ibikorwa bizwi nka ‘Master Class’, aho abantu bungurana ibitekerezo ku muziki nk’abantu baririmba ku giti cyabo, korali n’ibindi.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE