CHOGM 2022: Igikomangoma Charles n’umugore we baraye i Kigali

  • Imvaho Nshya
  • Kamena 22, 2022
  • Hashize imyaka 2
Image

Igikomangoma cyo mu Bwami bw’u Bwongereza (Prince) Charles n’umugore we Camilla bageze i Kigali mu Rwanda aho bitabiriye Inama yAbakuru b’Ibihugu na Guverinoma byo mu Muryango w’Ibihugu bikoresha Ururimi rw’Icyongereza (CHOGM 2022).

Aba banyacyubahiro bombi bageze i Kigali mu Rwanda ku mugoroba wo ku wa Kabiri ahagana saa mbili n’iminota 45 (8:45 PM), bakaba bakiriwe n’Ambasaderi w’u Rwanda mu Bwongereza Busingye Johnston.

Ni rwo ruzinduko rwa mbere bagiriye mu Rwanda, aho bahagarariye Umwamikazi w’u Bwongereza (Queen) Elizabeth II mu nama ya CHOGM 2022 ibaye iya mbere ibereye muri Afurika nyuma y’imyaka isaga 10.

Ubutumwa bwatangajwe n’ibiro bya Prince Chales ku mbuga nkoranyambaga, buragira buti: “CHOGM 2022 irahuriza hamwe abayobozi baturutse mu bihugu 54 bigize Umuryango wa Commonwealth mu gushimangira indangagaciro no kumvikana kuri politiki zigamije kuzamura imibereho y’abaturage b’uyu muryango basaga miliyari 2.5.”

Gahunda yatangajwe n’Ambasade y’u Bwongereza i Kigali iteganya ko Prince Charles n’umugore we Camilla basura Urwibutso rwa Jenoside rwa Kigali kuri uyu wa Gatatu aho bunamira inzirakarengane zazize Jenoside yakorewe Abatutsi mu 1994 bashyira indabo ku mva zishyinguwemo abasaga 250,000.

Biteganyijwe ko kandi Prince Charles aza kwerekeza i Bugesera aho asura Urwibutso rwa Jenoside rwa Ntarama, Umudugudu w’Ubumwe n’Ubwiyunge n’umushinga w’ubuhinzi.

Prince Charles aherutse kuvuga ko we n’umugore we Camilla biteze kugirira ibihe byiza mu Rwanda muri uru ruzinduko rwabo rwa mbere mu rw’Imisozi Igihumbi.

  • Imvaho Nshya
  • Kamena 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE