Carl Weathers wamenyekanye muri Filime zirimo Rocky yitabye Imana

  • MUTETERAZINA SHIFAH
  • Gashyantare 3, 2024
  • Hashize amezi 4
Image

Carl Weathers wamamaye cyane ku izina rya Apollo Creed mu ruhando rwa Sinema by’umwihariko muri Leta Zunze Ubumwe z’Amerika (USA) yitabye Imana ku myaka 76 y’amavuko.

Inkuru y’urupfu rwa Weathers wabaye umwe mu bakinnyi bakomeye muri sinema y’Amerika, yatangajwe n’abo mu muryango we, bavuze ko yashizemo umwuka ubwo yari aryamye iwe mu rugo mu ijoro rya tariki 1 rishyira iya 2 Gashyantare 2024.

Carl Weathers yavutse tariki 14 Mutarama 1948, avukira New Orleans muri Louisiana, aza kuba umukinnyi ukomeye wo mu b’inyuma mu mupira w’amaguru mu Mujyi wa San Diego, abihagarika muri 1974 kugira ngo akomeze gukuza indi mpano yiyumvagamo y’ibijyanye na Sinema.

Weathers yinjiye mu ruhando rwa Sinema mu mwaka 1975 ariko amenyekana cyane muri urwo ruhando ahagana mu 1985 kubera ibice bitatu bya filime ya “Rocky” yakinnyemo azwi nka Apollo Creed, ikaba yari filime ya Sylvester Stallone wamamaye nka Rambo bari n’inshuti z’akadasohoka.

Weathers yongeye kubakirwa izina na filime yitwa Predator yakinanyemo na Arnold Schwarzenegger mu 1987. 

Urupfu rwe rwashenguye benshi, ariko by’umwihariko ibyamamare mu ruhando rwa Sinema barimo Sylvester Stallone (Rambo) hamwe na Arnold Schwarzenegger wamenyekanye cyane nka (Commando), aba bose bakaba batangaje ko batewe akababaro no kubura inshuti yabo ikomeye Carl Weathers utakibarizwa ku Isi y’abazima.

Uretse Carl Weathers witabye Imana mu mpera z’iki cyumweru, hari n’ibindi byamamare byitabye Imana muri kino cyumweru birimo umukinnyi wa filime Hinton Battle witabye Imana tariki 30 Mutarama 2024 afite imyaka 67 y’amavuko hamwe na Chita Rivera na we wakanyujijeho mu ruhando rwa Sinema, witabye Imana kuri iyo tariki ku myaka 91.

Yakundwaga n’abatari bake kubera ubuhanga yagaragazaga muri filime yakinaga
Carl Weathers apfuye ku myaka 76 y’amavuko
Impamvu y’urupfu rwa Hinton Battle ntabwo yigeze imenyekana
Chita ni umwe mu bakinnyi ba filime begukanye igihembo cya Tony
Schwarzenegger ni umwe mu bashenguwe n’urupfu rwa Carl Weathers
  • MUTETERAZINA SHIFAH
  • Gashyantare 3, 2024
  • Hashize amezi 4
TANGA IGITEKEREZO
Assinah Uhiriwe says:
Gashyantare 3, 2024 at 10:06 pm

Mukomerezaho izi nkuru ningirakamaro mubuzima bwabantu muri rusange

Andika igitekerezo

AMATEGEKO AGENGA IYANDIKA RY'IGITEKEREZO CYAWE