Bwa mbere Muyango agiye gushyira hanze Alubumu wenyine

  • KAMALIZA AGNES
  • Ukuboza 23, 2023
  • Hashize amezi 2
Image

Ku nshuro ya mbere umuhanzi umenyerewe mu njyana ya gakondo Jean Marie Muyango agiye gusohora umuzingo (Album) ari wenyine, nta wundi bayifatanyije nk’uko byagenze ku zindi 3 zayibanjirije.

Ni umuzingo we wa kane, wiswe “Imbanzamumyambi” uriho indirimbo 12 zirimo izo yahimbiye Perezida Paul Kagame na Madamu, biteganyijwe ko uzamurikirwa mu giteramo kizabera Kigali Conference and Exhibition Village (Camp Kigali) ku cyumweru tariki 24 Ukuboza 2023.

Ni umuzingo yise Imbanzamumyambi nk’ijambo rikomoka mu kivugo cye. Mu kiganiro n’itangazamakuru uyu Munyabigwi Yavuze ko iki igitaramo cyihariye kuri we kuko ari bwo agiye ku gikora adafatanyije n’itsinda Imitari ahubwo akazafatanya n’abahanzi biganjemo abo mu njyana gakondo bakiri bato.

Ubusanzwe Muyango amenyerewe mu njyana yagiye akorana n’itorero Imitari ari naryo bagiye bakorana mu bitaramo bitandukanye birimo n’ibyo yagiye akorera hanze y’u Rwanda cyane cyane ku mugabane w’u Burayi.

Agaruka ku ndirimbo yahimbiye Perezida Kagame na Madamu, Muyango yabwiye itangazamakuru ko yitegereje aho Perezida Kagame yakuye u Rwanda n’aho arugejeje, umutima umubwira kumutegurira impano yihariye yo kumugenera.

Muyango yavuze ko buri wese agira impano yumva yatanga, kuri we impano y’iyi ndirimbo ayifata nk’ishimwe afite ku Mukuru w’Igihugu.

Yagize ati: “Mbishoboye buri kwezi hajya hasohoka indirimbo ivuga kuri Perezida Kagame, cyangwa buri cyumweru, kuko na we buri munsi aba afite ibyo yaduhaye.”

Indirimbo ebyiri yahimbiye Perezida Kagame zirimo ‘Karame Uwangabiye’ ziri kuri uwo muzingo ngo Muyango yazihimbye ubwo yabaga hanze y’u Rwanda.

Ngo ni indirimbo yakunzwe cyane, aho Muyango yahishuye ko hari abahanzi batari bake bamwegereye bamusaba ko yabemerera bakayisubiramo, ibintu avuga ko byamushimishije.

Icyo wamenya ku ndirimbo yahimbiye Madamu Jeannette KagameMuyango avuga ko yayihimbiye Madamu Jeannette Kagame ubwo yizihizaga isabukuru y’amavuko, anafata umwanzuro wo kuyishyira ku muzingo we kugira ngo izagere kure kuko hari abari bayemeye n’abandi batayemeye.

Yagize ati: “Ndavuga nti uwayishyira kuri Alubumu ngiye gukora igasohoka n’izindi abantu bakanayimenya, kuko hari abantu batayizi.”

Muyango avuga ko atigeze agorwa no guhimba indirimbo yahimbiye Umukuru w’Igihugu ndetse na Madamu we, kuko ibyo yaririmbye ari ubuzima n’ibikorwa byabo.

Ni umwe mu bahanzi b’abahanga cyane bubakiye umuziki wabo kuri gakondo. Afite ibihangano binyura benshi byamamaye kumurusha kuko kenshi iyo muganira akubwira ko hari igihe ajya mu birori bakaririmba indirimbo ze batarabutswe ko ahari.

Yararikiye Abanyarwanda kuzitabira igitaramo kuko bahishiwe byinshi kandi byiza harimo n’ibyo batari bazi yagarutse ku indirimbo ye Nshya iri kuri iyi Alubumu yise” Ibirumbo”.

Indirimbo avuga ko ifite aho ihuriye n’amateka y’ubwana bwe ati: “Kera tukiri bato twitoza mu itorero abantu benshi ntibabyumvaga wasangaga batubwira ko dukwiye kubireka kuko tuba twapfuye ubusa, kugeza ubwo uwadutozaga yaje gutangira kujya atujyana mu birori bitandukanye nk’ubukwe ariko mbere yaho wasangaga bavuga bati dore bya birumbo”.

Muyango Jean Marie yatwaye ibihembo byinshi harimo nka Prix des couvertes ndetse akaba aherutse no guhabwa igihembo cya Isango na muzika ari nacyo cya mbere yaherewe mu Rwanda.

  • KAMALIZA AGNES
  • Ukuboza 23, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE