Bugesera: Uburezi bufite ireme ni umusaruro w’ubufatanye mu myigire

  • NTAWITONDA JEAN CLAUDE
  • Kamena 14, 2022
  • Hashize imyaka 2
Image

Mu Karere ka Bugesera, mu Murenge wa Rweru hatangijwe icyumweru cy’uburezi hagamijwe ko bizatuma abana bari barataye ishuri barigarukamo, kuko ari ubuyobozi ndetse n’ababyeyi bafatanyije bizakemura icyo kibazo, bikazamura ireme ry’uburezi.

Kuri uyu wa Mbere taliki ya 13 Kamena 2022, Itorero rya ADEPR Ururembo rwa Ngoma rwatangije ku mugaragaro icyumweru cy’uburezi kizagera taliki ya 21 Kamena 2022.

Iki cyumweru gifite intego igira iti ‘Uburezi Bufite Ireme, Ishingiro ry’Iterambere Rirambye’.

Ni icyumweru kizabamo ibikorwa byo kugarura abana bataye ishuri no gukurikirana impamvu baritaye kugira ngo ku bufatanye n’ababyeyi zikemuke nk’uko byagarutsweho na Pasteri Kananga Emmanuel umuyobozi w’Ururembo rwa Ngoma

Umunyamabanga Nshingwabikorwa w’Intara y’Iburasirazuba, Dr Nyirahabimana Jeanne yifatanyije n’ubuyobozi bw’Itorero ADEPR/Ururembo rwa Ngoma mu Karere ka Bugesera,mu gutangiza icyumweru cy’uburezi cyatangirijwe kigo cya GS Nkanga mu Murenge wa Rweru.

Umunyamabanga Nshingwabikorwa w’Intara y’Iburasirazuba Dr Nyirahabimana Jeanne yashimiye Itorero ADEPR uruhare rigira mu mibereho myiza y’abaturage (Foto Akarere ka Bugesera)

Yavuze ko Ubuyobozi bw’Intara bushima umusanzu wa ADEPR mu gufatanya n’ubuyobozi mu gushyira mu bikorwa gahunda zitandukanye za Leta haba mu gufasha abatishoboye n’ubundi bukangurambaga buteza imibereho myiza y’abaturage.

Ati: “Turashimira Itorero ADEPR uburyo rifatanya n’ubuyobozi mu gushyira mu bikorwa gahunda zitandukanye za Leta, umusanzu wanyu urakomeye. Iyo turebye iyi gahunda uko mwayitekereje iki cyumweru n’ibyo muzakoramo, turasanga mugiye kudufasha gusubiza ibibazo by’ingutu duhangana nabyo mu burezi mu Ntara y’Iburasirazuba.”

Ku bufatanye bw’ubuyobozi n’ababyeyi bizakemura ibibazo bikigaragara mu myigire, hagerwe ku ireme ry’uburezi ( Foto Akarere ka Bugesera)

Paster Rutagarama Eugène Umuyobozi wungirije wa ADEPR yavuze ko iyi gahunda igamije kongerera ireme uburezi butangirwa mu bigo by’iri torero, hakazakorwa ibikorwa byo kugarura abana bataye ishuri, kurwanya ibiyobyabwenge, ubufatanye bw’ababyeyi mu kuzamura ireme ry’uburezi n’ibindi.

Yongeraho ko iyi gahunda izafasha mu guhangana n’ibibazo bigaragara mu burezi.

Pasiteri Rutagarama yavuze ko mu bigo by’Amashuri bicunzwe n’Itorero ADEPR bashishikajwe no guhindura ibitagenda neza.

Mu rwego rwo kugabanya abana bata ishuri Pasiteri Rutagarama yatanze inkunga y’amafaranga y’u Rwanda 300,000 yishyurira abana 100 ifunguro.

  • NTAWITONDA JEAN CLAUDE
  • Kamena 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE