Bruce Melody yibukije urubyiruko ko u Rwanda ari umurage wabo

  • MUTETERAZINA SHIFAH
  • Gashyantare 4, 2024
  • Hashize ibyumweru 4
Image

Itahiwacu Bruce, uzwi ku izina ry’ubuhanzi nka Bruce Melody, yibukije urubyiruko ko u Rwanda ari wo murage wabo, nk’imbaraga z’Igihugu.

Yabitangarije i Washington DC, ku mugoroba wo kuwa Gatandatu tariki 03 Gashyantare, mu kiganiro cyagarukaga ku mahirwe ari mu bikorwa bya siporo n’imyidagaduro  by’umwihariko babyaza amahirwe ari mu bikorwa remezo biri muri urwo rwego.

Ni ikiganiro yahuriyemo n’umuyobozi Mukuru wa Basketball Africa Claire Akamanzi wari umaze iminsi 11 kuri uwo mwanya, cyabaga ku munsi wa kabiri wa Rwanda Day 2024 yarimo kuba ku nshuro yayo ya 11.

Bruce Melody yavuze ko bagitangira umuziki u Rwanda rwari rufite ibibazo bikomeye uretse kuba abo bataramiraga bari bafite ibikomere bitandukanye yaba ku mubiri ndetse no ku mutima, ariko hari n’ikibazo cy’ibikorwa remezo, kuko batagiraga ahantu hisanzuye ho gukorera ibitaramo, ku buryo iterambere ry’umuhanzi ryari rigoye muri icyo gihe ugereranyije n’uyu munsi.

Ati: “Navutse mu 1992, najyaga mvuga ko nshobora kuba naravutse mu gihe kitari icya nyacyo, ariko na none nishimira ko nabonye Igihugu cyanjye gikura, kigenda giterimbere mu nzego zose.”

Yongeraho ati: “Byari bigoye cyane ku muhanzi nkanjye, gutegura cyangwa gukora igitaramo bwite, ariko muribuka igihe nateguraga igitaramo cyo kwizihiza imyaka icumi nari maze mu muziki cyabereye muri BK Arena, ni bwo nabonye ko imyidagaduro yacu yagutse cyane.”

Bruce Melody asanga ibikorwa remezo by’umwihariko iby’imyidagaduro birimo BK Arena, byarashyize u Rwanda ku rwego mpuzamahanga, bikamamaza umuco n’umuziki w’Igihugu, ari n’aho yahereye yibutsa urubyiruko u Rwanda ari umurage wabo.

Yagize ati: “Ndashaka kubwira abato hano, turi bato twajyaga twumva ijambo Rwanda rw’ejo, icyo gihe natekerezaga ko hari igihe kinini tuzaba dukura, ariko ubu ni twe Rwanda, ejo harageze ubu noneho natwe dufite ubushobozi bwo gutekereza ku Rwanda rw’ejo, tukaruha ingero z’uko u Rwanda rukwiye kuba rumeze.”

Bruce Melody azwi cyane mu ndirimbo zirimo Saa Moya, Katerina , Henzap n’izindi.

Uretse kuba ari umuhanzi ukunzwe mu Rwanda n’imahanga, Bruce Melody ni umwe mu bashinze ikipe ya basketball yitwa United Generation Basketball (UGB).

Bruce Melody yanataramiye abasaga 6000 bitabiriye Rwanda Day 2024
  • MUTETERAZINA SHIFAH
  • Gashyantare 4, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE