Bruce Melodie yavuze ku ndirimbo ye na The Ben

  • MUTETERAZINA SHIFAH
  • Gashyantare 27, 2024
  • Hashize amezi 2
Image

Umuhanzi Itahiwacu Bruce uzwi nka Bruce Melodie, akaba n’umwe mu bamaze kubaka izina rikomeye mu ruhando rwa muzika mu Rwanda no mu mahanga, yavuze ku ndirimbo yakoranye na The Ben kandi ko igihe cyose yiteguye kuba bayirangiza.

Mu kiganiro yagiranye na Televisiyo imwe yo muri Kenya, Bruce Melodie yagarutse kuri byinshi ku bijyanye n’umuziki we, anavuga ko ari umufana wa The Ben kuko hari n’indirimbo ye akunda.

Uyu muhanzi yavuze ko nta kibazo afitanye na The Ben.

Yagize ati: ”Nta bifu (urwango) iri hagati yanjye na The Ben kuko ndi n’umufana we, indirimbo ye nkunda ni I’M in love, kuko nanjye ndi mu rukundo, ni indirimbo nziza y’urukundo, gusa ku mbuga nkoranyambaga ho haba inzenya nyinshi, ariko nta kibazo kiri hagati yacu twembi.”

Bruce Melodie yavuze ko nubwo batajya baganira cyane ariko iyo bahuye baganira.

Ati: ”Ntangira umuziki yari ari muri Amerika, ntabwo turi inshuti, ariko nta kibazo dufitanye, yaje kugaruka mu Rwanda, gusa yabaga ahuze mu zindi gahunda ze, kandi twagerageje no gukora indirimbo, yarampamagaye ari muri studio, arampamagara, ngo nze dukore indirimbo, njyayo nsanga arahuze, gusa nakoze uruhare rwanjye ndataha, umunsi azaba ashaka ko tuyikora igasohoka, azampamagare njye nzaba mpari, kuko nkunda umuziki kandi na we ni umuhanzi mwiza, ufite ijwi ryiza, rero azampamagare tuyirangize.”

Yongeraho ati: “Ibivugwa ni umutwe w’inkuru abanyamakuru baha ibiganiro byabo ngo abantu bajye kubireba cyane cyane abakorera ku rubuga rwa Youtube, ariko rwose nta kibazo kiri hagati yanjye na The Ben.

Ubutumwa naha the Ben ni uko ndi umufana we ukomeye, nkunda indirimbo ze, The Ben komereza aho mu byo ukora, ndakubaha.”

Ku bijyanye n’indi mishinga ashoramo imari, Bruce Melodie, yavuze ko yahoze ari umwe mu bashize televiziyo imwe mu zikorera mu Rwanda, ariko kuri ubu atagifitemo imigabane, kuko byari bimaze kumugora, agakuramo imigabane ye, ayishora mu bindi bikorwa birimo Basketball, inzu y’umuziki yitwa 1:55 am, aho barimo kubaka aho kwidagadurira muri kigali.

Melody aherutse gusubiramo indirimbo ye yitwa Funga macho ayisubiranamo n’umuhanzi Shaggy ukomoka muri Jamaica bayita “When she’s around” kuri ubu akaba afite n’indi mishinga y’umuziki arimo gukoraho.

  • MUTETERAZINA SHIFAH
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE