Amafaranga ya mbere Pastor P yakoreye mu muziki yayahawe na Muyoboke

  • MUTETERAZINA SHIFAH
  • Gashyantare 9, 2024
  • Hashize amezi 4
Image

Bugingo Ndanga Patrick umenyerewe cyane mu gukora no gutunganya umuziki (Producer), uzwi nka Pastor P, avuga ko amafaranga ya mbere yakoreye mu muziki ari ibihumbi 15 by’amafaranga y’u Rwanda yahawe na Muyoboke.

Bugingo watangiye gutunganya umuziki mu mwaka 2005, avuga ko izina Pastor P ari akabyiniriro yahawe igihe yari mu ishuri ritoza abigishwa ba Yesu.

Mu kiganiro yagiriye muri GEN-Z Comedy mu gace kacyo kitwa Meet me to Night, ku mugoroba wo ku wa Kane tariki 08 Gashyantare 2024, Pastor P yavuze ko ubwo yinjiraga mu gukora no gutunganya umuziki byari bigoye cyane, kubera ko nta mafaranga yari mu muziki muri icyo gihe, ku buryo amafaranga ya mbere yakoreye yari ibihumbi 15.

Yagize ati: “Amafaranga ya mbere nakoreye yari ibihumbi 15, icyo gihe yari menshi cyane, kandi ntabwo sitidiyo (studio) yari iyanjye nari umukozi, kuko indirimbo ya mbere navuga nishyuwe ayo mafaranga ni iya Tom Close, imwe bavuga Ugenda mu ishyamba utazi (Sinari Nkunzi), ni yo ya mbere Muyoboke yampaye ibihumbi 15.”

Yongeraho ati: “Yari menshi kuko icyo gihe nateze moto, kandi ubundi nari nsanzwe ntega bisi, icyo gihe mpita mfata moto ndataha.”

Nubwo bimenyerewe ko abenshi mu batunganya imiziki (Producers) bakunda gukora akazi kabo mu masaha y’ijoro, ku ruhande rwa Pastor P si ko bimeze, kuko we yikundira gukora ku manywa.

Ati: “Jyewe nkunda gukora ku manywa, nkunda gukora mu masaha y’akazi, namaze igihe kinini nkora amasaha y’ijoro, ariko biguhuza n’Isi ntoya ihuye n’ibyo ukora bikagutandukanya n’abandi bantu benshi. Wasangaga nk’umuryango wanjye bafite ibintu byinshi bakora ku manywa, ku mugoroba ntitubonane, rero kugerageza gukora amasaha yo ku manywa biramfasha kugira ngo ku mugoroba mpure n’abandi bantu bakora n’akandi kazi gasanzwe, ni amahitamo y’umuntu gukora ijoro cyangwa amanywa, ariko jye nkunda amanywa.”

Kuri Pastor P nta muntu ufite amafaranga uririmba nabi nkuko abisobanura.

Ati: “Iyo afite amafaranga aba aririmba neza mu buryo bubi, iyo nta mafaranga ufite n’iyo waba uririmba gute, uba uririmba nabi.”

Mu bahanzi bose Pastor P yakoranye na bo, uwo avuga utarigeze umugora kumukorera indirimbo ni nyakwigendera Jay Polly.

Ati: “Umuntu utarangoye ni Jay Polly, Imana imuhe iruhuko ridashira, twakoranye indirimbo yitwa mu Gihirahiro, twayikoze isaha imwe, yaraje arambwira ngo nabonye Priscilla murakorana, nifuza ko yaza akandirimbiraho. Ndamuhamagara araza, ahita ayimwigisha, arayiririmba, nakoze injyana yicaye aho, mubwiye ngo none se subiramo twumve uko bimeze, yarambwiye ati wowe shyiramo injyana ibitero uko bingana undeke.”

Yongeraho ati: “Iriya ndirimbo yose yayiririmbye adahagaze, nayishyizemo yose ararapa, ha handi nta n’ikintu cyo gusubiramo, ni we muntu navuga ko icyo yaburaga ari mudasobwa, ngo ibintu bye byose abishyiremo, ariko byose yazaga abifite mu mutwe.”

Ibigwi bya Pastor P mu muziki w’u Rwanda binashimangira na Alex Muyoboke umenyereye cyane iby’umuziki Nyarwanda, uvuga ko ari umwe mu bantu bahinduye byinshi muri uwo muziki, ariko utaragize igihembo na kimwe abona.

Ati: “Pastor P ni umwe mu bantu bahinduye umuziki, ariko utarigeze ubona igihembo na kimwe mu muziki w’u Rwanda. Yakoreye Tom Close mu ndirimbo ye yitwa Sinari nkunzi yafatanyije na The Ben, ni yo namuhayemo ibihumbi 15, nanjye nari muri kaminuza ni buruse nabaga nahawe i Butare, ariko ndayamuha kuko yadukoreraga nta kiguzi.”

Yongeraho ati: “Album za Biracyaza za King James, iza K8 Kavuyo, iza ba Tom, album ya kabiri ni we wazikoze, kandi ntabwo twamwishyuraga, twamuhaga ayo tubonye, icyo gihe nta n’amafaranga twakoreraga, ariko nta gihembo yigeze abona mu muziki w’u Rwanda.”

Muyoboke avuga ko nubwo nta muntu wigeze azirikana ibikorwa bya Pastor P, ariko ari ikintu we ubwe agendana ku mutima we.

Ku bijyanye n’uko afata kuba nta gihembo yigeze abona ku ruhare yagize mu muziki Nyarwanda, Pastor P avuga ko bitajya bimubabaza, kubera ko atigeze akora agambiriye kubona igihembo.

Ati: “Nta gihembo na kimwe ngira mu bikorwa byanjye kandi biranyura, kubera ntabwo ntigeze nkora ntekereza ibihembo mu buzima bwanjye, nungutse ijambo rivuga ngo igihembo n’ishimwe ariko ntabwo ari ibyo wagezeho, kuko ushobora kubona ibihembo byinshi nta kintu wagezeho, ushobora no kugera kuri byinshi ntugire igihembo ubona, ikintu cya mbere gishimisha ni uko iyo hari ibyo wagezeho nta gihembo ufite, igihembo cya mbere uba ufite n’ishema n’amahoro.”

Pastor P yamenyekanye  cyane mu nzu zitunganya imiziki, zirimo Narrow Road, One Way n’izindi.

  • MUTETERAZINA SHIFAH
  • Gashyantare 9, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE