Afghanistan: Abantu 920 bahitanywe n’umutingito ukomeye

  • NTAWITONDA JEAN CLAUDE
  • Kamena 22, 2022
  • Hashize imyaka 2
Image

Nibura abantu 920 baguye mu mutingito hafi y’Umujyi wa Khost mu majyepfo y’uburasirazuba bw’Afghanistan, hafi y’umupaka na Pakistan, uwo mubara ukaba ushobora kwiyongera.

Minisitiri wungirije ushinzwe ibiza kamere Sharafuddin Muslim yagize ati: “Kugeza ubu, dukurikije amakuru dufite, nibura abantu 920 bapfuye abandi 600 barakomereka”.

Umukozi wa Minisiteri y’Ubutegetsi bw’Igihugu, Salahuddin Ayubi, yatangaje ko kajugujugu zoherejwe mu rwego rwo gutabara kugira ngo zigere ku bakomeretse no gutanga ibikoresho by’ubuvuzi ndetse n’ibiribwa.

Radiyo Mpuzamahanga y’u Bufaransa (RFI) imaze amasaha make igerageza kuvugana na bamwe mu benegihugu, ariko umuyoboro wa telefone ntukora, nkuko umunyamakuru w’iyo radiyo i Islamabad, Sonia Ghezali abitangaza.

Umutingito ufite ubukana bwa 5.9 ku gipimo cya Richter, wumvishwe aho hantu, ariko nanone mu bilometero byinshi uvuye aho umutangito watangiriye, kugeza ubu i Islamabad aho abantu bamwe bumvaga umutingito woroheje. Turi nko mu bilometero 400 uvuye ku mutingito ukaze uri mu majyepfo y’uburasirazuba bw’Afghanistan.

Abayobozi barasaba ubufasha

Aka karere kagizweho ingaruka kagizwe n’imisozi miremire cyane, ihanamye, kandi mu midugudu inzu zikunze kuba zubatswe mu buryo bworoshye cyane, kandi umutingito ukunze kuba ukaze muri Afghanistan, cyane cyane ku musozi wa Hindu Kush.

Ikigo cy’Ibihugu by’i Burayi cyitwa Mediterranean Seismological Centre (CSME) cyita ku bijyanye n’imitingito cyatangaje ko umutingito wumviswe n’abantu bagera kuri miliyoni 119 muri Pakistan, Afghanistan n’u Buhinde.

Muri Mutarama, uburengerazuba bw’Afghanistan bwibasiwe n’umutingito ufite ubukana bwa 5.3: abantu makumyabiri na batandatu barapfuye. Abayobozi ba Afghanistan barasaba ubufasha bwo gutabara abaturage bakiri mu matongo y’inzu zabo.

Afghanistan ihura n’ikibazo gikomeye cy’ubutabazi mu gihe iki gihugu cyari gitunzwe ahanini n’inkunga  cyahabwaga n’amahanga, cyabonye ko imfashanyo zahagaritswe nyuma y’uko Abatalibani bafashe ubutegetsi muri Kanama umwaka washize.

  • NTAWITONDA JEAN CLAUDE
  • Kamena 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE