Abanyarwanda bakozweho n’intambara muri Ukraine barakurikiranirwa hafi

  • NTAWITONDA JEAN CLAUDE
  • Werurwe 1, 2022
  • Hashize imyaka 2
Image

Kugeza kuri uyu wa Kabiri, Abanyarwanda 86 ni bamaze kumenyekana ko bari muri za miliyoni z’abaturage batuye muri Ukraine bagizweho ingaruka n’ibitero simusiga byagabwe n’u Burusiya bwagabye kuri Leta ya Ukraine guhera mu minsi 6 ishize.

Guverinoma y’u Rwanda iravuga ko nibura Abanyarwanda 51 bamaze kwambuka umupaka wa Ukraine bahunga umutekano muke, umwe muri bo akaba yakiriwe muri hongiriya mu gihe abandi 50 bakiriwe muri Polonye yatanze iminsi 15 yo kwakira by’agateganyo abanyamahanga bitegura kujya mu bihugu byabo n’ibindi byemera kubakira.

Umuvugizi wa Guverinoma y’u Rwanda Wungirije Alain Mukuralinda,  kuri uyu wa Kabiri, yavuze ko Minisiteri y’Ububanyi n’Amahanga ifatanyije na za Ambasade z’u Rwanda muri Polonye, u Budage n’u Burusiya mu gukurikiranira hafi ubuzima bw’Abanyarwanda bakiri aharimo kubera intambara, abagerageza guhungira mu bihugu by’abaturanyi ndetse n’abamaze kwambuka.

Yavuze ko abakozi b’izo Ambasade bakomeje gukurikirana imibereho y’abo Banyarwanda binyuze mu kubahamagara kuri Telefoni, kwandikiranwa ubutumwa ku mbuga nkoranyambaga ndetse no gukoresha ubundi buryo bwose bw’itumanaho bushoboka kugira ngo babafashe hakurikijwe ubufasha bakeneye byihutirwa.

Mukuralinda yabwiye Televiziyo y’u Rwanda ko Abanyarwanda bari muri Ukraine ari abanyeshuri barimo n’abigaga bafite n’imirimo yindi bakora.

Ati: “Umuntu yavuga ko abari iyo bose ari abanyeshuri, amakuru dufite ni uko tumaze kumeya ay’abantu 86. Twamenye aho bari, dufite nomero za telefoni zabo, iza WhatsApp na E-mail byabo, ku buryo babasha kuvugana n’abarimo kubakurikirana bya hafi. Uyu munsi rero tumaze kumenya ko 51 muri bo bamaze kwambuka batakiri ku butaka bwa Ukraine; 50 bari muri Pologne, undi umwe ari muri Hongiriya.

Muri Pologne, Ambasade y’u Rwanda yohereje abakozi babiri ku mupaka ku buryo abahagera bagasanga bahari bakabakira, ndetse ngo hari n’ubufatanye n’ibindi bihugu by’Afurika bwo guhanahana amakuru n’abaturage basohoreye ku bakozi b’Ambasade zitari iz’ibihugu byabo.

Uretse Abanyarwanda bamaze kwambuka, Mukuralinda yashimangiye ko hari abandi icyenda bari mu rugendo berekeza ku mupaka ku buryo uyu munsi ushobora kwira umubare w’abamaze kurenga umupaka wa Ukraine ugeze kuri 60.

Ati: “Hari abandi icyenda bategereje kwambuka ni ukubera umubare w’abantu benshi, hari n’uburyo Ukraine yashyizeho bariyeri ya mbere iri mu bilometero 40 cyangwa 50 uvuye ku mupaka. Hari n’abandi 11 barimo kuza bagana ku mupaka.”

Gusa ngo Abanyarwanda bandi 15 bamenyewe amakuru ko bari muri Ukraine, ahantu harimo kubera intambara ku buryo bitaborohera kuhava kuko batabasha kugira aho bajya.

Yakomeje agira ati: “Abafite ahantu baheze bo barabaho nk’abandi bantu bari muri Ukraine badashobora kugira aho bajya. Ni ukuvuga ngo ni ukujya mu nzu zabo byaba ngombwa bagasohoka, haba hari ibisasu birashwe, wabonye ko hari uburyo bwo kuvuza inzogera bagahungira mu nzu zo hasi, munsi ya za metro zigenda munsi y’ubutaka, mbese ahantu ibisasu bidashobora kugera.”

Yakomeje ashimangira ko kugeza ubu nta Munyarwanda birumvikana ko yaba yakomeretse cyangwa yaburiye ubuzima muri iyi ntambara ikomeje gutwara ubuzima bw’abasirikare n’abasivili, aho imaze guhitana abasivili basaga 350.

Ku bahugira muri Polonye, bahawe igihe cy’ibyumweru bibiri gusa cyo kuba bamaze kwimukira ahandi cyangwa basubiye mu bihugu byabo.

Minisiteri y’Ububanyi n’Amahanga y’u Rwanda irimo kwakira ibibazo byose, ibitekerezo byose, n’ubushobozi bwa buri wese kugira ngo ibone gufata umwanzuro uri buze kubera buri wese bitewe n’ibibazo afite.

Mukuralinda ati: “Nta Munyarwanda barangije kumenya uri kuvugana n’izi nzego, ikibazo cyose yaba afite agomba kukivuga noneho bigasuzumwa bigashakirwa umuti wihuse. Umuti wo ntushobora kubura ariko nonaha ntabwo twavuga ko hafashwe umwanzuro runaka; ni ibintu bikomeje kuganirwaho.”

Yakomeje anavuga ko n’abazahungira muri Polonye igihe cy’agateganyo bahawe cyararangiye azafashwaakaba yagaruka mu Rwanda cyangwa akajya mu kindi gihugu cyose yakwifuza kwerekezamo bitewe n’ubushobozi n’ubushake afite.

“[…] Hari ushobora kuzinjira cya gihe cyo kuguma muri Polonye cyarangiye abandi bagiye. Buri muntu ku wundi afite ibibazo byihariye ariko ikibazo cyose kiri buboneke kigomba gushakirwa igisubizo icyo ni cyo cyemezo cyafashwe. Ubu nta Munyarwanda wamenyekanye nk’Umunyarwanda uri mu nzira, wambutse cyangwa se uri aho intambara ibera uzagira ikibazo hari uburyo bwo kugisubiza ngo ntibikorwe.”

Bimwe mu bibazo byakunze kugaragara Abanyarwanda bari muri Ukraine bafite ni ibyo kubona amafaranga cyane ko n’abari batayafite kasha birimo kubagora kuyabona mu Byuma by’ikoranabuhanga, muri za banki n’ahandi.  

Kubera ikibazo cy’umuriro wabuze ahenshi, bitewe n’iyangirika ry’ibikorwa remezo, hari bamwe mu Banyarwanda birimo kugora kuvugana n’inzego ziteguye kubafasha kuko umuriro uhita ubashirana batarafashwa uko bikwiye.

Ku wa Mbere, Umuryango w’Abibumbye watangaje ko abasaga 500,000 ari bo bamaze kwambuka umupaka wa Ukraine bahungira mu bihugu by’abaturanyi nka Polonye, Romania, Slovakia, Hungary na Maldova, imibare ikaba ikomeza kuzamuka uko iminsi y’intambara ikomeza kwiyongera. Igihugu cya Polonye ubwacyo ni cyo kimaze kwakira abakabakaba 300,000 aho buri munsi cyakira abasaga 50,000.

Intambara imaze iminsi 6 yangije byinshi birimo ibikorwa remezo n’imitungo itandukanye

  • NTAWITONDA JEAN CLAUDE
  • Werurwe 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE