Abahanzi bijejwe ubufatanye mu kubyaza umusaruro ibihangano byabo

  • MUTETERAZINA SHIFAH
  • Gashyantare 15, 2024
  • Hashize amezi 2
Image

Abahanzi b’indirimbo, abanditsi hamwe n’abakinnyi ba filime bijejwe ubufatanye mu kubyaza umusaruro ibihangano byabo, kugira ngo birusheho kubafasha kwiteza imbere hamwe n’Igihugu cyabo muri rusange. 

Byagarutsweho ku wa Gatatu tariki 14 Gashyantare 2024 mu biganiro bagiranye na Minisiteri y’Urubyiruko n’Iterambere ry’Ubuhanzi, hagamijwe kureba imbogamizi bahura na zo mu kazi kabo ka buri munsi kugira ngo barusheho gufashwa kwiteza imbere.

Abari muri uru rwego bagaragaje ko bahura n’imbogamizi zitandukanye zirimo kugorwa no kubona aho bafatira amashusho yo kwifashisha mu bihangano byabo, ibintu bavuga ko bidatuma bashobora kwamamaza neza ibyiza by’u Rwanda nkuko babyifuza.

Chris Eazy nk’umuhanzi umenyerewe cyane kubera bimwe mu bihangano bye, avuga ko kubona aho bafatira amashusho ari kimwe mu bibazo bikomeye abahanzi bahura nabyo.

Ati: “Hari ukuntu mba mbona twashyirirwaho inzira ndende yo kuvuga ngo twemererwe ahantu ho gukorera, nk’umuhanzi agiye gukora amashusho, kuko yifuza ko Igihugu cye kigaragara neza, akoroherezwa kuhabona, aho gukorera ni kimwe mu bibazo navuga abahanzi benshi muri iki gihugu cyacu bahura nabyo.”

Abahanzi basanga bagiye bahabwa umwanya mu bikorwa bikomeye bya Leta, bakajya banishyurwa mu gihe byabaye ngombwa, byarushaho kubateza imbere, bikabafasha kurushaho guteza imbere Igihugu cyabo muri rusange, nkuko bisobanurwa na Butera Knowless.

Ati: “Iyo ugize uruhare mu bikorwa byaba iby’abayobozi, Leta, n’inzego z’abikorera muri rusange, urishima kubera ko uretse ako kazi habamo gukorana mu bijyanye n’amafaranga, ni ikintu cyiza kuba mu bintu bitandukanye hazajya hifashishwa abahanzi mu buryo buziguye.”

Minisitiri w’Urubyiruko n’Iterambere ry’Ubuhanzi Dr. Utumatwishima Abdallah, avuga ko icyerekezo bafite ari ukureba uko ibihangano by’Abanyarwanda byabyarira ubukungu abahanzi.

Ati: “Icyererekezo dufite ni uko mu by’ukuri aho bishoboka dushyizemo ubushobozi bwose, dufatanyije n’abafatanyabikorwa, tugomba kureba ko ibihangano by’Abanyarwanda byabyarira ubukungu abahanzi ubwabo, ariko bikanagira icyo bikora ku bukungu bw’Igihugu, ku buryo tuzajya tuvuga ngo Igihugu cyacu gishingiye k’ubuhinzi, serivisi, ubukerarugendo, kandi kigashingira ku bahanzi no ku buhanzi butey’imbere.”

Abahanzi bavuga ko kuba ibihangano byabo byakoreshwaga hirya no hino mu bikorwa bitandukanye batishyurwa, bitatumaga bashobora kwiteza imbere, ariko kuba bigiye kurushaho kongererwa agaciro, bizabafasha kurushaho kubibyaza umusaruro ufatika mu buryo bw’amafaranga.

  • MUTETERAZINA SHIFAH
  • Gashyantare 15, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE