Mukuru wa Jose Chameleon na Weasel yitabye Imana azize kanseri

Mu matwi y’abatuye mu gihugu cya Uganda, haramukiye inkuru y’incamugongo ivuga ko mukuru w’abahanzi bubatse izina rikomeye muri icyo gihugu, barimo Jose Chameleon na Weseal, Humphrey Mayanja yitabye Imana.

Byamenyekanye gitondo cyo kuri uyu wa Gatandatu 30 Werurwe 2024, ubwo ibinyamakuru byinshi byo muri Uganda, byatangaje ko Humphrey wari umaze igihe arwariye mu bitaro bya Mulago yitabye Imana azize indwara ya Kanseri yari amaranye igihe.

Uyu mugabo yitabye Imana mu gihe hari hashize igihe kigera hafi ku mwaka bimenyekanye ko arwaye kanseri, kuko yabimenye bwa mbere ubwo yari agiye kwivuriza muri Leta Zunze Ubumwe z’Amerika.

Nyuma hafatwa icyemezo cyo kumugarura iwabo, mu rwego rwo kumwegereza umuryango we, atangira kwitabwaho n’Ibitaro bya Mulago, ari naho yaguye.

Ikitaramenyekana ni uko yaba yitabye Imana mu gitondo cyo kuri uyu wa Gatandatu cyangwa yaraye yitabye Imana, gusa amakuru yose yatangajwe arahuriza ku gitondo cyo kuri uyu wa Gatandatu.

Humphrey Mayanja yitabye Imana mu gihe hari hashize gusa imyaka icyenda uyu muryango ubuze umuvandimwe wabo Emmanuel Mayanja, na we wari ufite izina rikomeye mu muziki wa Uganda, witabye Imana tariki 16 Werurwe 2015, ku myaka 24 gusa.

Jose Cameleon, Wiseal, Pallaso,Humphrey Mayanja n’abandi bavanzimwe babo ni bene Gerard Mayanja na Prossy Mayanja.