Rubavu: Abagororwa baganirijwe ku Bumwe n’Ubudaheranwa bw’Abanyarwanda

Ubuyobozi bw’Akarere ka Ngororero bwasuye abagororwa bagororerwa mu Igororero rya Rubavu babaganiriza kuri gahunda y’Ubumwe n’Ubudaheranwa bw’Abanyarwanda.

Itsinda ryaturutse mu Karere ka Ngororero riyobowe n’umuyobozi w’Akarere wungirije ushinzwe Imibereho Myiza y’Abaturage Mukunduhirwe Benjamine, basuye abagororwa mu Igororero rya Rubavu by’umwihariko abakomoka mu Karere ka Ngororero.

Mu igororero rya Rubavu harimo abagororwa bakomoka mu Karere ka Ngororero 1254. Muri bo 329 bakurikiranyweho icyaha cya Jenoside naho 925 bakurikiranyweho ibyaha bisanzwe.

Visi Meya Mukunduhirwe yavuze ko urwo ruzinduko rufite impamvu 3 z’ingenzi zirimo kubagezaho intashyo z’abavandimwe, kuganira ku kwezi kwahariwe Ubumwe n’Ubudaheranwa bw’Abanyarwanda, kubatega amatwi hakumvwa ibibazo n’ibyifuzo byabo.

Muri iri gororero kwimakaza Ubumwe n’Ubudaheranwa bw’Abanyarwanda babigeze kure bakorera mu matsinda (clubs) yo kurwanya Jenoside (club anti-Jenoside), club yo kurwanya ibiyobyabwenge na club y’Ubumwe n’Ubudaheranwa.

Banafite gahunda yitwa IKI: (Iga, Kora, Igisha) ibafasha kunga ubumwe no kwimakaza ubudaheranwa. Bavuze ko bigishijwe guca bugufi bagasaba imbabazi abo bahemukiye.

Bimwe mu bibazo n’ibyifuzo bagaragaje birimo imitungo yabo itimukanwa igurishwa batabizi, kutamenya ibyiciro by’ubudehe barimo, kudahabwa ibyangombwa bya burundu by’ubutaka. Hari abifuza guhura n’imiryango bahemukiye ngo basabe imbabazi.

Ikiganiro cyatanzwe ku ‘Ubumwe bwacu ishingiro ry’ubudaheranwa’ cyatanzwe, abagororwa bahamagariwe kwikosora.

Perezida wa RIC Padiri Gilbert Ntirandekura yifashishije amasomo yo muri Bibiliya yasobanuriye abagororwa ko ikosa ribi ari ukutemera kwikosora.

Yashimiye abagororwa intambwe igaragara bateye mu kwimakaza Ubumwe n’Ubudaheranwa, abasaba kuzitwara neza igihe bazaba barangije ibihano basubiye mu miryango yabo.

Abagororwa basabwe kuranga aho imibiri itaraboneka ngo ishyingurwe mu cyubahiro iherereye kuko hari iboneka ari uko bari guharura umuhanda, gukora amaterasi, gucukura imirwanyasuri,….

Yababwiye ko Igihugu kibakunda, ko nibarangiza ibihano bazakirwa na yombi muri sosiyete nyarwanda.

Bakiriwe n’umuyobozi w’Igororero rya Rubavu wungirije Superintendent Nzeyimana Isaïe.

Nyuma y’ibiganiro no gusubiza ibibazo Itsinda ryashyikirije

abagororwa bababaye kurusha abandi imfashanyo zitandukanye zirimo ibikoresho by’isuku n’imyambaro.

Itsinda ryasuye abagororwa rigizwe n’abafatanyabikorwa mu bikorwa batandukanye barimo Ihuriro ry’Amadini n’Amatorero (RIC), AVEGA na PHARP, Umuhuzabikorwa wa MAJ mu Karere, umuyobozi w’ishami ry’imiyoborere myiza, Visi Perezida wa Ibuka, Umuhuzabikorwa wa DASSO, Abakangurambaga b’ubumwe n’ubwiyunge, Umuhuzabikorwa w’Itorero ry’Igihugu n’ubukangurambaga abarinzi b’Igihango n’Abanyamabanga Nshingwabikorwa b’Imirenge. 

NYIRANEZA JUDITH