Antonio Rüdiger yongereye amasezeramo muri Real Madrid azageza mu 2027

Mu gihe abakunzi ba Real Madrid bari bahangayikishijwe n’uko amasezerano ya Antonio Rüdiger agiye kurangira atari yahabwa andi, iyo kipe yatangaje ko yamaze gusinya andi azamugeza mu 2027.

Uyu mugabo wambara numero 22 agakina hagati mu kibuga ariko yugarira abo bita Centre-back, yinjiye muri Real Madrid ku wa 2 Kamena 2022, bitangazwa ku mugaragaro ku wa 20 Kamena y’uwo mwaka.

Ibyo wamenya kuri Antonio Rüdiger

Yavutse ku wa 3 Werurwe 1993, afite imyaka 33, avukira mu mujyi wa Berlin mu Budage, yakuriye mu gace ka Neukölln ko mu mujyi wa Berlin, kazwiho kubamo abimukira benshi, yakunze gutangaza ko kari agace kagoye ku mwana ku buryo buri munsi yabaga afite amahirwe menshi yo kwisanga mu bibazo ariko umupira wamufashije kuguma mu nzira nziza.

Umuryango we wageze mu Budage uhunze imvururu muri Sierra Leone, babayeho mu buzima butoroshye, nta mafaranga yo kubatunga, kuri we ngo iyi ni inkuru yabariwe ariko atishimira gukunda kuvugaho.

Urugendo rwe rwo gukina umupira w’amaguru kinyamwuga yarutangiriye mu ikipe y’abana itegura abakinnyi ya  VfB Stuttgart II yo mu Mujyi wa Stuttgart mu Budage mu mwaka wa 2011 kugera 2012.

Mu 2012 kugera 2015 yazamuwe mu ikipe nkuru ya VfB Stuttgart yo muri Stuttgart mu Budage. Mu 2015 kugera 2017 Rüdiger yakiniraga AS Roma yo mu Butaliyani.

Mu 2017 kugera 2022 yakiniraga Chelsea FC yatwaranye nayo ibikombe byinshi ndetse ikamushyira no ku rwego rwisumbuye rwatumye amakipe atandukanye atangira kumwifuza, aha ni nkaho mu 2018 yatwaranye na Chelsea FC igikombe cya FA Cup, 2019 atwara UEFA Europa League, 2021 atwara UEFA Champions League, 2021 atwara UEFA Super Cup ndetse na FIFA Club World Cup.

Ikipe ya Real Madrid yo muri Esipanye yamubengutse muri Kamena 2022 maze imutwara ku buntu kuko amasezerano ye yari yarangiye muri Chelsea kandi atongerewe andi.

Yasinye amasezerano y’imyaka Ine yagombaga kurangira uyu mwaka, bikaba byemejwe ko yasinye andi amwemerera kugera mu 2027.

Rüdiger amaze gutwara ibikombe 13 harimo 5 yatwaranye na Chelsea n’umunani amaze gutwarana na Real Madrid. Akundirwa cyane gusabana, gukunda ikipe no kugira ishyaka ryo gutsinda nuko atuma abandi bakinnyi bahorana akanyamuneza.