Amashuri yo muri Zambiya yafunze mu gihe cy’ibyumweru bitatu kubera icyorezo cya kolera, nyuma yuko abanyeshuri bari bamaze igihe mu biruhuko by’iminsi mikuru.
ibi bikaba bigiye gutuma umwaka w’amasomo muri iki gihugu utinda.
Africa News yatangaje ko ku wa 04 Mutarama, Minisiteri y’Uburezi yatangaje ko abanyeshuri bo mu mashuri abanza n’ayisumbuye, biteganyijwe ko bazagaruka ku mashuri gukomeza amasomo yabo ku ya 29 Mutarama.
Ku cyumweru, Minisiteri y’Ubuzima muri Zambiya yatangaje ko icyorezo cya kolera cyatangiye mu Kwakira 2023, cyatumye abantu 3015, bemezwa ko bacyanduye mu gihe abagera kuri 98 bapfuye.
Iki kibazo cyateye ubwoba n’impungenge z’ubuzima mu gihugu, nk’uko Minisiteri y’Ubuzima yabitangaje.
Minisitiri w’Uburezi Hon. Douglas Syakalima yatanze amabwiriza yo kurinda umutekano w’abanyeshuri n’abakozi mu gihe bazaba bagarutse ku mashuri.
Minisitiri yashimangiye ko hakenewe gushyira imbere ubuzima n’imibereho myiza y’abanyeshuri hashyirwa imbaraga mu isuku yuzuye mu bigo by’amashuri byose, gutanga amazi meza no gushyiraho aho gukarabira intoki.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE