Yanga, Umwami w’Agasobanuye, yitabye Imana

Nkusi Thomas wamenyekanye nka Yanga mu gusobanura filimi z’amahanga mu rurimi rw’Ikinyarwanda bikaba byaramenyekanye cyane nk’Agasobanuye, yitabye Imana azize uburwayi.

Aya makuru yatangajwe n’umuvandimwe Bugingo Bonny uzwi nka Junior Giti na we wamukurikiye mu gukora umwuga wo gusobanura filimi.

Mu butumwa Junior Giti yanyujije ku mbuga nkoranyambaga ze, yasabiye umuvandimwe Yanga kuruhukira mu mahoro, anagaruka ku bintu byinshi yamwigiyeho.

Muri ubu butumwa buherekeje ifoto ya Yanga, yagize ati “Ruhukira mu mahoro muvandimwe wanjye. Kuri njye wambereye Papa. Iteka nizereraga kandi nkanyurwa n’ibihe byose wanyuzemo, wambereye intangarugero n’umutoza…”

Yanga wari warahagaritse akazi ko gusobanura filimi mu Kinyarwanda mu gihe ari na we wabitangije mu Gihugu, yaguye muri Afurika y’Epfo aho yari arwariye ari no kwivuza.