Warren Zaïre-Emery ukinira Paris Saint Germain yageze mu Rwanda

  • SHEMA IVAN
  • Ukuboza 21, 2023
  • Hashize amezi 5
Image

Umufaransa Warren Zaïre-Emery ukinira Paris saint Germain yo mu Bufaransa yageze mu Rwanda mu uruzinduko rw’iminsi itatu.

Mu gitondo cyo kuri uyu wa Kane tariki 21 Ukuboza 2023, ni bwo uyu mukinnyi yasesekaye ku Kibuga cy’Indege Mpuzamahanga cya Kigali i Kanombe, aho aje gusura u Rwanda binyuze mu bufatanye bwa Visit Rwanda n’iyi kipe yo mugihu cy’ubufaransa ya Paris Saint Germain.

Akigera ku kibuga Mpuzamahanga cya Kigali, yavuze ko yishimiye kuza mu Rwanda anahishurako ari ubwambere ageze muri Afurika.

Yagize ati: “Nishimiye kuba ndi mu Rwanda, nahageze amahoro, kandi niteguye kumenya byinshi kuri iki gihugu kandi ntekereza ko nzahabonera ubunararibonye ntabonye ahandi mu buzima bwanjye. ni u bwa mbere ngeze muri Africa. Niteguye kumenya byinshi ku gihugu, umucuo wacyo n’ibindi nakwigiraho.”

Warren Zaïre-Emery w’imyaka 17 aherutse kuba umukinnyi wa gatatu ukuri muto mu mateka wahamagawe mu Ikipe y’Igihugu y’u Bufaransa nyuma ya Maurice Gastiger mu 1914.

Uyu musore akomeje kwitwara neza muri Paris saint Germain, dore ko yari umukinnyi w’umukino ubwo babonaga ticket ya 1/8 cya UEFA Champions League bahura na Borusssia Dortmund, mu mukino yanatsinzemo igitego.

Biteganyijwe ko ku Gicamunsi cyo kuri uyu wa Kane tariki 21 Ukuboza 2023, ahura n’abana bakina umupira w’amaguru muri Academy ya Paris Saint Germain yo mu Rwanda, abafana ndetse n’abanyamakuru kuri Kigali Pelé Stadium.

Tariki 4 Ukuboza 2019 ni bwo u Rwanda rwasinyanye amasezerano ya mbere y’imyaka itatu y’ubufatanye na Paris Saint Germain (PSG) yo mu Bufaransa, aho ijambo Visit Rwanda rigaragara ku mwambaro w’iyi kipe mu myitozo n’uwo yambara mbere y’imikino no kwamamaza ku kibuga Parc des Princes n’ibindi.

Nyuma imyaka itatu impande zombi zongeye kongera amasezerano y’ubufatanye kugeza mu mwaka wa 2025.

  • SHEMA IVAN
  • Ukuboza 21, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE