WAFCON2024: Ghana yatsinze Ikipe y’u Rwanda y’Abagore ibitego 7 ku busa

  • Imvaho Nshya
  • Nzeri 20, 2023
  • Hashize amezi 8
Image

Ikipe y’Igihugu  y’umupira w’amaguru y’Abagore (She-Amavubi) yatsizwe na Ghana ibitego birindwi ku busa mu mukino ubanza mu gushaka itike y’Igikombe cy’Afurika cy’Abagore (WAFCON 2024).

Uyu mukino wabereye kuri Kigali Pele Stadium, kuri uyu wa Gatatu tariki 20 Nzeri 2023.

Ikipe y’igihugu yatangiye nabi igice cya mbere irushwa cyane na Ghana, maze ku munota wa 2’ gusa Ghana ibona  igitego cya mbere cyatsizwe na Doris Boaduwaa ku mupira wavuye kuri koluneri.

Ghana yakomeje gusatira Amavubi cyane iciye ku mpande maze ku munota wa 13’ ibona igitego cya kabiri cyatsizwe na Evelyn Badu acenze Uwase Andersene n’umunyezamu Akimana Angeline.

Nyuma y’iminota mike Ghana yabonye igitego cya Gatatu cyatsizwe na Princella Adubea ku munota wa 27′.

Mbere y’uko igice cya mbere kirangira, Amavubi yahushije amahirwe ya mbere ku mupira Nibagwire Libelée yahinduye imbere y’izamu, Manizabayo Florence ntiyawuhamya neza n’umutwe, birangira ugiye  hanze.

Igice cya mbere cyarangiye Ghana itsinze Amavubi ibitego bitatu ku busa.

Mu gice cya kabiri ikipe y’igihugu yaje igerageza gusatira ariko gukora igikorwa cya nyuma cyo kureba mu izamu bikagorana.

Ku munota wa 53′, Kusi Alice yaboneye Ghana igitego cya Kane ku mupira bahinduye imbere y’izamu ba myugariro b’u Rwanda bananirwa kuwukoraho, atera mu izamu.

Ghana yakomeje gusatira, maze ku munota wa 64 ‘Evelyn Badu atsinda igitego cya gatanu cya Ghana ku ishoti rikomeye atereye hanze y’urubuga rw’amahina.

Abinyuma b’u Rwanda bakomeje guhagara nabi ku munota wa 74′.

Anasthesia Achiaa yatsindiye Ghana igitego cya Gatandatu ku mupira umunyezamu Ndakimana yananiwe gufata ngo awukomeze, uyu mukinnyi asongamo.

Habura iminota itanu ngo bongereho iminota y’inyongera, Ghana yaje kubona igitego cya Karindwi n’ubundi cyatsizwe na Anasthesia Achiaa ku mupira ahinduye imbere y’izamu wijyana mu nshundura.

Umukino warangiye Ikipe y’Igihugu ya Ghana inyagiye Amavubi y’u Rwanda ibitego 7-0 mu mukino ubanza mu yo gushaka itike y’Igikombe cya Afurika kizabera muri Morocco umwaka utaha muri 2024.

Nyuma y’umukino umutoza w’Amavubi Grace Nyinawumuntu yavuze ko abakinnyi b’u Rwanda bagize ubwoba bituma batsindwa birindwi.

Yagize ati: “Ibitego birindwi ni byinshi cyane, ntabwo twateganyaga ko badutsinda ibingana gutya ariko ni ukuri k’umupira, ikipe nka Ghana naje nziko ikomeye. Bafite abakobwa bajya kumera nk’abagabo. Abana bagize ubwoba kuva bari kwishyushya.”

Umukino wo kwishyura uteganyijwe tariki 26 Nzeri 2023 Accra muri Ghana.

SHEMA IVAN

  • Imvaho Nshya
  • Nzeri 20, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE