Victor Osimhen yegukanye igihembo cy’umukinnyi mwiza w’Umunyafurika ku nshuro ya mbere

  • SHEMA IVAN
  • Ukuboza 11, 2023
  • Hashize amezi 5
Image

Umunya Nigeria Victor Osimhen ukinira Napoli yo mu Butaliyani yegukanye igihembo cy’umukinnyi w’Umunyafurika mwiza w’umwaka wa 2023, gitangwa na CAF mu muhango wagaragayemo ibihangange byubatse ibigwi mu bihe bitandukanye mu mupira w’amaguru.

Uyu muhango wo guhemba abitwaye neza mu byiciro bitandukanye muri Afurika wabaye ku mugoroba wo kuri uyu wa Mbere tariki 11 Ukuboza 2023, munyubako ya Palais des Congrès I Marrakech mu gihugu cya Morocco.

Ni umuhango witabiriwe n’abanyacyubahiro batandukanye barimo Umuyobozi w’impuzamashyirahamwe y’umupira w’amaguru muri Afurika CAF, Patrice Motsepe n’abakinnyi bakanyujijeho nka Samuel Etto, Emmanuel Emenike n’abandi batandukanye.

Victor Osimhen yegukanye iki gihembo ku nshuro ya mbere yahize bagenzi be bari bahanganye kuri uyu mwanya barimo Mohammed Salah na Achraf Hakim.

Nyuma yo kucyegukana, uyu mukinnyi yagaragaje ibyishimo bidasazwe yashimiye buri wese wagize uruhare rukomeye mu iterambere rye.

Yagize ati: “Ndashimira buri muntu wese wagize uruhare mu iterambere rye by’umwihariko umukinnyi ndeberaho Didier Dorogba ndabashimiye mwese”.

Victor Osimhen yafashije Napoli kwegukana shampiyona, nyuma y’imyaka 33 atsinze ibitego 26 anaba umunyafurika umwe rukumbi wagaragaye mu bakinnyi 10 bahataniye Ballon d’or ya 2023 yegukanywe na Lionel Messi.

Igihugu cyatwaye iki gihembo inshuro nyinshi ni Cameroun imaze kukegukana inshuro 11, Côte d’Ivoire ifite umunani, Ghana ifite bitandatu na Nigeria ifite bitandatu.

Kugeza ubu abakinnyi begukanye iki gihembo inshuro nyinshi ni Yaya Touré wakiniye Manchester City wagihawe inshuro enye (2011, 2012, 2013 na 2014), Samuel Eto’o (2003, 2004, 2005 na 2010) naho El Hadji Diouf, Nwankwo Kanu na Didier Drogba, Mohammed Salah na Sadio Mane bagitwaye inshuro ebyiri buri umwe.

Ibindi bihembo byatanzwe

Umutoza w’umwaka mu bagabo yabaye Walid Regragui usanzwe atoza ikipe y’igihugu ya Morocco.

Walid Regragui utoza ikipe y’igihugu ya Morocco yabaye umutoza w’umwaka mu bagabo

Ni cyo gihugu kandi cyabaye ikipe y’umwaka nyuma yo kugera muri kimwe cya kabiri mu gikombe cy’Isi cya 2022, kiba igihugu cya mbere muri Afurika kigeze muri iki cyikiro muri iyi mikino, aho yasoje ku mwanya wa kane nyuma yo gutsindwa na Croatia ibitego 2-1 mu mukino wo guhatanira umwanya wa gatatu.

Nigeria yabaye ikipe y’igihugu y’umwaka mu bagore.

Umugore w’Umunyafurika w’umwaka yabaye Asisat Oshoala wo muri Nigeria wegukanye iki gihembo ku nshuro ya gatandatu.

Umukinnyi watsinze igitego cy’umwaka yabaye Mahmoud Abdelmenem ukinira AL Ahly yo mu Misiri.

Umutoza mwiza w’umwaka mu bagore yabaye Desiree Ellis utoza ikipe ya Afurika y’Epfo y’Abagore.

Desiree ELLis utoza ikipe y’igihugu y’Afurika y’Epfo yatowe nk’umutoza mwiza w’umwaka mu bagore

Umukinnyi ukiri muto utanga icyizere yagizwe umunya- Sénégal Lamine Camara ukinira Metz yo mu Bufaransa, mu gihe mu bagore yabaye umunya Morocco Nesryne El Chad.

Umukinnyi mwiza imbere muri Afurika yabaye umunyafurika y’Efo Percy Tau ukinira AL Ahly yo mu Misiri, mu gihe mu bagore yabaye umunya Morocco Fatima Tagnaout ukinira FAR Rabat yo muri Morocco.

Umuzamu mwiza w’umwaka mu bagabo yabaye Yassine Bounou naho mu bagore yabaye umunya Nigeria Chiamaka Nnadozie.

Ikipe yitwaye neza mu marushanwa y’umwaka ku makipe ( Clubs) yagizwe Al Ahly yo mu Misiri, mu gihe mu bagore yabaye Mamelodi sundowns yo muri Afurika y’Efo.

Abanya Nigeria bihariye ibihembo bikuru byatanzwe
  • SHEMA IVAN
  • Ukuboza 11, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE