Uwubakiye abaturage ivuriro ry’asaga miliyari  arasaba Leta umuhanda

  • Imvaho Nshya
  • Ukwakira 6, 2023
  • Hashize amezi 8
Image

Umushoramari w’Umunyarwanda witwa Bugabo Abdulkarim Musisi yishimira ko yakabije inzozi zo kwegereza abaturage bo mu Murenge wa Muyumbu Akarere ka Rwamagana, igikorwa remezo cy’ivuriro kibafasha kubonera serivisi z’ubuvuzi hafi baruhuka gusiragira bajya kwivuza mu Mujyi wa Kigali.

Umushinga wo kubaka iryo vuriro ryatangiye gutanga serivisi muri Nyakanga 2020 igihe u Rwanda n’Isi yose byari byugarijwe n’icyorezo cya COVID-19, witezweho kuzura neza utwaye amafaranga y’u Rwanda asaga miliyari imwe na miliyoni 100 z’amafaranga y’u Rwanda.

Mu bikorwa byo kubaka iryo vuriro ryitwa ‘Muyumbu Medical Center’ bigeze ku kigero cya 95%, Bugabo agaragaza impungenge ahuje n’abaturage bo mu Murenge wa Muyumbu zo kuba batagira umuhanda  ujyanye n’Igihe, bityo iryo vuriro n’ibindi bikorwa by’iterambere ntibigire agaciro kabyo.

Kuba ibikorwa remezo birimo imihanda igezweho ijyanye n’igihe itaratunganywa muri uyu Murenge ngo bibangamiye abahashora imari n’iterambere ry’abaturage, bakifuza ko bagira imihanda ikoze kuko byaba igisubizo cyiza.

Bugabo Abdulkarim Musisi na we avuga ko ari mu bashoramari bahura n’imbogamizi z’iyi mihanda ku babagana.

Yagize ati: “By’umwihariko nkatwe dufite serivisi z’ubuzima kugenda mu mihanda ihari uva kuri kaburimbo ntabwo byoroshye bitewe n’imihanda yangiritse ndetse kandi itagendeka. Turasaba ubuvugizi kuri iyi mihanda kuko birakenewe ko ikorwa, abaza kwivuza bakahagera mu buryo bworoshye.”

Uyu mushoramari akomeza avuga ko kubera imihanda mibi bituma abarwayi baza kuhivuriza bagira ibibazo bishobora no gutera imfu.

Ati: “Ntibyoroshye kuyigenderamo mu gihe imbangukiragutabara itwaye umurwayi urembye, umugore utwite cyangwa uri ku bise bishobora kuba byateza ibyago bishobora no kuvamo urupfu. Umurwayi warembye we murumva ko ahagera yazahaye”.

Iyi mihanda ibangamiye abaturage bo mu Murenge wa Muyumbu mu Karere ka Rwamagana

Kuri ubu ivuriro ‘Muyumbu Medical Center’ ryakira abarwayi bari hagati ya 20 na 30 ku munsi. Inyubako nshya nitangira gukorerwamo bizatuma bakira abari hagati 100-150, bazaba bafite ubushobozi bwo guha ibitaro abarwayi 15 ndetse banakire abashaka kuhabyarira.

Kugeza ubu rikoresha abakozi 15 bahoraho baziyongera niritangira gukorera mu nyubako yagutse izanatuma serivisi zirushaho kwiyongera.

Abaturage biteze impinduka mu kwegerezwa kaburimbo ku Muyumbu

Abandi baturage batuye cyangwa bakorera muri aka gace bemeza ko ikibazo cy’imihanda itameze neza gikomeje kubabera imbogamizi ku iterambere ryabo, bakifuza ko bafashwa bakubakirwa imihanda igwezweho kandi ijyanye n’igihe.

Kagabo Jean Claude utwara abantu ku ipikipiki muri aka gace, yagize ati: “Mu gihe cy’izuba tubura abagenzi dutwara kubera ivumbi cyangwa natwe tukinubira kujya aho bashaka. Mu gihe cy’imvura ibyondo n’imikuku byangiza moto zacu ugasanga turahora tuzikoresha.”

Ibi kandi bishimangirwa na Manzi John uhatuye kuva muri 2000 akaba ajyana imbuto n’imboga mu isoko rya Kabuga. Yagize ati: “Hajemo kaburimbo byadufasha kuko maze igihe kinini nkorera muri uyu muhanda ariko kubera ko uhora wangirika bagasana ariko ntibitange igisubizo kirambye twifuza ko baduha kaburimbo.”

Umuyobozi w’Akarere ka Rwamagana Mbonyumuvunyi Radjab, yavuze ko ubusabe bw’abaturage bwo kubakirwa ibikorwa remezo birimo imihanda buzasubizwa mu gihe cya vuba kuko hari gukorwa inyigo y’imihanda.

Yagize ati: “Inyigo yo gukora imihanda igezweho ya kaburimbo muri uyu Murenge iri gukorwa n’Akarere irimo kurangira, kandi biri mu igenamigambi rya vuba. Ni imwe mu mihanda twizera ko niba yarangiye ibibazo by’ivumbi n’ibindi bizaba byarangiye.”

Indi mihanda abaturage bifuza gukorerwa ikaba irimo gukorerwa inyigo n’Akarere ka Rwamagana, ni umuhanda uva Rugende ukanyura ku Muyumbu, Nyakariro ukagera i Karenge ndetse inyigo ikaba iri kurangira. Hakaba n’undi uzajya ku kibuga mpuzamahanga cy’indege cya Bugesera.

Bugabo Abdulkarim Musisi, n’abaturage bo ku Muyumbu barasaba Leta umuhanda wa kaburimbo

NSHIMIYIMANA FAUSTIN

  • Imvaho Nshya
  • Ukwakira 6, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE