UTB yahaye impanuro abakozi bagiye kwerekeza muri Qatar

  • NTAWITONDA JEAN CLAUDE
  • Gicurasi 15, 2022
  • Hashize imyaka 2
Image

Ubuyobozi bwa Kaminuza y’Ubukerarugendo n’ikoranabuhanga (UTB) bwahaye impanuro abakozi basaga 80 barangirije amasomo muri iyo kaminuza, ni mbere yuko berekeza mu gihugu cya Qatar aho bagiye gukorera.

Ni nyuma y’amasezerano yasinyinywe hagati y’ubuyobozi bwa UTB n’ikigo kitwa ‘Inspire Management Training Center of Qatar’, asinyirwa muri Ambasade y’u Rwanda muri Qatar.

Aya masezerano azatuma iki kigo kizajya gikurikirana imibereho y’Abanyarwanda bazajyayo no kwita ku bibazo bahura na byo.

UTB ivuga ko yiyemeje kujya ifasha abarangije kwiga ibirebana no kwakira abashyitsi, gutegura ibirori n’ubukerarugendo, kwimenyerereza muri Qatar umwuga no gukorerayo.

Bamwe mu bakozi bagiye kwerekeza muri Qatar batangaje ko bishimiye aya mahirwe babonye, banashimira UTB uruhare yabigizemo bizeza ko batazayitenguha ndetse n’igihugu cyabahaye amahirwe yo kujya gukorera mu mahanga.

Dukundane Iddy umwe mu banyeshuri bagiye kujya mu gihugu cya Qatar, yishimira kuba umwe mu bagiye gukorera muri Qatar.

Avuga ko igihe cyose azakorera muri Qatar azakora nk’umunyarwanda agahesha ishema igihugu cye ariko akanashimira Kaminuza y’Ubukerarugendo UTB yamuhaye amahirwe yo kuyigiramo.

Ati: “Nshimira ubuyobozi bwa Kaminuza n’umubano w’ibihugu byombi, u Rwanda na Qatar, nkaba nizeye ko hari icyo nzungukira mu bumenyi mvanye muri UTB”.

Ukwishaka Emmanuel na we avuga ko yishimye cyane akavuga ko Qatar ari igihugu cyiza cyateye imbere.

Ati: “Ndumva nziteza imbere kandi nzagaragaza igihugu cyane nk’u Rwanda muri rusange, tuzakomeza dusenge tugere kuri byinshi.

Ndabasezeranya kuzaba inyangamugayo, nzabera umuranga (Ambassadeur) igihugu cyanjye, nzakora ibishoboka byose kugira ngo ntagayisha igihugu cyanjye”.

Abakozi bagiye kwerekeza muri Qatar nyuma yo guhabwa impanuro bishimiye amahirwe igihugu cyabahaye ndetse na Kaminuza ya UTB

Cyakwera Justine umwe mu bagiye kujya muri Qatar avuga ko aya ari amahirwe atapfaga guteganya agahigira kutazagayisha ubuyobozi bwa Kaminuza UTB ndetse n’u Rwanda.

Yagize ati: “Nzitwara nk’umwana w’umunyarwanda mpesha ishema igihugu cyanjye, mpeshe ishema ikigo nturutseho niyubahe nk’umukobwa”.

Mukarubega Zulfat washinze Kaminuza ya UTB yasabye abanyeshuri kumva ko bahagarariye igihugu na Kaminuza bavuyemo no kuzagumana indangagaciro z’ubunyarwanda.

Ati: “Turababwira ko bagomba kuzagenda bumva ko ari abaranga (Ambassadeurs) b’u Rwanda batekereza ko boherejwe n’Igihugu.

Be kumva ko bazagenda bakifata uko babonye cyane cyane ko bagomba kugaragaza isura nziza y’igihugu”.

Abasaba gukora neza bityo n’ababakoresha nibashaka abakozi bazajye batekereza ku Rwanda mbere yuko bajya gushakira abakozi ahandi.

Ati: “Icyo tubasaba ni ukuzakomeza indangagaciro z’u Rwanda ikindi bakagirana inama”.

Abasaba kandi kwizigamira amafaranga, bakazava hariya baganiriye ku nama y’imishinga bazakora bagarutse mu Rwanda.

Ubuyobozi bwa UTB busobanura ko abakozi bagiye kujya muri Qatar baba bahawe amafaranga y’urugendo , bakabaha aho baba, bakabatunga ndetse ngo  bakabaha n’ay’urugendo abageza ku kazi.

Amakuru Imvaho Nshya yamenye nuko Kaminuza ya UTB izohereza muri Qatar abanyeshuri babarirwa hagati ya 500 na 700.

Ngo ni ku mpamvu zuko Qatar izakenera abakozi benshi mu kwakira abashyitsi bazagenderera icyo gihugu mu kwakira imikino mpuzamahanga harimo amarushanwa y’umupira w’amaguru azahuza ibihugu by’Abarabu, amarushanwa y’umupira w’amaguru uzahura ibihugu bya Asia hamwe n’igikombe cy’Isi.

Ashish Mishra umuyobozi mukuru wa Inspire Management Training Center of Qatar yasinyanye amasezerano na UTB ku bijyanye n’imikoranire yo gushakira abanyarwanda akazi ko gukora mu mahoteli n’indi mirimo, yasezeranije abagiye kugenda ko bazababa hafi.

Yagize ati: “Nzaba mpari kugira ngo mbiteho, igikomeye cyane bagomba kumva yuko bifitiye icyizere bo ubwabo mbere na mbere kandi bakumva ko bafite imbaraga zo gukora kano kazi neza”.

Abasaba kwita ku mwuga wabo. Ati: “Aba bose batoranijwe ndabifuriza amahirwe masa kandi ndizera ko bazabikora neza”.

Kaminuza ya UTB yatangiye mu mwaka wa 2008 yigisha iby’amahoteli n’ubukerarugendo ariko ubu ikaba ifite amashami atandukanye mu ikoranabuhanga n’ubucuruzi.

Ifite amashami abiri, rimwe riri i Rubavu na ho irindi riherereye mu Mujyi wa Kigali mu karere ka Kicukiro ari na ho hari icyicaro gikuru cy’iyi kaminuza.

Abakozi basaga 80 bagiye kwerekeza muri Qatar
Ashish Mishra umuyobozi mukuru wa Inspire Management Training Center of Qatar yijeje ko azababa hafi
Mukarubega Zulfat yasabye abakozi bohereje muri Qatar yabasabye kurangwa n’indangagaciro z’abanyarwanda
  • NTAWITONDA JEAN CLAUDE
  • Gicurasi 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE