USA: Abimukira 46 basanzwe mu ikamyo bapfuye, 16 bari mu bitaro

  • NTAWITONDA JEAN CLAUDE
  • Kamena 28, 2022
  • Hashize imyaka 2
Image

Imirambo y’abimukira 46 bikekwa ko bambutse umupaka wa Mexique banyuze mu nzira zinyuranyijwe n’amategeko, basanzwe barapfiriye mu ikontineri y’ikamyo yasizwe ahegereye Umujyi wa San Antonio i Texas muri Leta Zunze Ubumwe z’Amerika (USA).

Iyo mibiri yabonetse ku wa Mbere taliki ya 27 Kamena 2022.  Ni inkuru imwe mu ziteye ubwoba zibaye ku bimukira baca inzira z’ubusamo bagerageza kwambuka cyane cyane imipaka yo mu majyepfo ya USA.

Ikinyamakuru France 24 cyatangaje ko hari abandi bimukira 16, barimo abana bane, basanzwe batarashiramo umwuka bari hafi kwicwa n’inzara n’umwuma bajyanywe mu bitaro.  

Amakamyo ameze nk’iyatahuwe yarasizwe mu bilometero 240 uvuye ku mupaka wa Mexique, agize bumwe mu buryo bw’ubwikorezi bukoreshwa n’abimukira bifuza kwinjira muri Leta Zunze Ubumwe z’Amerika. Ingendo nk’izo ziteza ibyago byinshi kuko nta mwuka mwiza winjira muri izo kontineri z’amakamyo bacucikwamo.

Kubera ubushyuhe n’inzara birangira bamwe bishwe n’umwuma; umwe mu batabaye bavuganye n’itangazamakuru yagize ati: “Abo twasanze bakiri bazima bari bumagaye kandi bafite ubushye, imibiri yabo yatwitswe n’ubushyuhe bwinshi bwabaciye intege. Nta n’ahantu twigeze tubona ko babaga bitwaje amazi mu modoka.”

Televiziyo zitandukanye zikorera i San Antonio, ku wa Mbere zatangaje amashusho y’uburyo iyo mibiri yatahuwe n’uburyo yatwawe n’imodoka nyinshi za polisi zahise zihutira gutabara.  

Umuyobozi wa Polisi ya San Antonio yavuze ko abantu batatu bahise batabwa muri yombi bakekwaho kugira uruhare muri icyo kibazo.

Guverineri wa Texas Greg Abbott, yashinje Perezida wa USA Joe Biden, kuba ari we ntandaro y’ibyo byago bikomeje kugwirira abimukira binjira mu Gihugu.

Yagize ati: “Ababuze ubuzima bakwiye gushyirwa ku mutwe wa Biden. Ni umusaruro wa Politiki ye y’ubwicanyi yo kugumya kureka imipaka ifunguye.”

Minisitiri w’Ububanyi n’Amahanga wa Mexique Marcelo Ebrard, yashenguwe n’iyo nkuru y’incamugongo asaba uhagarariye inyungu z’igihugu cye muri Texas gukurikirana iby’iyo mirambo nubwo hataramenyekana inkomoko yayo neza.

Bivugwa ko abimukira banyura mu nzira zinyuranyije n’amategeko barushijeho kwiyongera nyuma y’itorwa rya Biden, nubwo ku bufatanye na Visi Perezida Kamala Harris bakomeje kugaragaza umuhate mu guhagarika urujya n’uruza rw’abimukira.  

  • NTAWITONDA JEAN CLAUDE
  • Kamena 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE