Uruzitiro rwa Pariki y’Akagera rwagabanyije kubangamirana n’inyamanswa

  • NSHIMIYIMANA FAUSTIN
  • Mutarama 3, 2024
  • Hashize amezi 5
Image

Bamwe mu baturage baturiye Pariki y’Igihugu y’Akagera mu Ntara y’Iburasirazuba, bavuga ko kuba yarazitiwe byatumye batekana kuko nta nyamanswa zikibasanga mu rugo cyangwa ngo zibangirize imyaka ndetse no kubambura ubuzima.

Mu mwaka wa 2013 ni bwo Leta y’u Rwanda yubatse uruzitiro rwa Pariki y’Igihugu y’Akagera, rukaba rukora ku Turere tutatu ari two Kayonza ifite irembo binjiriraho, i Gatsibo na Nyagatare.  

Uru ruzitiro rwuzuye rutwaye amafaranga y’u Rwanda angana na miliyari ebyiri. Uru ruzitiro kandi rwubatse ku ntera ya kilometero 120 ku gice cy’iyi Pariki cyegereye abaturage.

Uruzitiro rwubatse rurimo umuriro w’amashanyarazi, bifasha gukumira inyamanswa zishaka kuhegera no kururenga ngo zijye mu baturage ndetse no gukumira ba rushimusi bashobora kujya muri Pariki y’Igihugu y’Akagera binyuranyije n’amategeko.

Bamwe mu baturage baturiye Pariki bavuga ko kuva uruzitiro rwajyaho batagihohoterwa n’inyamanswa zivuye cyangwa ngo zibonere imyaka, bahinga no kubavutsa ubuzima ahubwo basigaye bakora imirimo yabo nta komyi kubera ko baba bizeye umutekano.

Kagabo Faustin utuye mu Kagari ka Cyarubare Umurenge wa Kabare, yagize ati: “Hatarajyaho uruzitiro twabaga turi gutambuka hafi ya Pariki tujyanye amata, ibitoki, ibirayi n’ibindi i Kageyo, tugasanga imbogo ziri kurisha cyangwa ziryamye hafi y’umuhanda tunyuramo zikadusimbukana hakabamo abo zishe cyangwa zikomerekeje, ariko ubu dufite umutekano nta kibazo kuko uruzitiro rwaradufashije cyane.”

Ibi bishimangirwa na Mukamurara Jovia utuye mu Kagari ka Mukoyoyo, yagize ati: “Mbere hatarajyaho uruzitiro nta muntu wasaruraga atonewe n’imvubu, imbogo, inzovu n’izindi nyamaswa ugasanga dusarura duke. Ariko ubu turishimira ko uruzitiro rwahagaritse izi nyamanswa kandi hari impinduka zigaragara kuko duhinga tuzi ko dutekanye kandi tuzasarura.”

Umuyobozi wungirije ushinzwe ubukerarugendo muri Pariki y’Akagera, Karinganire Jean Paul, yavuze ko uruzitiro rwubatswe rworoheje uburyo bwo kubungabunga inyamanswa ziyirimo byabaye n’igisubizo ku gukumira ba rushimusi.

Yagize ati: “Iyo hatabaho uruzitiro ba rushimusi bari kuba barazishe barazimaze kubera ko bari bamaze kuba benshi muri Pariki kandi bazica umunsi ku wundi, tukabona zigabanyuka. Iyo zasohokaga Pariki zaraboneraga ugasanga intare zirarya amatungo yabo umunsi ku munsi.

Ubu ku mpande zombi habayeho umutekano kuko ba rushimusi ntibakibasha kwinjira muri Pariki kandi n’inyamanswa ntizikibasha kujya mu baturage ngo zibonere cyangwa zibarire amatungo no kuba zabagirira nabi. Ibi byatumye ku mpande zombi habaho umutekano natwe tubasha gukora duteza imbere ubukerarugendo twitonze.”

Buri mwaka abaturiye Pariki y’Igihugu y’Akagera basaranganywa 10% by’inyungu iba yabonetse muri Pariki binyuze mu kubakirwa ibikorwa remezo, guteza imbere abatishoboye, amakoperative n’ibindi bikorwa biteza imbere abaturage.

Umuyobozi w’Akarere ka Kayonza Nyemazi John Bosco, avuga ko kubungabunga Pariki bigira umumaro kuko inyungu yinjije zihabwa Akarere hagamijwe gufasha imishinga y’abaturage no kubaka ibikorwa remezo bibateza imbere ndetse asaba abaturage kurinda ba rushimusi.

Yagize ati: “Inyungu zinjiye ku madovize aba yatanzwe ku bikorwa by’ubukerarugendo muri Pariki 10%, by’uwo musaruro bihabwa ubuyobozi bw’Akarere. Akarere gatoranya abaturage batishoboye bagafashwa, gushyigikira imishinga y’amakoperative n’ibindi bikorwa biteza imbere abaturage. Ni ibikorwa byiza kandi bifitiye abaturage inyungu.

Icyo dusaba abaturage ni uko badufasha mu kurinda ba rushimusi ndetse bakareka kwangiza ibikorwa bibangamira inyamanswa ba mukerarugenda baza gusura.”

Abaturage bagera ku 400,000 ni bo baturiye Pariki y’Akagera muri kilometero 10 mu nkengero zayo, abenshi muri bo bakaba bakora ubuhinzi n’ubworozi bukorerwa hafi ya Pariki.

Pariki y’Igihugu y’Akagera iri ku buso bwa kilometero kare 1120 (1120 Km²), irimo inyamanswa zirimo intare, imbogo, imvubu, inkura n’izindi.

Akarere ka Kayonza gatangaza ko mu mwaka wa 2021/2022 bahawe miliyoni 341 z’amafaranga y’u Rwanda na Pariki y’Akagera, mu mwaka wa 2022/2023 bahabwa miliyoni 540 Frw, ndetse ubu hakaba hari imishinga 12 mu Mirenge itandatu ikora kuri Pariki.

Iyo mishanga irimo kubaka ikusanyirizo ry’amata rya Murundi, isoko rito rya Buhabwa, imodoka igemura amata izahabwa Umurenge wa Gahini na Mwili, imashini zitunganya umusaruro w’urusenda zizahabwa amakoperative,  umuriro uzahabwa abaturage n’ibindi bikorwa bitandukanye binyuze mu bufatanye na Pariki.

  • NSHIMIYIMANA FAUSTIN
  • Mutarama 3, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE