Uruganda rwa Gazi Methane rw’i Nyamyumba rwongereye u Rwanda ingufu

  • NTAWITONDA JEAN CLAUDE
  • Gashyantare 14, 2024
  • Hashize amezi 2
Image

Uruganda rutunganya ingufu z’amashanyarazi aturuka kuri Gaze Methane rwari rumaze imyaka ine rwubakwa n’Ikigo Shema Power Lake Kivu Limited (SPLK Ltd) mu Murenge wa Nyamyumba, Akarere ka Rubavu, rwamaze gutangizwa ku mugaragaro aho rwongereye Megawatt 56 ku muyoboro mugari w’Igihugu.

Ubuyobozi bw’icyi kigo bwamaze kwemeza ko urwo ruganda rwuzuye rutware miliyoni zisaga 200, ni ukuvuga miliyari 254 z’amafaranga y’u Rwanda ugendeye ku giciro cy’ivunjisha kiriho uyu munsi.

Buvuga ko iyo gahunda yo gufasha u Rwanda kugera ku ntego yo kongera ingufu z’amashanyarazi yagezweho hifashishijwe ikoranabuhanga rya moteri zigezweho zitunganya gaze (gensets).

Kuri ubu urwo ruganda rufite moteri 19 zakozwe n’Ikigo MWM zo mu bwoko bwa TCG 2032B V16, zagize uwo mushinga umwe mu mishinga y’agahebuzo ku Isi, ihindura ibyago bya Gaze Methane amahirwe ahindura imibereho n’iterambere ry’Igihugu.

Biteganyijwe ko urwo ruganda ruzakoresha ingano nini cyane ya gaze methane yo mu Kiyaga cya Kivu mu gutanga ingufu zikenewe mu Gihugu.

Ibyo bigerwaho gazi iri mu ndiba y’Ikiyaga cya Kivu izamurwa mu bikorwa remezo byubatswe hejuru y’Ikiyaga cya Kivu mbere yo kugeza izo ngufu mu miyoboro ya kilometero 17 igera ku nkengero z’Ikiyaga ahubatswe uruganda ruyihinduramo ingufu z’amashanyarazi yahujwe n’umuyoboro mugari w’Igihugu.

Ubwo buryo butuma urwo ruganda rwongera MW  56 z’umuriro w’amashanyarazi ku muyoboro mugari w’Igihugu muri MW 76 rushobora gutunganya kuko andi mashanyarazi yifashishwa mu gukoresha urwo ruganda.

SPLK Ltd yizeye gutanga umusanzu urambye mu gukwiza amashanyarazi adacikagurika mu Banyarwanda mu gihe kirambye.

Alexis Kabuto, Umuyobozi Mukuru wa SPLK Ltd, yagize ati: “Twahisemo gukoresha moteri za MWM TCG 2032B V16 kugira ngo twihutishe kubaka uruganda rutanga MW56 bitewe n’umusaruro mwiza twazibonyeho mu cyiciro cy’igerageza. Imikorere ihambaye y’izo moteri yarenze ibyo twari twiteze mu bikorwa byacu.”

Ubu ni bwo bwoko bwa moteri zatangiye gukoreshwa mu gucukura gaz methane mu Kiyaga cya Kivu

Bivugwa ko ubwo bwoko bwa moteri bwakoreshejwe muri uwo mushinga zisanzwe zizwiho kuba zidatenguha abazikoresha, kandi zigabanya ikiguzi cy’imikorere yazo ndetse zigatanga umusaruro wo ku rwego ruhanitse.

Izo moteri bivugwa ko zifite ubushobozi bwo gutuma urwo ruganda rugira ubushobozi bwo gutunganya MW 100. Kugeza ubu ku Isi hose hamaze gushyirwa izo moteri 450 mu myaka 10 ishize, zikaba zitunganya nibura Gigawatt 1.8 z’amashanyarazi.

Gil Vodermayer, Umuyobozi Mukuru ushinzwe Ubucuruzi mu Kigo MWM gitunganya izo moteri, yavuze ko banyuzwe no kuba SPLK irimo gukoresha izo moteri zigezweho muri uyu mushinga.

Yavuze kandi ko ikigo MWM cyohereje abakozi bacyo mu ruganda rw’i Nyamyumba kugira ngo batange ubufasha bwa tekiniki mu gukoresha izo moteri.  

Ati: “Gutunganya Gaze Methane bizaha u Rwanda isoko irambye y’amashanyarazi azacanira u Rwanda mu binyejana biri imbere. Uyu mushinga ni urugero rwiza rw’uburyo moteri zacu zitanga ingufu zegereye abaturage kandi zizewe ku bakiriya bacu bose ku Isi.”

Ubuyobozi bw’Ikigo cy’Igihugu cy’Ingufu (REG) buahimangira ko uyu mushinga utanze umusanzu ufatika mu rugendo rwo gutunganya nibura Megawatt 556 bitarenze muri uyu mwaka wa 2024, zivuye kuri MW 224.6 mu myaka ine ishize.

  • NTAWITONDA JEAN CLAUDE
  • Gashyantare 14, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE