Urugaga rw’abakora imirimo ishingiye ku buvuzi rushobora gufatira ibihano umuganga wakoze ibyaha

  • Imvaho Nshya
  • Ukwakira 30, 2023
  • Hashize amezi 4
Image

Urugaga rw’Abakora Imirimo Ishingiye ku buvuzi (RAHPC) rushyirwaho n’itegeko rukaba rukorera munsi ya Minsiteri y’Ubuzima. Ibi biruha ububasha bwo guhagarika umuganga witwaye nabi mu kazi bikaviramo umurwayi kuhatakariza ubuzima.

Byagarutsweho na Gasherebuka Jean Damascène, Umuyobozi Mukuru wa RAHPC, mu kiganiro cyihariye yahaye Imvaho Nshya mu mpera z’Icyumweru, ubwo hizihizwaga isabukuru y’imyaka 10 Urugaga rumaze rukora.

Gasherebuka avuga ko Urugaga rufite ububasha bwo gufatira igihano umuganga wakoze ibyaha nko kumuhagarika mu ghihe runaka iyo habayeho iperereza.

Ati “Iyo dusanze harimo uburangare cyangwa ukutamenya hashobora gufatwa ibihano.
Muri ibyo bihano harimo guhagarikwa mu gihe rukana, iyo bibaye ibintu bikomeye hari ubwo akurwa ku rutonde rw’abakora uwo mwuga, icyo gihano na cyo kibamo”.

Umuganga wateje urupfu rw’umuntu biturutse ku bushake cyangwa ku burangare cyangwa akagenda agata umurwayi ku kazi, hari ubwo uwonguwo yahagarikwa burundu kimwe n’abafite ibyangombwa byarangira bagashaka ibihimbano abo bose bahanwa kimwe.

Urugaga kuba rwaragiyeho rugashobora kugenzura abanyamwuga no gushyira ku murongo abakora umwuga ushamikiye ku buvuzi, bituma abakora ari abafite ibyangombwa kandi babyemerewe kuko ngo byose bigamije kurengera umurwayi ubagana.

Mu myaka 10 Urugaga RAHPC rumaze rubayeho rwashoboye gukorana n’ibindi bigo byo mu Rwanda ndetse n’ibyo mu mahanga bityo babasha kwigiranaho no guteza imbere Urwego rw’ubuzima kubera ko abanyamwuga bagira uruhare runini mu rwego rw’ubuzima.

Yagize ati “Ni ukuvuga ngo RAHPC igendera ku mategeko ya Leta. Iyo hari ikitagenze neza mu bitaro n’umurwayi ashobora kuza akaturegera tugakurikirana tukareba ko yarenganye.

Dukorana n’amashuri kugira ngo tugenzure niba abo bantu bagiye kwiga iyo myuga koko ari abantu babifitiye uburenganzira kandi bashobora kuba babikora, ni uko tugenda dukorana n’izo nzego zose z’ubuzima.

Imbogamizi Urugaga rugihura na zo ngo ni uko hari abantu bize hanze ku buryo iyo baje mu Rwanda rimwe na rimwe bibananira kumenya neza niba barize cyangwa batarize ku buryo bashobora kuzana dipolome bikagorana.

Ariko kuko baba bagomba gukora ikizamini, icyo ni cyo gituma Urugaga rwizera ko ugitsinze haba hari ibyo azi ariko n’abantu bashobora kugenda bakazigura hanze.
Ikindi ngo hari ababa badafite ibyangombwa bakiyitirira umwuga bakabeshya abaturage y’uko barimo kubavura kandi batarabyize.

Gasherebuka Jean Damascène, Umuyobozi Mukuru wa RAHPC

Akomeza agira ati “Abo barahari ku mateleviziyo usanga bahamagarira kujya kwivurizayo, bakiyitirira imyuga kandi atari byo. Usanga ari ibibazo bishobora kuba byagira ingaruka ku baturage.

Abo na bo tuba dufite uburenganzira bwo kubakurikirana bagahagarikwa kugira ngo be gukomeza kwangiza ubuzima bw’abantu”.

Icyerekezo cya RAHPC, Gasherebuka yabwiye Imvaho Nshya ko kugira ngo habeho ubuvuzi bwiza kandi buzira inenge, ari uko bwaba butangwa n’abantu babyigiye kandi babishoboye.

Impungenge zikigaragara, ngo ni uko hari abakoresha benshi bakoresha abantu batiyandikishije kugira ngo babahembe amafaranga make, uwo rero iyo afashwe arahanwa kuko ntabwo hahanwa umukozi ahubwo ngo n’umukoresha ukoresha umuntu udafite ibyangombwa, itegeko na we riramuhana.

Basanga ubuvuzi bukorwa muri Leta no mu bigo byigenga bwagombye gukorwa n’abantu babyize kandi babizobereye.

Ubuyobozi bwa RAHPC buvuga ko mu bigo byigenga bitanga ubuvuzi, ko ariho usanga ibibazo, nka Minisiteri y’Ubuzima ngo yari ikwiriye gushyira hamwe ingaga nazo zikajya zikorana na Minisiteri y’Ubuzima mu gutanga ibyangombwa.

Ati: “Abigenga nibumva ngo Urugaga rugira uruhare mu gutanga ibyangombwa, ntabwo umuganga azajya yikorera ibyo ashatse kuko azajya aba afite uburenganzira bwo kuba yavura”.

KAYITARE JEAN PAUL

  • Imvaho Nshya
  • Ukwakira 30, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE