Urugaga rw’Abahanga mu by’Imiti rwagaragaje icyuho kiri mu buvuzi

  • NTAWITONDA JEAN CLAUDE
  • Gicurasi 19, 2022
  • Hashize imyaka 2
Image

Ubuyobozi bw’Urugaga rw’Abahanga mu by’Imiti (National Pharmacy Council ‘NPC’) rwagaragaje icyuho kikigaragara mu buvuzi bituma butangiza ubukangurambaga bwo gushishikariza abanyeshuri biga ibinyabuzima n’ubutabire kuziga ibijyanye n’imiti (Pharmacy) kugira ngo u Rwanda rwitegure hakiri kare icyerekezo 2050.

Nsengeyukuri Jean Damascene, Umunyamabanga Uhoraho akaba n’umwanditsi w’urugaga rw’abahanga mu by’imiti (Pharmacists) avuga ko mu Rwanda hakiri icyuho cy’abahanga mu by’imiti.

Yabigarutseho ku gicamunsi cyo kuri uyu wa Gatatu taliki 18 Gicurasi 2022, ubwo NPC yaganiraga n’abanyeshuri biga mu ishuri rya Lyée de Kigali riherereye mu karere ka Nyarugenge mu Mujyi wa Kigali.

Yagize ati: “Dufite abahanga mu by’imiti nibura bafite icyiciro cya kabiri cya kaminuza 1,136 abafite icyiciro cya A1, dufite 12 bonyine.

Ni abantu bake mu bigaragara: “Bitewe n’inshingano z’abahanga mu by’imiti, bitewe n’ibyo igihugu kibakeneyeho ndetse na serivisi batanga”.

Mu gukemura iki kibazo k’ibura ry’abahanga mu by’imiti asobanura ko bahisemo guhera ku bana batoya bikaborohereza kuzinjira muri kaminuza bujuje ibisabwa.

Agaragaza imbogamizi zagiye zigaragara mu rwego rw’ubuzima, aho mbere umuntu yajyaga kwiga umwuga w’ubuvuzi atujuje ibisabwa harimo bwa bumenyi bw’ibanze akwiriye kuba afite.

Hasobanurwa ko mu bumenyi bw’ibanze agomba kuba afite, harimo kuba yarize ibinyabuzima n’ubutabire mu mashuri yisumbuye (Biologie na Chimie) ndetse afite nibura inyuguti ya “C” muri ayo masomo kubashaka kwiga icyiciro cya kabiri cya kaminuza.

Aya mabwiriza yagiyeho muri 2021 ku bufatanye bwa Minisiteri y’ubuzima, Urwego rw’Igihugu rushinzwe amashuri makuru na kaminuza (HEC) ndetse n’ingaga zireberera abize iby’ubuzima mu rwego rwo kugira abakora mu buvuzi bashoboye.

Intego nyamukuru y’Urugaga rw’Abahanga mu by’imiti ni ukurinda ubuzima bw’abaturage.

Nsengeyukuri yagize ati: “Ntitwarinda ubuzima bw’Abanyarwanda tudafite abakozi babifitiye ubushobozi, babihuguriwe, cyangwa ngo babe bafite ubumenyi buhagije”.

Isimbi Carla wiga amasomo ajyanye n’ubutabire, ubugenge, n’ibinyabuzima muri Lycée de Kigali avuga ko icyo yungutse atari uko umuntu yakwiga ubuvuzi gusa ahubwo ko n’amasomo y’iby’imiti (Pharmacie) afite icyo yamarira uwayize.

Ati: “Icyo nshoboye kumenya ni uko pharmacie atari ukujya kugurisha imiti gusa ahubwo idufasha no kumenya ibijyane no gukora imiti”.

Yavuze ko kugira ngo ashobore kwiga pharmacie muri kaminuza bimusaba gukora cyane akagira amanota ahagije ndetse n’ikinyabupfura.

Ndayishimiye Olivier, na we wiga muri Lycée de Kigali mu mwaka wa Kane mu masomo ajyanye n’ubutabire, ibinyabuzima n’ubugenge, avuga ko ikimushimishije ari uko yahise afata umwanzuro wo kuziga pharmacie.

Ati: “Ntabwo nari mfite inzozi zo kuziga ibijyanye na pharmacie ariko aho mbimenyeye ndishimye kuko nungutse ko abize ibijyanye n’iby’imiti baba ari abakire.

Nyuma y’ibiganiro twahawe nahise numva nzakurikira amasomo ya pharmacie”.

Icyerekezo 2050 cy’u Rwanda ni uko ruzaba ari igicumbi cy’ubukerarugendo bushingiye ku buvuzi, ubushakashatsi mu rwego rw’ubuzima n’inganda zikora imiti. Kuri ubu, u Rwanda ruri kwitegura gukora imiti ndetse n’inkingo.

Nsengeyukuri Jean Damascene, Umunyamabanga Uhoraho mu Rugaga rw’Abahanga mu by’imiti, yagaragaje icyuho kiri muri uyu mwuga (Foto Kayitare J.P)
Abanyeshuri bo muri Lycee de Kigali bagaragarijwe amahirwe n’ibisabwa kugira ngo bazajye muri uyu mwuga bawukunze (Foto Kayitare J.P)
  • NTAWITONDA JEAN CLAUDE
  • Gicurasi 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE