Urubyiruko Sadate yahaye akazi mu biruhuko rurabyinira ku rukoma

  • Imvaho Nshya
  • Kanama 17, 2023
  • Hashize amezi 10
Image

Rumwe mu rubyiruko rumaze iminsi 30 rwimenyereza umwuga muri Sosiyete y’ubwubatsi bw’imihanda, Karame Rwanda Ltd, rwabwiye Imvaho Nshya ko rwungukiye ubumenyi muri aya mahugurwa ariko runahakura ishimwe.

Ni nyuma y’aho ubuyobozi bw’iyi Sosiyete butanze itangazo rihamagarira urubyiruko rushaka akazi ko mu biruhuko, kwiyandikisha binyuze ku mbuga nkoranyambaga.

Izibyose Nadine, urangije amasomo y’ubwubatsi bw’imihanda ku ishuri rya St. Joseph mu Karere ka Kicukiro, yahamirije Imvaho Nshya ko amahugurwa yamufashije.

Yagize ati: “Amahugurwa yaramfashije cyane kuko yanyongereye ubunararibonye. Ku ishuri narabyigaga ariko ibyo nize ubu nabishyiraga mu ngiro kandi narabimenye”.

Akomeza avuga ko bahawe ubumenyi kandi bakanagenerwa amafaranga y’urugendo. Ati: “Badukoreye ibintu byiza”.

Nshimiyimana Eric, waturutse mu Karere ka Nyamagabe mu Murenge wa Kitabi, na we ahamya ko yiyungura ubumenyi mu mahugurwa yahawe na Sosiyete Karame Rwanda Ltd.

Yagize ati: “Ariya mahugurwa yadufashije kongera ubumenyi, gutinyuka igihe ari wowe uyoboye abantu, kubana n’abandi no mu gihe habaye ikibazo mu bakozi ukamenya kugikemura ntawe ubangamiye”.

Agaragaza ko yamusigiye ubunararibonye bwo kuyobora abantu. Kuba yiga uburezi ariko agahitamo kwimenyereza umwuga mu kigo gikora imirimo y’Ubwubatsi, hari icyo bivuze kandi bizamugirira akamaro.

Ati: “Impamvu nabigiyemo biriya bintu, niga uburezi kwigisha. Byatumye niyo najya mu ishuri menya uko natwaramo abanyeshuri nuko nafasha buri wese.

Amahugurwa yamfashije gutinyuka mu gihe naba ngeze mu bantu benshi. Ninjya mu imenyerezamwuga (Stage) ntibizangora kuko narimaze kumenya kuyobora abantu”.

Nshimiyimana avuga ko yayoboraga abakozi, aho bagize ikibazo akaba ari we ubafasha. Amahugurwa arangiye ngo babwiwe ko hari ishimwe bagenewe ko atari igihembo.

Imvaho Nshya yashoboye kumenya ko mu gihe cy’iminsi 30, urubyiruko rwari mu mahugurwa rwahawe amafaranga ibihumbi ijana (100,000Frw).

Munyakazi Sadate, Umuyobozi wa Karame Rwanda Ltd, abinyujije kuri Twitter yatangaje ko iminsi 30 bamaze bari kumwe n’urubyiruko 15 rwahawe akazi ko mubiruhuko irangiye.

Yagize ati: “Uru Rubyiruko (Abana b’u Rwanda) twabahuguye mu mirimo inyuranye irimo uko bakurikirana abakozi, uko bakurikirana imirimo, uko bakora imirimo inyuranye mu bwubatsi, uko bakora raporo, …”.

Iyi sosiyete y’ubwubatsi yifuza ko ubumenyi urubyiruko rwabonye mu minsi 30 ishize, bwazarufasha mu buzima bwarwo buri imbere.

Urubyiruko rwibukijwe indangagaciro zigomba kururanga mu buzima bwarwo bwa buri munsi by’umwihariko babwirwa ko ishingiro rya byose ari ugukunda igihugu, kubumbatira ubumwe bw’abagituye no kurinda byagezweho.

Yanditswe na KAYITARE JEAN PAUL

  • Imvaho Nshya
  • Kanama 17, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE