Urubyiruko rw’u Rwanda rusoza ayisumbuye rurategurirwa amasomo y’imyuga yihariye

  • Imvaho Nshya
  • Ugushyingo 3, 2023
  • Hashize amezi 7
Image

Mu gihe hari urubyiruko rusoza kwiga ayisumbuye rukabura ibyo gukora Minisiteri y’Urubyiruko (MINIYOUTH) yatangaje ko hakomeje ibiganiro bigamije kureba uko hategurwa gahunda zihariye zo kwigisha imyuga abo basore n’inkumi baba batagize amahirwe yo guhita bakomeza kwiga za kaminuza.

Byagarutsweho ku wa Kane tariki ya 02 Ugushyingo 2023, ubwo urubyiruko rugera ku 1,000 ruturutse mu Turere tugize Intara y’Iburasirazuba rwahuriraga mu gikorwa cyiswe Career Orientation Fair, nk’urubuga rubafasha guhura n’abakoresha, ba nyiri inganda ari ko banaganirizwa ku murimo.

Bamwe muri abo basore n’inkumi bavuga ko mu rwego rwo kugabanya ubushomeri mu rubyiruko muri iki gihe, hakwiye gutekerezwa uko abarangije amashuri yisumbuye ntibakomeze muri Kaminuza bajya bafashwa bakiga imyuga kugira ngo bahashye ikibazo cy’ubushomeri mu Rwanda.

Basanga gushyirirwaho uburyo bwo kwigishwa imyuga ku barangije ayisumbuye ntibakomeze Kaminuza byaba ari igisubizo cyiza.

Majyambere Olivier waturutse mu Karere ka Kayonza yagize ati: “Dukeneye ubumenyi budufasha kurwanya ubushomeri kuko kurangiza kwiga ayisumbuye ukicara mu rugo ni ikibazo. Usanga dufite ibitekerezo by’ukuntu twatangira kwikorera ariko ubumenyi bukaba bukeya kuko akenshi turabigerageza ariko bikarangira duhuye n’ibihombo. Icyo dusaba ni uko abasoje ayisumbuye mu gihe bahuriye mu rugerero bajya batuganiriza bakaduha n’ayo mahirwe yo kwigishwa uko twakwitangiriza imishinga.”

James yagize ati: “Hanze aha turarangiza kwiga ariko tukabura icyo dukora, tukananirwa gutangira imishinga yaduteza imbere ariko badufashije ayo masomo y’igihe gito agashyirwaho byaba bitworoheye kwikorera. Kuba warize amashuri ntibiba bihagije ko twakwitangiriza imishinga ifite udushya kandi turabizi.”

Akariza Queen Hope wiga gutunganya ibyo kurya no kunywa mu ishuri ry’imyuga rya Kayonza, we yasabiye  bagenzi be batagize amahirwe yo kwiga imyuga kuyahabwa.

Yagize ati: “Kuba twebwe twitabira ibiganiro nk’ibi tukabona abaduhugura ni intambwe baba batwereka yo kurushaho kwaguka mu bitekerezo ariko hari urubyiruko nasize mu rugo rwabuze ubushobozi bwo kwiga imyuga ndetse babura n’imirimo yo gukora. Turasaba ko Minisiteri y’Urubyiruko yabatekerezaho na bo kugira ngo ikibazo cy’ubushomeri kiranduke.”

Umunyamabanga wa Leta muri Minisiteri y’Urubyiruko Umutoni Sandrine, yavuze ko batangiye kwegera Minisiteri y’Uburezi kugira ngo barusheho gukorana no kureba niba hari amasomo ashobora kuba yashyirwaho mu kwigisha urubyiruko rwarangije ayisumbuye rukeneye kwiga imyuga tukiteza imbere.

Yagize ati: “Icyo turi gukora muri iyi minsi, turi gukorana na Minisiteri y’Uburezi ngo twumvikane hagati yacu kuko bafite uruhare rukomeye mu kuzamura ubumenyi mu bana no mu rubyiruko. Rero, turi kuganira na bo ngo turebe amasomo na porogaramu zashyirwaho kugira ngo birusheho gufasha abifuza kwiga imyuga, tukareba niba amasomo yigishwa aho ngaho ashobora gusubiza no gukemura ikibazo kiri aho hantu kugira ngo amasomo bazifuza kwiga aho batuye azabe abafasha n’icyo bifuza mu gihe bageze ku isoko ry’umurimo.”

Gahunda y’ibikorwa byo kwegereza urubyiruko umurimo (Career Orientation Fair) yatangijwe na Minisiteri y’Urubyiruko ku bufatanye n’Ishami ry’Umuryango w’Abibumbye ryita ku Bana (UNICEF) binyuze mu Mushinga Generation Unlimited tariki ya 1 Ugushyingo mu Karere ka Huye.

Ni gahunda yitezweho kugera mu Ntara zose z’Igihugu nk’urubuga ruhuza urubyiruko, impuguke na ba rwiyemezamirimo basangira ubunararibonye n’urwo rubyiruko mu kubafasha gufata ibyemezo.

Byitezweho ko iyo gahunda izarangira urubyiruko rusaga 7,600 rufite ubumenyi n’amakuru azabafasha gutera imbere mu mwuga bifuza kugana no gusobanukirwa imyitwarire n’indangagaciro zikwiye kubaranga kugira ngo bahatane ku isoko ry’umurimo.

NSHIMIYIMANA FAUSTIN

  • Imvaho Nshya
  • Ugushyingo 3, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE