Urubyiruko rurasabwa kurushaho kugira inyota yo kwiga amateka ya Jenoside

  • NTAWITONDA JEAN CLAUDE
  • Mata 12, 2022
  • Hashize imyaka 2
Image

Intwari Christian arasaba urubyiruko kurushaho kugira inyota yo kwiga amateka, bagasoma ndetse bagashaka amakuru ya nyayo kuri Jenoside yakorewe Abatutsi muri 1994, kugira ngo rubashe kurinda ibyagezweho.

Mu kiganiro n’Imvaho Nshya Intwari Chris washinze akanayobora Umuryango w’Urubyiruko ‘Our Past Initiative’ ugamije kwiga no kwigisha abakiri bato amateka ya Jenoside yakorewe Abatutsi mu 1994, avuga ko urubyiruko nk’ejo hazaza h’Igihugu gihanze amaso rukwiye kugira ubumenyi buruseho kuri Jenoside, kugira ngo rutazagwa mu moshya nk’abarubanjirije.

Ati: “Nashinze uyu muryango Our Past nayishinze muri 2012, Kubera yuko nifuzaga kwiga nkanafasha bagenzi banjye kwiga amateka atari meza yaranze igihugu cyacu, Ndetse no gukangurira urubyiruko kwegera no gufasha abagizweho ingaruka za Jenoside yakorewe Abatutsi muri 1994.

Hari icyo wafashije kandi urubyiruko kuko buri mwaka umubare w’abakenera kwitabira uriyongera binaduha icyizere cy’uko hari icyo tuzakomeza kugenda dutanga nk’umusanzu mu kubaka Igihugu binyuze mu rubyiruko.”

Yakomeje avuga ko yishimira uruhare amaze kugira mu gukora Our Past Event, ku hari umusanzu yatanze mu nzira y’isanamitima aho we na bagenzi be begera abarokotse Jenoside yakorewe Abatutsi, mu kubafasha nko kububakira, kubafasha gutangira imishinga mito yo kwiteza imbere n’ibindi.”

Gusa akomeza avuga ko bakeneye ubufasha mu nzego zose kugira ngo Nka Our Past Initiative bakomeze gutambutsa ubutumwa bugera kure nk’uko babyifuza.

Abona kandi ko uyu muryango ugenda waguka ndetse unagira impinduka mu rubyiruko, kuko mu bikorwa utegura ikiza ku isonga ari ugutegura igihe cyo kwibuka by’umwihariko ku rubyiruko mu rwego rwo kwigisha abakiri bato, uko Jenoside yateguwe ikanashyirwa mu bikorwa no kunamira inzirakarengane zisaga miliyoni yahitanye.

Uru rubyiruko kandi rwihaye umukoro wo gufasha abagizweho ingaruka na Jenoside yakorewe Abatutsi

Uyu mwaka iki gikorwa cyitabiriwe n’umubare munini w’urubyiruko ruturutse impande n’impande z’Umujyi wa Kigali wahuriye ku Rwibutso rwa Jenoside rwa Kigali mu gikorwa cyo kwibuka ku nshuro ya 28 Jenoside yakorewe Abatutsi mu 1994.

Ni igikorwa cyaranzwe n’ibiganiro bitandukanye bigaruka ku gaciro n’icyo kwibuka bisobanuye ku rubyiruko, imivugo n’imikino bigaragaza amateka ya Jenoside.

Umuyobozi wa Our Past Initiative, Ntwali Christian, yavuze ko bategura iki gikorwa kugira ngo bazibe icyuho kiri mu rubyiruko cyo kudasobanukirwa neza amateka ashaririye Igihugu cyanyuzemo.

Ati: “Turagira ngo dukureho ikinyuranyo kinini kiri hagati y’ababayeho mbere ya Jenoside n’abavutse nyuma yayo cyangwa abari bato, turagira ngo tubahuze abato bige abakuze batange ubumenyi kugira ngo tubashe kurinda no gusigasira ibyagezweho.”

Umuyobozi w’Umuryango Aegis Trust, Mutanguha Freddy, yashimye abategura iki gikorwa kuko bitanga icyizere ko amateka y’u Rwanda atazazima.

Ati: “Ntabwo amateka yacu azazima, ntabwo abacu bazazima muhari kuko mwarashibutse kandi mufite abo mwashibutseho na bo bagize urugendo rwabo kandi bakirugira.”

Yakomeje ashishikariza abariho mu gihe cya Jenoside gutinyuka bagatanga amakuru nyayo ku bakiri bato.

Ku ruhande rw’urubyiruko rwakitabiriye rwashimye abategura iki gikorwa gituma bahurira hamwe bakibuka, bemeza ko nubwo bamwe bari bato abandi bari bataravuka mu gihe cya Jenoside ariko bumva neza agaciro ko kwibuka.

Nsengimana Sylvestre, yavuze ko kwibuka ari uguha agaciro abazize Jenoside yakorewe Abatutsi mu 1994 kandi ari no kurinda ibyo Igihugu kimaze kugeraho.

Ati: “Kwibuka kuri njye ni uguha agaciro abacu, ubuzima n’ibyagezweho numva ko uyu ari umuco tugomba gusigasira tukawutoza n’abato bari inyuma yacu kugira ngo tugumane umwimerere wacu.”

Igisonga cya Kabiri cya Nyampinga w’u Rwanda 2022, Dushime Kayumba Darina, yavuze ko iki ari igikorwa aha agaciro cyane kandi ko kwibuka bifasha urubyiruko gusobanukirwa igihugu neza.

Ati: “Kwibuka ni ingenzi cyane kuko bitwibutsa ibyabaye mu bihe byashize kandi bikaduha n’imbaraga zo gukora ibyiza by’umwihariko nkatwe urubyiruko, bitwereka aho twavuye n’aho turi aka kanya.”

Our Past Initiative imaze imyaka 11 ikora, ifite intego eshatu zirimo kwiga no kwigisha urubyiruko amateka, gukangurira abakuru kwigisha urubyiruko amateka yaranze Jenoside no gukangurira urubyiruko kwegera no gufasha abarokotse Jenoside yakorewe Abatutsi mu 1994.

Muri iyi myaka bakoze ibikorwa bitandukanye birimo gufasha ababa mu mudugu w’abamugariye ku rugamba wo mu Murenge wa Kanombe.

Mu 2015-2020 bavuguruye inzu esheshatu z’abarokotse Jenoside banubaka imwe mu Mudugudu wa Ntarama, banabagenera amazi n’amashanyarazi akomoka ku mirasire y’izuba banatanze ubwisungane mu kwivuza ku miryango 30.

Mu 2021-2022 mu Mudugudu wa Ngeruka bakoze igikorwa cyo kuvugurura inzu z’Abanyarwanda birukanywe muri Tanzania mu 2012 ndetse banabafasha gutangiza imishinga mito n’ibindi byinshi, bemeza ko ibikorwa byabo bikomeje.

Muri uyu muhango hacanywe urumuri rw’icyizere
Intwari Christian asaba urubyiruko kurushaho kugira inyota yo kwiga amateka, bagasoma ndetse bagashaka amakuru ya nyayo kuri Jenoside yakorewe Abatutsi muri 1994, kugira ngo rubashe kurinda ibyagezweho
Abakobwa bitabiriye Miss Rwanda 2022 barimo Nyampinga Muheto Divine bashyize indabo ku mva rusange ziri ku Rwibutso rwa Jenoside rwa Kigali ku Gisozi banunamira inzirakarengane zihashyinguye
Muri uyu muhango hakinwa imikino itandukanye itanga ubutumwa bwamagana Jenoside n’ingengabitekerezo yayo
  • NTAWITONDA JEAN CLAUDE
  • Mata 12, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE