Urubyiruko rufite ubumuga rurashimira Perezida Kagame wimakaje uburezi butabaheza

  • NGABOYABAHIZI PROTAIS
  • Mutarama 18, 2024
  • Hashize amezi 4
Image

Urubyiruko rufite ubumuga bwo kutabona ruravuga imyato Perezida wa Repubulila y’u Rwanda Paul Kagame, wimakaje imiyoborere myiza idaheza mu nzego zose kugeza no mu burezi, ubu bakaba barabashije kwiga kugera no mu cyiciro cya gatatu cya kaminuza.

Bavuga ko imiyoborere myiza irangajwe imbere na Perezida Kagame yahaye Umunyarwanda wese ijambo, kuko ari abahamya b’uko abantu bose bareshya imbere y’amategeko y’u Rwanda.

Mukangenzi Marceline wo mu Kagari ka Muhabura, Umurenge wa Nyange, Akarere ka Nyange, yavuganye ubumuga bwo kutabona mu mwaka wa 1994.

Byari ibintu bikomeye kuri we kuko yakuze atiyumvisha uko ubuzima bwe buzamera akumva nta cyizere cyo kubaho afite imbere ye.

Ashimangira ko Leta y’Ubumwe bw’Abanyarwanda yakoze ibishoboka byose mu kwimakaza imiyoborere itagira n’umwe isigaza inyuma, bikaba bitandukanye n’amakuru yumvaga ko muri Leta zabanje abafite ubumuga bari baribagiranye.

Yagize ati: “Ubu umuntu ufite ubumuga ameze neza cyane, amakuru mfite ni uko uwabaga yavukanye ubumuga bwo kutabona nkanjye yagumaga mu rugo kuko nyine yitwaga Ruhuma, yamara gukura bakamurandata akajya gusaba ku muhanda. Na bwo uwabaga yamurandase yamusigaga ku nzira akaza kumucyura, ubu si ko bimeze kuko Kagame yadufashije kwihesha agaciro no guhanga umurimo.”

Mukangenzi akomeza avuga ko iyo hataba imiyoborere myiza nta muntu utabona wari kujya kwiga kugera ubwo arangiza na kamunuza kandi atabona.

Yagize ati: “Hari abafataga umuntu utabona nk’imburamumaro ku gihugu, n’umubyeyi wawe yabona uvutse umugaye akaguhisha mu gikari kugeza ushaje, njye rero kubera ko navutse mu gihe Umunyarwanda yahabwaga ijambo narize, niga amashuri abanza nkomeza ayisumbuye, niga na Kaminuza, ubu ndangije ibijyanye n’ivugururamibereho mbese ubufashamyumvire muri rusange. Kuri ubu kandi nize n’ikoranabuhanga ku buryo nzi gukoresha mudasobwa kandi mbikora neza nk’abandi bose babona.”

Byukusenge Aloysie we avuga iyo hataba Kagame abafite ubumuga b’ingeri zose baba baraheze mu ngo abandi barapfuye, ariko kuri ubu ufite ubumuga iyo ava akagera aritunze kuko mu bumuga afite bwose Kagame yamugoragoje ku buryo yihangira umurimo ndetse akanawutanga.

Yagize ati: “Nkanjye narize ndangiza ikiciro cya kabiri cya Kaminuza none ubu ndi muri Masters, ubu mfite akazi kandi kampemba neza, ndi umusemuzi mvuga indimi zirenze  rumwe, Ikinyarwanda, Igifaransa n’Icyongereza, nyamara mbikora neza ku buryo hose mba nkenewe.”

Yakomeje agira ati: “Mbere ya Leta y’Ubumwe bw’Abanyarwanda ndumva abakoze Masters ni mbarwa, ibi byose tubikesha imiyoborere myiza idaheza ahubwo njyewe Kagame ndamushimiye nzanamutora na bagenzi banjye, kuko natwe dupiganwa nk’abandi ku isoko ry’umurimo.”

Ubwo bashyikirizwaga Impamyabumenyi ku bijyanye n’ikoranabuhanga bigishishijwe nyuma yo gusoza Kaminuza,  Vuguziga Innocent Umuyobozi w’Ikigo Disability Solutions (DISO GROUP LTD) gitanga ibisubizo ku bumuga, avuga ko abafite ubumuga na bo bashoboye bitewe n’uko bahawe uburyo bwiza bwisanzuye bwo kwiga.

Yagize ati: “Kuri ubu umuntu ufite ubumuga arashoboye cyane ko no ku ikoranabuhanga na we ubu akirigita mudasobwa… Njye ndashimira Perezuda Kagame kuko yaduhaye uburenganzira bwose kugeza ubwo umuntu ufite ubumuga kuri buri nyubako agira inzira ye. Nk’ubu muri hoteli twakirwa neza kandi bakatwitaho kubera ko imiyoborere myiza yatumye duhabwa agaciro.”

Imibare itangwa n’Ikigo cy’Igihugu cy’Ibarurishamibare mu Rwanda (NISR), igaragaza ko mu bana bari hagati y’imyaka  6 na 17  bafite ubumuga abagera kuri 65% ari bo babasha kugera mu ishuri ugereranije na 81% badafite ubumuga.

  • NGABOYABAHIZI PROTAIS
  • Mutarama 18, 2024
  • Hashize amezi 4
TANGA IGITEKEREZO
Gilbert says:
Mutarama 19, 2024 at 10:20 am

Natwe turashima leta yubumwe nabafatanya bikorwa nka Disotec mukudufasha mwikorana buhanga nkabafite ubumuga

Andika igitekerezo

AMATEGEKO AGENGA IYANDIKA RY'IGITEKEREZO CYAWE