Urubyiruko ni amahirwe akomeye ku iterambere ry’Afurika- Dr Ngirente

  • NYIRANEZA JUDITH
  • Ugushyingo 27, 2023
  • Hashize amezi 3
Image

Minisitiri w’Intebe Dr Edouard Ngirente, yatangije Inama y’Ihuriro ry’Ubukungu [Kigali Economic Forum] iteraniye mu Rwanda kuva kuri uyu wa Mbere tariki 27-28 Ugushyingo 2023, agaragaza ko kuba Umugabane w’Afurika utuwe n’umubare munini w’urubyiruko bitanga amahirwe y’iterambere.

Minisitiri yakomeje asobanura ko kugira ngo bigerweho, bisaba ko urubyiruko rwiga, rukagira ubumenyi, bityo bikazafasha Afurika gutera imbere.

Yagize ati: “Umugabane ufite abaturage biganjemo urubyiruko, ariko tugomba kwibuka ko urwo rubyiruko kugira ngo rugirire akamaro umugabane rugomba kwigishwa neza. Dusabwa kubaha ubumenyi bubafasha kwisanga ku isoko ry’umurimo kandi bagatanga umusaruro ukwiye”.

Iyi nama ifite insanganyamatsiko igira iti ‘Mu bihe by’amakuba, ni ayahe mahirwe ya Afurika”?

Amahirwe y’iterambere ry’Afurika ahanzwe amaso ku mubare munini w’urubyiruko, hitabwa ku ikoranabuhanga no guhanga udushya twatuma hongerwa imbaraga mu bikorerwa ku mugabane bikaba binoze.

Ati” Afurika ifite abantu basaga miliyoni 200 bari hagati y’imyaka 14 na 24, hanyuma abangana na 77% bakaba bari mu cyiciro cy’urubyiruko, bakaba ari imbaraga zagirira Umugabane w’Afurika akamaro”.

Ihuriro ryiga ku bukungu rigamije kugaragaza impinduka mu ruhare rwa Afurika n’umwanya wayo mu bukungu bw’Isi. 

Abitabiriye iri huriro bazatanga ibisubizo bishya ku gushyigikira urubyiruko, uburezi, uruhare rw’umugore, imiyoborere mu bukungu, kureshya abifuza gushora imari no gutera inkunga umugabane wa Afurika.

Minisitiri w’Intebe Dr Ngirente yagarutse ku bibazo bibangamiye iterambere ry’Umugabane w’Afurika harimo ibibazo by’ingufu, ibishingiye ku ngaruka z’icyorezo cya Covid-19, ibibazo by’imihindagurikire y’ibihe, ihungabana ry’ubukungu n’ibindi.

Yongeraho ko ariko igisubizo kiri mu bufatanye ngo hashakwe ibisubizo birambye.

Ati: “Ntidushobora gutera imbere nyabyo nta mikoranire y’Akarere, ubucuruzi hagati y’ibihugu bya Afurika buracyari hasi ku gipimo cya 15 % mu gihe 85% bindi bisigaye ibukorana n’andi mahanga. 

Nyamara birazwi neza ko ubuhahirane hagati y’ibihugu bya Afurika ari ingenzi cyane mu guteza imbere ubukungu bwa Afurika kuko buteza imbere ikoranabuhanga mu kohereza ibicuruzwa hanze.”

Yongeyeho ati: “Igihe ni iki ngo hatangire kugira igikorwa mu gushaka amahirwe n’ibisubizo byakemura ibyo bibazo by’ingutu. Ibi kandi bigaragaza akamaro k’ibiganiro nk’ibi biduteranyirije aha, hamwe n’inzobere, kuko biradufasha kurebera hamwe ibisubizo ku bibazo byugarije Isi, no kwigira hamwe uburyo dushobora gufatanya tugakorera hamwe”.

Aha yakomoje ku Isoko rusange ry’Afurika nka bumwe mu buryo bwatuma gukorera hamwe bitanga umusaruro.

Banki y’Isi itangaza ko Isoko rusange rya Afurika rishyizwe mu bikorwa ku gipimo cyuzuye, ryakura abaturage miliyoni 50 mu bukene bukabije, rikazamura 9% ku byo abaturage binjiza mu 2035.

Umuyobozi w’Ihuriro ry’abahanga mu bukungu, Jean-Hervé Lorenzi yagaragaje ko hari nyinshi bigikeneye kongerwamo imbaraga ngo Afurika itere imbere harimo nko kuba Afurika  ibona ubushobozi, amafaranga igashobora kwizamura.

  • NYIRANEZA JUDITH
  • Ugushyingo 27, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE