Umworozi w’ingurube ahamya ko ari ubworozi butanga inyungu

  • NTAWITONDA JEAN CLAUDE
  • Mata 1, 2022
  • Hashize imyaka 2
Image

Umuhinzi -mworozi wo mu Karere ka Rwamagana mu Murenge wa Kigabiro, mu Kagari ka Cyanya Ngirumugenga Jean Marie Pierre watangiye ubworozi bw’ingurubenyuma yo kwegera abantu akajya ababaza icyo ubworozi bw’ingurube butanga, uko zororoka akabona birashoboka, ahamya ko ubworozi bw’ingurube butanga inyungu.

Ati: “Mu kazi k’ubugoronome nageraga ku bahinzi n’aborozi hari uburyo abantu gakondo na bo batwigisha nubwo tuba twarize mu mashuri, ndi Eng. Agronome naje kubona aboroye ingurube nkabegera tukavugana nkababaza icyo zitanga, uko zororoka nza kumva ko ari umushinga wunguka nakora”.

Yasobanuye ibyiciro by’ubworozi kuva ikivuka kugeza itanga umusaruro.

Ingurube itangira ivuka, ikonka ukwezi 1 zigacuka, nyuma y’ukwezi kumwe n’igice kugera kuri abiri, zijya aho zibyibuhirizwa, tuzishakira ibiryo byiza bizifasha gukura vuba, ku buryo nibura ku mezi 6 tuba dufite ingurube ipima ibilo 100 byatinda bikagera ku mezi 7.

Uyu mworozi ahinga n’urutoki, ndetse n’ibigori yifashisha mu kugaburira ingurube. Ahinga kuri Hegitari 27.

Hari abakozi 17 mu buryo buhoraho iyo bibaye ngombwa hongerwamo 10. Akazi gahabwa abatuye hafi aho.

Ngirumugenga Jean Marie Pierre asobanura uburyo ubworozi bw’ingurube bwunguka

Safari Sylvestre, umukozi mu Kigo cy’Igihugu cy’Ubuhinzi n’Ubworozi RAB akaba n’umushakashatsi, yavuze ko icyo kigo kibukora  ku matungo magufi atuza harimo ingurube, inkoko n’inkwavu ngo gifashe gukemura ibibazo aborozi bagenda bahura nabyo.

Yagize ati: “Icya mbere ni ukubonera aborozi icyororo cyiza kibaha umusaruro utubutse. Icya kabiri ni ugufasha aborozi gushaka igisubizo cy’ibiryo by’amatungo kuko hazakorwa igerageza ry’uburyo aborozi bashobora kuvanga ibiryo biboneka mu gihugu aho batuye, bikagaburirwa amatungo agakura neza kandi agatanga umusaruro utubutse”.

Yavuze ko batangiranye n’ubworozi bw’ingurube batumiza hanze icyororo cy’ingurube, harimo amasekurume bikabafasha gufata intanga zitanga icyororo cyiza, gitanga umusaruro.

Yagize ati: “Amasekurume avomwamo intanga zirimo gukwirakwizwa mu borozi kandi barabyitabira mu Turere dutandukanye. Zakirwa zifite amezi 5, zagira 6 zigatozwa kurira igikoresho (maniquin) gifasha kuzifata intanga.

Bifashisha igikombe cyabugenewe gifatirwamo intanga gituma zitangirika zikajyanwa muri laboratwari   hagasizumwa ingano y’izafashwe, umuvuduko zifite n’ubucucike, noneho izo ntanga zihabwa ibyo kurya, zigafungwa mu macupa zikajya kubikwa mu macupa yabugenewe”.

Yavuze ko ikibazo cyo kubona icyororo cyiza kugeza ubu cyakemutse kandi hari n’izindi santere nk’iya Cyisaro mu Karere ka Gicumbi, mu Karere ka Rwamagana mu Murenge wa Muyumbu, mu Bugesera ubu hariho na gahunda yo gufungura indi santere mu Karere ka Rusizi.

  • NTAWITONDA JEAN CLAUDE
  • Mata 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE