Umwaka ushize Ikigega cya Mituweli cyinjiyemo arenga miliyari 70 Frw

  • NTAWITONDA JEAN CLAUDE
  • Werurwe 11, 2022
  • Hashize imyaka 2
Image

Ubuyobozi bw’ Ikigo cy’Igihugu gishinzwe Ubwiteganyirize mu Rwanda ( RSSB) buvuga ko mu mwaka ushize wa 2020/2021, ikigega cy’ubwisungane mu kwivuza (Mituweli) cyinjiyemo amafaranga y’u Rwanda asaga miliyari 70 na miliyoni 700 aturutse ku misanzu y’abanyamuryango, kuri serivisi zitandukanye z’ubukungu n’uruhare rw’abafatanyabikorwa.

Mu kiganiro n’abanyamakuru, ubwo hatangizwaga ubukangurambaga kuri Mituweli, Umuyobozi Mukuru wa RSSB Rugemanshuro Regis yavuze ko n’ubwo hakiri urugendo rwo guharanira ko ubwitabire bw’abaturage mu bwisungane mu kwivuza bugera ku 100%, hari byinshi byakozwe mu gushyigikira  Mituweli birimo kuba Leta yarongereye ubushobozi ikigega cyayo.

Yagize ati: “Leta yabashije kongerera ubushobozi Mituweli, aho amafaranga ava mu bigo bitandukanye; amatike ya Polisi ya parikingi, lisansi, no ku mishahara ya buri mukozi; buri wese hari ijanisha ritoya atanga n’ibindi. Ayo yose  akunganira ayo umuturage aba yatanze, tukaba tunahamagarira abanyamuryango ngo bayabyaze umusaruro. Iyo ufite ugushyigikira na we ukora ibyawe”.

Yagarutse no ku  ruhare abafatanyabikorwa bagenda bagaragaza mu kunganira kiriya kigega  hakaboneka  amafaranga yo kwishyura ibitaro, ibigo nderabuzima na “Poste de Santé” biba byahaye serivisi z’ubuvuzi abanyamuryango ba mituweli.

Nk’uko Umuyobozi Mukuru wa RSSB yabisobanuye, Leta yishyurira abari mu kiciro cya mbere cy’ubudehe amafaranga y’u Rwanda agera kuri miliyari 6, umwaka ushize Umuryango Imbuto Foundation na wo wishyuriye abanyamuryango miliyari 6.

Ati: “… hari n’andi ava mu bindi bice by’ubukungu, aho umwaka ushize twabashije kubona amafaranga agera kuri miliyari 25 na miliyoni 300,  umwaka wose ayakusanyijwe arimo n’ayatanzwe n’abanyamuryango agera kuri miliyari 70 na miliyoni 700”.

Yongeyeho ko baharanira   gukomeza kongera ubushobozi kugira ngo imiti na serivisi z’ubuvuzi zishyurwa hakoreshejwe mituweli  zongerwe.

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza Ingabire Assumpta yavuze ko mu turere  na ho hagenda haboneka abafatanyabikorwa ndetse n’Abanyarwanda baba hanze bishyurira Mituweli ingo zagize ikibazo. Akaba asaba ko n’abandi batanga umusanzu muri iyi gahunda.

Ati: “… byose ni magirirane, niba wakoze wungutse, ukagira umutima wo gufasha aho utuye cyangwa aho ukomoka na byo ni ibintu bigenda bizamura abantu babona ubwisungane mu kwivuza”.

Yagaragaje ko Leta iyo ifashije abatishoboye cyane cyane ababarirwa mu cyiciro cya mbere ushyizeho n’abafungiye mu magereza usanga bagera kuri miliyoni 2.

  • NTAWITONDA JEAN CLAUDE
  • Werurwe 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE