Umuziki nk’umwe mu miti y’ibibazo by’ubuzima bwo mu mutwe

  • KAMALIZA AGNES
  • Mutarama 5, 2024
  • Hashize amezi 5
Image

Ubushakashatsi butandukanye bwagiye bwerekana ko umuziki ari igisubizo cya zimwe mu ndwara zo mu mutwe kandi bigabanya imihangayiko, gutanga ihumure ndetse ukagabanya guhangayika k’umutima.

Umuyobozi w’ishami rishinzwe ubuzima bwo mu mutwe mu kigo cy’Igihugu cy’Ubuzima (RBC) Dr Gishoma Darius, avuga ko ibice byo kwita ku buzima bwo mu mutwe bitagarukira gusa mu kuvura, kuko hari n’ubundi buryo bwakoreshwa burimo ubugeni n’ubuhanzi.

Ati “Ubu buryo rero bufite akamaro cyane, ni bwiza ku rubyiruko, kuko bufasha mu gukumira no gutanga ubufasha bitaragera ku rwego rw’uko ibibazo byo mu mutwe biba indwara.”

Mu Rwanda urubyiruko rutandukanye rwo mu mashuri yisumbuye bahamya ko ubuhanzi n’ubugeni ari umwe mu miti ibafasha guhangana no gukira ibibazo by’ubuzima bwo mu mutwe.

Bavuga ko ibibazo by’ubuzima bwo mu mutwe usanga byiganje cyane mu rubyiruko rukiri mu mashuri yisumbuye na za Kaminuza iyo biyeguriye ubuhanzi usanga bikize cyangwa bikagabanyuka.

Agahozo Marie Siraque wiga ku rwunge rw’amashuri rwa Kivugiza, avuga ko iyo bahungiye mu bijyanye n’ubuhanzi n’ubugeni bibafasha gukira ibikomere baba bafite mu mutima.

Ati: “Ubuhanzi bugira impinduka cyane, birakuruhura, uba wumva umeze neza, kuko ntabwo ibihangano bigarukira aho ubona gusa, birakomeza bikagera n’ahandi hantu hose, ku buryo n’undi muntu ukibonye afite icyo kibazo cy’ubuzima bwo mu mutwe biramufasha bigafasha n’abandi”.

Harerimana Jean Pierre Celestin ni umwarimu ushinzwe ibijyanye n’ubujyanama ku ishuri rya Remera Protestant, avuga ko ubuhanzi ari ingenzi ku bafite ikibazo cy’ubuzima bwo mu mutwe.

Ati: “umuntu ufite ikibazo cy’ubuzima bwo mu mutwe iyo umujyanye muri studio akaririmba, ukamwumvisha indirimbo, akareba igishushanyo cyangwa akareba film yavuye mubyo yanditse, arishima akumva ari uwumumaro, iyo abivuze bituma yisanzura agahera ubwo abwira bagenzi be ibyamubayeho, iyo abinyujije mu buhanzi rero arishima kandi akabohoka bityo agakira”.

Ubushakashatsi bwakozwe na Minisiteri y’ubuzima, mu mwaka wa 2018 bwagaragaje ko umwana umwe mu bana 10 bafite hejuru y’imyaka 15, aba afite ibibazo byo mu mutwe, mu gihe mu bantu bakuru, umuntu 1 muri 5 ari we uba afite ibyo bibazo.

Akamatro k’umuziki mu birebana n’ubuzima bwo mu mutwe byanagarutsweho na Prof Gilles Comeau, wo muri kaminuza ya Ottawa muri Canada, washyizeho ivuriro ry’ubushakashatsi bw’ubuzima bwo mu mutwe kugira ngo acukumbure isano iri hagati y’umuziki n’ubuzima bwo mu mutwe no guteza imbere uburyo bwo kwinjiza umuziki muri serivisi zita ku buzima.

Mu isuzuma rya 2013 ryakozwe n’urubuga rutangaza ibijyanye n’ubuzima rwo muri Switzerland rwitwa ‘Frontiers’ rwagaragaje ko kumva umuziki bishobora kugabanya urugero rw’umusemburo wiyongera mu gihe wahangayitse (cortisol) ku kigero cya 61%.

Mu bushakashatsi bwasohotse mu kinyamakuru PLoS One mu 2019 bwerekanye ko abaturage barenga 89% bavuze ko umuziki wabafashije kugabanya ibibazo byabo cyane.

Ubundi bushakashatsi bwakozwe na kaminuza ya Nevada bwerekanye ko kumva urusobe rw’amajwi y’umuziki 60 ku munota bishobora gutera ubwonko guhinduka mu buryo bworoshye kandi bwiza, ibi biba ku bantu hafi 75% nyuma y’iminota itanu bumva umuziki.

  • KAMALIZA AGNES
  • Mutarama 5, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE