Umutoza Bipfubusa yabonye intsinzi ya mbere muri Kiyovu Sports

  • SHEMA IVAN
  • Ukuboza 9, 2023
  • Hashize amezi 3
Image

Ikipe ya Kiyovu Sports yatsinze Etincelles mu mukino w’umunsi wa 14 wa shampiyona, iba intsinzi ya mbere ku Mutoza Bipfubusa Joslin utoza Kiyovu Sports.

Uyu mukino wabaye kuri uyu wa Gatandatu tariki 9 Ukuboza 2023 kuri Kigali Pele Stadium.

Kiyovu Sports yagiye gukina uyu mukino iheruka kunyagirwa na Mukura VS ibitego 4-1, mu gihe ikipe ya Etincelles yo yari yanyagiye AS Kigali ibitego 4-2.

Kiyovu Sports yatangiye neza umukino ndetse ku munota wa gatandatu gusa, Muhozi Fred yateye koruneri nziza, Tuyisenge Hakim atsinda igitego cya mbere n’umutwe.

Kiyovu Sports yakomeje gukina neza ariko Masengo Tansele na Leka Alfred bagahusha uburyo bwiza babonaga imbere y’izamu.

Ku munota wa 32, Longa Longa Prince yazamukanye umupira yihuta awuhindura imbere y’izamu, usanga Niyonkuru Sadjat yishyura igitego ku ruhande rwa Etincelles FC.

Mu minota ya nyuma y’igice cya mbere, Nizigiyimana Karim Mackenzie yahinduye umupira imbere y’izamu usanga Muhozi Fred awukina aryamye, atsinda igitego cya kabiri cya Kiyovu Sports.

Igice cya Mbere cyarangiye Kiyovu Sports itsinze Etincelles ibitego 2-1.

Mu gice cya kabiri Kiyovu Sports yagarukanye imbaraga nyinshi ikomeza gusatira bikomeye.

Ku munota wa 51, Nizigiyimana yateye ’coup franc’, Leka Alfred akina n’umutwe, umupira ukubita umutambiko w’izamu uvamo.

Mu minota 60, Etincelles yihariye umupira cyane ari na ko yahushaga uburyo yabonye.

Kiyovu yagowe n’igice cya kabiri kuko yakinaga kenshi, ikiza izamu rya Nzeyurwanda Djihad.

Ku munota wa nyuma w’umukino, Niyonkuru yateye umutwe mwiza cyane, Umunyezamu Nzeyurwanda Djihad arasimbuka akuramo umupira.

Umukino warangiye Kiyovu Sports itsinze Etincelles FC ibitego 2-1 nyuma y’imikino itatu nta ntsinzi.

Ku rutonde rw’agateganyo, Kiyovu Sports yahise ifata umwanya wa gatanu n’amanota 20, Etincelles FC iguma ku wa 12 n’amanota 14.

Kiyovu Sports izasoza igice cya mbere cya shampiyona yakirwa na Rayon Sports mu mukino w’abakeba bakomeye.

  • SHEMA IVAN
  • Ukuboza 9, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE