Umusaruro u Rwanda rukura mu nama y’ubworozi bw’inkoko muri Afurika

  • NTAWITONDA JEAN CLAUDE
  • Ukwakira 4, 2022
  • Hashize imyaka 2
Image

Guhera kuri uyu wa Kabiri taliki ya 4 kugeza ku ya 6 Ukwakira 2022, i Kigali mu Rwanda harateranira Inama Nyafurika yiga ku Bworozi bw’Inkoko n’ibindi biguruka (Poultry Africa 2022) n’imurikabikorwa rihuza inganda, aborozi n’ibigo bitanga serivisi z’ikoranabuhanga rigezweho mu bworozi bw’inkoko baturutse mu bice bitandukanye by’Isi.

Iyo nama ibaye ku nshuro ya gatatu nyuma y’izindi zayibanjirije na zo zateraniye i Kigali mu mwaka wa 2017 no mu 2019. Minisiteri y’Ubuhinzi n’Ubworozi (MINAGRI), ivuga ko iyi nama yitezweho umusaruro ufatika ugereranyije n’uwo izabaye bwa mbere zatanze kuri ubu mu Rwanda hakaba hakomeje kugaragara iterambere ry’ikoranabuhanga rigezweho mu bworozi bw’inkoko.

Mukasekuru Mathilde, Umuyobozi Mukuru w’Agateganyo w’Ishami rishinzwe ubworozi muri Minisiteri y’Ubuhinzi n’Ubworozi (MINGRI), yabwiye Imvaho Nshya ko mu Rwanda ubworozi bw’inkoko buri gutera imbere nubwo hakiri

Yakomeje avuga ko inama y’uyu mwaka yitezweho umusaruro munini cyane ugereranyije n’uwavuye mu nama zabanje, ati: “Muri uyu mwaka turabona bizagenda neza kurushaho kuko amasomo uyu munsi turi gukoresha harimo ayo twagiye tuvoma muri izo nama ebyiri zatambutse; iyi ngiyi na yo twiteze ko aborozi bigiramo byinshi kuko haba ikiganiro ku munsi wa mbere ku italiki ya 4, habe n’ibindi biganiro bigera kuri 13 birimo ubuhanga bwinshi ku bworozi bw’inkoko.”

Ikindi kiba ni imurikabikorwa, ryitabirwa n’inganda zitandukanye n’abashakashatsi, bitanga amasomo aborozi nyarwanda n’inzego zishinzwe ubworozi bw’inkoko bakwifashisha mu kurushaho kunoza uru rwego.

Biteganyijwe ko iryo murikabikowa riba guhera ejo taliki ya 5 n’i ya 6 Ukwakira, abazaryitabira bakaba bazagaragaza udushya mu bworozi bw’inkoko twafasha kongera umusaruro.

Mukasekuru yavuze ko kugeza uyu munsi u Rwanda rumaze kugira amaturagiro y’inkoko 7 ya kijyambere, ariko ngo aracyaturaga imishwi mikeya ugereranyije n’ikenewe. Mu gihugu habarizwa akandi inganda esheshatu z’ibiryo by’inkoko n’andi matungo, aborozi bagera kuri 500 bateye imbere n’abandi bagera kuri 800 bakigerageza.

Muri bo harimo aborora inkoko z’inyama ndetse n’inkoko z’amagi, ndetse MINAGRI ikaba ibashimira ko bagerageza gukora akazi kabo neza, bityo uko bahura n’ab’ahandi bikaba bizatanga umusaruro urushijeho kwiyongera.

Mukasekuru ati: “Muri iyo nama haraba ibiganiro n’amamurikabikorwa bitandukanye ku buryo aborozi bazakuramo iby’ingenzi bishobora kubafasha guteza imbere ubworozi bwabo, byaba ari ibiryo, ubushakashatsi ndetse n’ikoranabuhanga rigezweho.”

Ingingo zitezwe kuganirwaho harimo izirebana n’ubuzima bw’inkoko, ubw’abazirya cyangwa ababana na zo, umutekano w’urusobe rw’ibinyabuzima ndetse n’ibibazo bikunze kwibasira aborozi cyangwa abongerera agaciro umusaruro w’ubworozi bw’inkoko.

Iyo nama mpuzamahanga yatewe inkunga n’Ihuriro VIV Europe ritegurwa buri myaka ine rihuje abamurika ibikorwa byabo mu bworozi bw’inkoko, dendo, imbata, ibishuhe n’ibindi biguruka, ndetse n’umusaruro bitanga uhereye ku nyama, amagi n’ibindi.

Mu bimurikwa hanabonekamo inyama z’ingurube, inyama z’ifi ndetse n’amata n’ibiyakomokaho.

Iryo murikabikorwa ryimakaza ikoreshwa ry’ikoranabuhanga mu bworozi, aho aborozi n’abacuruza umusaruro ukomoka ku bworozi bahererekanya ubumenyi mu buryo bugezweho bwo gukora ubworozi bwa kijyambere bwifashisha ikoranabuhanga rigezweho.

Abitabiriye iryo murikabikorwa barimo ababa baturutse mu bihugu birimo u Rwanda, Nigeria, Uganda, Kenya, Ghana, Ethiopia, Tanzania, Afurika y’Epfo, Sudan n’ibindi bihugu by’Afurika bitandukanye.

Abategerejwe muri iyo nama ya mbere nini iganira ku ngingo zinyuranye zigize ubworozi bw’inkoko n’ibindi biguruka barasaga 2,000 barimo aborozi, abafite inganda zongerera agaciro umusaruro w’ubworozi bw’inkoko, abashakashatsi n’abandi.

Inama y’uyu mwaka ifite umwihariko wo kwagura ibiganiro kugeza no ku buhinzi bw’indabo, imboga n’imbuto ndetse no gutunganya umusaruro w’amata.

Umuyobozi w’Ikigo VNU Europe gitegura amamurikabikorwa mpuzamahanga, Zhenja Anochin, yavuze ko mu gutanga ibisobanuro byimbitse ku ngingo zateguwe mu biganiro bizongerera ubumenyi abazitabira mu rwego rwo guhangana no gukemura ingorane zitandukanye.

Izindi ngingo zibandwaho cyane ni umutekano w’amatungo, uburyo bugezweho bwo gucunga aho bayororera, n’ibisubizo byo kubika inyama n’undi musaruro.

  • NTAWITONDA JEAN CLAUDE
  • Ukwakira 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE