Umurwayi wa nyuma wa Ebola yasezerewe mu bitaro muri DRC

Ishami ry’Umuryango w’Abaibumbye ryita ku Buzima, OMS ryatangaje ko umurwayi wa nyuma wa Ebola yasezerewe mu bitaro bihereye mu Ntara ya Kasai iri mu Burengerazuba bushyira Amajyepfo ya Repubulika Iharanira Demokarasi ya Congo, (DRC).

OMS yagaragaje ko nyuma yo gusezererwa k’uwo murwayi nihashira iminsi 42 nta wundi murwanyi uragarara ari bwo bizatangazwa ko  icyo gihugu cyatsinze icyo cyorezo.

Kuva byatangazwa ko DRC yugarijwe na Ebola ku wa 04 Nzeri uyu mwaka, abantu 64 ni bo bacyanduye gihitana 45 nkuko itangazo rya OMS ryo ku wa 19 Ukwakira 2025 ribigaragaza.

Umuyobozi wa OMS ushinzwe Afurika Dr.Mohamed Janabi, yavuze ko gukira k’uwo murwayi ari insinzi ikomeye kuva icyorezo cyatangira mu byumweru bitatu bishize.

Ni ku nshuro ya 16 icyorezo cya Ebola cyugariza DRC nyuma yuko abarwayi bayo babonetse mu duce twa Bulape na Mweka, mu ntara ya Kasai.

Kuva icyo gihe OMS yabaruye abantu 53 banduye, byemezwa ko n’abandi 11 bakekwaho kuba baranduye ndetse abo barwayi bagaragaje ibimenyetso bya Ebola birimo umuriro mwinshi, kuruka, guhitwa no kuva amaraso.

Ebola yamenyekanye bwa mbere mu 1976, muri Repubulika iharanira  Demokarasi ya Congo nkuko Ikigo cy’Abanyamerika gishinzwe Gukumira no Kurwanya Indwara, (USCDC) kibitangaza, ndetse ko 90% byabo kibasiye gisiga kibahitanye.

Cyakomeje gukwirakwira no mu Burengerazuba bw’Afurika hagati ya 2014 na 2016 aho abantu 28 600 bacyanduye gihitana 11 325; icyo gihe kandi cyanageze i Burayi no muri Leta Zunze Ubumwe za Amerika.

Kikaba cyaragiye kibasira DRC mu myaka itandukanye nko mu 2022, 2021,2020,2018,2017, aho cyahitanye abarenga ibihumbi.