Umunyarwanda yegukanye miliyoni 123 Frw mu marushanwa yateguwe n’umuherwe Jack Ma

  • NTAWITONDA JEAN CLAUDE
  • Ugushyingo 24, 2023
  • Hashize amezi 6
Image

Albert Munyabugingo uyobora akaba n’uwashinze ikompanyi Vuba Vuba Africa Ltd yegukanye ibihumbi 100 by’amadolari y’Amerika, ni ukuvuga miliyoni 123 z’amafaranga y’u Rwanda, mu marushanwa  yiswe Intwari Nyafurika mu Bucuruzi (Africa’s Business Heroes/ABH) yateguwe akaba anaterwa inkunga n’umuherwe  Jack Ma.

Ni nyuma y’amarushanwa agamije guteza imbere ba rwiyemezamirimo bo muri Afurika, aho Munyabugingo atabashije kuza muri batatu ba mbere bahize abandi mu 10 baherutse gutoranywa.

Abegukanye imyanya ya mbere barimo Thomas Njeru wo muri Kenya waje ku mwanya wa Kabiri m, Ayaman Bazaraa wo mu Misiri waje ku wa gatatu na Ikpeme Neto wo muri Nigeria ari we wabaye uwa mbere.

Munyabugingo yabonetse muri ba rwiyemezamirimo barindwi basigaye mu baherukaga gutoranywa mu bandi 27,267 bo mu bihugu 54  by’Afurika.

Mu kiganiro yagiranye na Imvaho Nshya, Munyabugingo yishimiye iyo nkunga abonye igiye kumufasha kurushaho kwagura ibikorwa bye.

Yagize ati: “Kuba mu 10 ba mbere muri aya marushanwa ya Alibaba Group, abantu bakora ibintu bitari kure y’ibyo dukora twigiraho, bivuze ngo tubakuraho inama nyinshi n’ibindi, ariko ngarutse ku gihembo cy’amafaranga kizadufasha mu bikorwa byo kwaguka.

Turateganya kongeramo ibikorwa byinshi, turashaka kugira ‘Application’  umuntu abonaho icyo akeneye cyose. Nonaha dutangira, twatangiye dukora ibya resitora twongeraho guhaha mu isoko, turashaka kongeraho serivisi zose zishoboka, niba uri ku kazi ukavuga icyo utekereza tukakikuzanira.”

Yavuze ko kuri ubu batumikira abantu barenga 1200 ku munsi ariko bifuza kwagura ibikorwa na serivisi zinyuranye ku buryo umubare uzagenda wiyongera uko bazagurira ibikorwa no mu bindi bice by’Igihugu.

Abakiliya babo b’Imena ni abafite telefoni igezweho kandi afite internet, kugeza ubu Vuba Vuba ikaba ifite abakozi bakabakaba 40 bahoraho, abarenga 50 badahoraho, hanyuma n’abatwara moto  100 mu Mujyi wa Kigali, uwa Musanze n’uwa Rubavu.

Ni amajonjora yakoranywe ubushishozi n’ubwitonzi nyuma yo kugaragaza ko ari bo bahiga abandi mu guhanga udushya no gusubiza ibibazo bitandukanye Afurika ihanganye na byo binyuze mu bucuruzi.

Uwaje ku mwanya wa mbere yahawe inkunga y’ibihumbi 300 by’amadolari ni ukuvuga miliyoni zisaga 311 z’amafaranga y’u Rwanda, uwa kabiri agahembwa ibihumbi 250 by’amadolari ya Amerika arenga miliyoni 309 z’amafaranga y’u Rwanda, uwa gatatu ahemwa ibihumbi 150 by’amadolari ya Amerika asaga miliyoni 185 z’amafaranga y’u Rwanda.

Mu bandi baje muri barindwi ba mbere, harimo Bola Bardetwo ukomoka muri Benin, Andrew Takyi wo muri Ghana, Christina Gyisun wo muri Ghana, Ismael Belkhayat wo muri Morocco, Nthabiseng Mosia na Theo Baloyi bo muri Afurika y’Epfo. 

Aya marushanwa yiswe Africa’s Business Heroes (ABH) ku wa Gatandatu  tariki ya  2 Nzeri 2023, ni bwo i Kigali hateraniye inama yahuje abashomari batandukanye bari muri ayo marushwanwa yo kumurika imishinga, ategurwa buri mwaka n’Umuryango Jack Ma Foundation na Alibaba Philanthropy by’umuherwe w’Umushinwa Jack Ma.

Kuva mu mwaka wa 2019 iri rushanwa ryatangiye guhemba abahiga abandi baje mu myanya 10, bagahembwa amafaranga abafasha gukomeza guteza imbere imishinga yabo. Buri mwaka kugeza uyu munsi hajyaga habonekamo Umunyarwanda uhagararira abandi.

Muri uyu mwaka byari umwihariko kuko aya marushanwa yabaye mu gihe hizihizwa isabukura y’imyaka itanu ishize atangijwe. Muri uyu mwaka yahurije i Kigali abasaga 1000, barimo ba rwiyemezamirimo, abashoramari, n’abandi banyuranye bakora mu ruhererekane rw’ubucuruzi.

Ni ibirori kandi byanitabiriwe n’abavuga rikijyana batandukanye ku mugabane w’Afurika, abanyamuziki bamamaye ndetse n’abandi.

Muri ibi birori byamaze iminsi ibiri kandi hanakozwe ibiganiro bigamije gukangurira abandi ibyiza byo kuba rwiyemezamirimo, ingorane zibamo ndetse n’uko zishobora kurengwa.

Dr. Ikpeme Neto yaje muri batatu bahize abandi
Ayman Bazaraa na we yaje muri batatu ba mbere
Thomas Njeru, na we yaje muri batatu ba mbere
  • NTAWITONDA JEAN CLAUDE
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE