Umunsi wa mbere w’uruzinduko rwa Perezida Embaló mu Rwanda mu mafoto

  • Imvaho Nshya
  • Werurwe 8, 2022
  • Hashize imyaka 2

Perezida wa Guinea-Bissau Umaro Sissoco Embaló ari mu ruzinduko rw’akazi rw’iminsi 3 mu Rwanda rwatangiye ku wa Mbere taliki ya 7 rukaba ruzasoza kuri uyu wa Gatatu taliki ya 9 Werurwe 2022.

Ku munsi wa mbere ageze mu Rwanda, Perezida Embaló yakiriwe mu cyubahiro gihabwa Abakuru b’Ibihugu na za Guverinoma na Perezida wa Repubulika y’u Rwanda Paul Kagame, bagirana ibiganiro byasojwe n’umuhango wo gusinya amasezerano y’uubufatanye mu rwego rw’ubukungu n’ubucuruzi, mu burezi, ubukerarugendo, inama z’ubucuruzi no kubungabunga ibidukikije.

Perezida wa Guinea Bissau Umaro Sissoco Embaló yanasuye Urwibutso rwa Jenoside rwa Kigali yunamira abasaga ibihumbi 250 bazize Jenoside yakorewe Abatutsi baruruhukiyemo ndetse anasobanurirwa amateka y’iyo Jenoside yahitanye abasaga miliyoni mu minsi 100 gusa, kimwe n’ay’izindi Jenoside zagiye zibaho ku Isi.

Mu butumwa yanditse mu gitabo cy’abasura uru rwibutso, Perezida Embaló yavuze ko yunamiye abazize Jenoside mu rwego rwo kubasubiza icyubahiro kibakwiye no gushimira byimazeyo abaharaniye ko u Rwanda rwongera kuba Igihugu cyunze ubumwe kandi cy’uburumbuke.

Yavuze kandi ko ibyabaye mu Rwanda bidakwiye kongera kubaho ukundi, kandi ko nta muntu n’umwe ukwiye kurebera mu gihe ikiremwamuntu kicwa.

Biteganyijwe ko kuri uyu wa Kabiri, Perezida Embaló asura agace kahariwe inganda i Masoro mu Mujyi wa Kigali.

  • Imvaho Nshya
  • Werurwe 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE