Umujyi wa Kigali wasobanuye icyadindije kongera kompanyi zitwara abagenzi

  • NTAWITONDA JEAN CLAUDE
  • Mata 5, 2022
  • Hashize imyaka 2
Image

Mu  Nteko y’Abaturage yakozwe uyu munsi ku wa 5 Mata 2022 ku rwego rw’Umujyi wa Kigali, yitabiriwe na Minisitiri w’Ubutegetsi bw’Igihugu Gatabazi Jean Marie Vianney, hagarutswe ku kibazo  kirebana na serivisi zo gutwara abantu mu buryo  bwa rusange aho usanga abagenzi bamara igihe kinini bategereje imodoka bikadindiza imirimo yabo ya buri munsi.

Ubuyobozi bw’Umujyi wa Kigali bwasobanuye ikirimo gukorwa mu gukemura icyo kibazo bunagaragaza ko icyorezo cya COVID-19 cyakomye mu nkokora ivugururwa ry’amasezerano kugira ngo hongerwe kompanyi zitwara abagenzi. 

Aya masezerano agomba kuvugururwa ni ayasinywe mu 2013 ubwo hemererwaga kompanyi 3 gusa mu gutwara abantu mu buryo bwa rusange.

Muri iyi Nteko yakozwe hifashishijwe ikoranabuhanga n’ibitangazamakuru binyuranye, Umuyobozi w’Umujyi wa Kigali wungirije ushinzwe Imiturire n’Ibikorwa Remezo Dr Mpabwanamaguru Merard yakomeje asobanura n’izindi mbogamizi zabayeho.

Ati: “Umujyi wa Kigali mu myaka itarenze itanu twagize  ubwiyongere bw’abaturage ndetse no mu gutura  umujyi usa nk’uwaguka, twagize ikibazo cy’uko guhera muri 2013 kompanyi zitwara abantu mu buryo bwa rusange ari 3 kubera amasezerano yari ahari, ariko icyorezo cya COVID cyaje ayo masezerano agiye kuvugururwa kugira ngo hongerwemo izindi kompanyi hanongerwemo ubushobozi bugendanye n’ubwiyongere bw’abaturage”.

Yakomeje asobanura  ko muri 2013 amasezerano asinywa abaturage b’Umujyi wa Kigali bageraga kuri miliyoni imwe n’ibihumbi 320, uyu munsi bararenga miliyoni imwe na 600, kandi muri icyo gihe imirenge imwe yagaragaraga nk’icyaro (Bumbogo, Nduba, Mageragere,…) yagiye iturwa.

Umuyobozi w’Umujyi wa Kigali Rubingisa Pudence

Yagaragaje ikirimo gukorwa mu gukemura iki kibazo. Ati: “Icyo kibazo turimo kugifatira   ingamba, turimo gukorana na Minisiteri y’Ibikorwa Remezo na kompanyi ziri mu mwuga wo gutwara abantu kugira ngo habemo kuvugurura ndetse no kongera imodoka”.

Yavuze ko  hakozwe igishushanyombonera n’uburyo imihanda igomba kongerwamo imodoka byarateganyijwe, kandi ko mu nama iteganyijwe mu cyumweru kiri imbere izareba ibindi bikenewe kugira  ngo iyi ntego yo kunoza no kwihutisha serivisi zo gutwara abantu igerweho.

Dr Mpabwanamaguru yagaragaje ko ubu ikirimo kwihutishwa cyane ari  ukongera imodoka ahaturuka abantu benshi  no kugena uburyo abafite imodoka zabo bwite bafashwa gukoresha imihanda mishya kugira ngo izitwara abagenzi zidahura n’umuvundo.

Kuri iyi ngingo irebana no gutwara abantu n’ibintu, abaturage banashimiwe umusanzu batanga mu kwikorera imihanda y’imigenderano aho batuye. Ubuyobozi bw’uyu mujyi bwatangaje  ko iyo bamaze gukora ireshya n’ibilometero 67, bukaba bwanagaragaje ubwunganizi butanga.

Ku bijyanye n’ubwunganizi, Umuyobozi w’Umujyi wa Kigali Rubingisa Pudence yavuze ko iyo habayeho kwisuganya kw’abaturage bagashyira hamwe ingengo y’imari babafasha mu gukora inyigo, gukurikirana ishyirwa mu bikorwa ry’uwo muhigo, bakabunganira ku bikoresho igihe habonetse ibyo gukora imihanda ikozwe mu buryo budasaba ingengo y’imari nini hakabaho n’ubufatanye mu kuyicanira irangiye.

Yakomeje agira ati: “Kuyisana ni ibikorwa bikorwa n’urwego rw’Umujyi kugira ngo tuyibungabunge itangirika”.

Minisitiri w’Ubutegetsi bw’Igihugu Gatabazi Jean Marie Vianney ashingiye ku bibazo binyuranye abaturage bagaragaje yasabye abayobozi guha umwanya abaturage, bakabegera, bakabasanga aho bari bakabakemurira ibibzo kandi bakabasobanurira gahunda za Leta zihari.

 Ati: “ …ukajyayo mukareba ubuzima abo baturage babayemo kugira ngo tujye dukora igenamigambi risubiza ibibazo by’abaturage twagezeho, hari n’igihe tuguma hejuru uri hasi ubegereye akabakoresha uko ashaka  bitajyanye n’umurongo Igihugu kigenderaho”.

Ikindi ni ugusuzuma ibyo abaturage batishimiye bigashakirwa ibisubizo mu buryo buhoraho hagamijwe kunoza serivisi bahabwa.

Yasabye Ubuyobozi bw’Umujyi wa Kigali kurandura ruswa ivugwa mu itangwa ry’ibyangombwa bitandukanye by’umwihariko iby’ubwubatsi n’iby’ubutaka kuko ifite ingaruka mbi ku baturage ndetse n’iterambere ry’umujyi muri rusange.

Minisitiri w’Ubutegetsi bw’Igihugu Gatabazi Jean Marie Vianney
  • NTAWITONDA JEAN CLAUDE
  • Mata 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE