Umujyi wa Kigali washyize umucyo ku bibazo bya Koperative COPCOM

  • KAYITARE JEAN PAUL
  • Ukuboza 8, 2023
  • Hashize amezi 3
Image

Koperative y’Abacuruzi b’ibikoresho by’Ubwubatsi n’Ububaji (COPCOM) ikorera mu Murenge wa Gisozi mu Karere ka Gasabo mu Mujyi wa Kigali yasabwe gukuraho kiyosike yubatse ku buryo bunyuranyije n’amategeko ariko ntiyabikora.  

Kayitare Jerome, Perezida wa COPCOM, yabwiye Imvaho Nshya ko hashize ukwezi Umujyi wa Kigali ufunze izo kiyosike.

Yemeye ko kiyosike bubatse zitemewe ariko ko bazubatse by’igihe gito nk’uko amategeko abiteganya.

Ati “Ziriya kiyosike ubundi uko bigenda, bigengwa n’itegeko. Ni inyubako z’igihe gito zishobora gukurwaho.

Itegeko rivuga ko inyubako ziri mu kibanza cy’umuntu zakurwaho kandi ntibisabe ingurane, ibi byemewe gusa mu nzu z’ubucuruzi”.

Ahamya ko mu kibanza cya koperative ntaho byari biteganyijwe kubakamo kiyosike.

Nyamara ngo COPCOM yasabwe gukura akajagari kari hafi aho bituma hubakwa izo kiyosike kugira ngo zikorerwemo n’abazunguzayi.

Kayitare avuga ko ari ibintu basabwe n’Ubuyobozi bw’Umurenge wa Gisozi ubwo u Rwanda rwiteguraga kwakirana inama ya CHOGM.

Umujyi wa Kigali wabwiye Imvaho Nshya ko wasabye inshuro nyinshi koperative gukuraho ibyo yasabwe ariko ngo ntiyabyubahiriza.

Dr Mpabwanamaguru Merard, Umuyobozi w’Umujyi wa Kigali wungirije ushinzwe imiturire n’ibikorwa remezo, yagize icyo avuga ku kuvanaho kiyosike zubatswe na COPCOM.  

Yagize ati “Nawe tekereza gufata inyubako, ugafata muri koridoro, ugafata no ku mabaraza ukagenda ushyiramo amakiyosike, ayo makiyosike ntabwo uba warayateganyirije mu buryo bw’amazi n’amashanyarazi.

Intsinga zirimo ntabwo ziba zihuye n’ibigomba kubamo, kugeza uyu munsi ukagenda ugafata inzira yagenewe gucibwamo n’abantu bakoresha inyubako, ugashyiramo ibintu nta burenganzira. Ni yo mpamvu umuntu asabwa gukuraho ibyo bintu”.

Raporo y’Umujyi wa Kigali Imvaho Nshya ifitiye kopi, igaragaza ko kiyosike zose za ADARWA, Umukindo, COPCOM, APARWA na White fort Plaza zubatswe binyuranyije n’amategeko zikurwaho.

Ubuyobozi bwa koperative basabwe kwisenyera ariko ngo ntibwafata ibintu by’abanyamuryango basaga 300 ngo bubisenye kandi bijya kubakwa byarabanje kwemeza n’inteko rusange.

Kayitare, Perezida wa koperative, avuga ko batigeze basabwa gukuraho kiyosike.

Ku rundi ruhande, inyandikomvugo y’inama yahuje abakorera mu gakiriro ka Gisozi n’inzego zitandukanye z’ubuyobozi yabaye tariki 30 Gicurasi 2023 ikabera mu cyumba cy’inama cya Koperative ADARWA, yafashe umwanzuro wo kuvanaho izo kiyosike.

Ku ikubitiro hafashwe umwanzuro wo gukuraho inyubako (annexes) zubatswe ari nta ruhushya, zikubakwa impande z’inzu nini zubatswe zifite uruhushya.

Abakoreragamo bakuwe muri izo nyubako, Umujyi wa Kigali uhita uzihafunga.

Sibomana Charles agira ati “Ikibazo dufite ni uko hano twakorera bahafunze tukaba tudafite aho gukorera.

Koperative yari yagerageje kudushakira aho gukorera ariko ubu tukaba tudafite aho gukorera, inzu barazifunze kandi ni zo twakoreragamo”.

Murekatete Emelance, ukorera muri COPCOM, na we agira ati “Twagerageje kuva mu gukorera mu kajagari, ubuyobozi bwiza bwacu bwagerageje kudufasha, budukura mu kajagari ahantu hatemewe”.

Avuga ko batarimo gukora kubera ko babafungiye bityo bagasaba gufashwa bagakingurirwa bagakora kuko ubuzima bwabo bwahagaze.

Ndahimana Jean Claude na we w’umucuruzi avuga ko icyo bifuza ari ugufungurirwa bagakora.

Kayitare Jerome, Perezida w’Inama y’ubuyobozi ya COPCOM, yemeza ko hari abantu bafungiwe ibikorwa byabo.

Umujyi wa Kigali wandikiye COPCOM uyimenyesha ko bitarenze tariki 12 Ukuboza 2023, igomba kuba yaravanyeho kiyosike basabwe gukuraho.

  • KAYITARE JEAN PAUL
  • Ukuboza 8, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE