Umujyi wa Kigali wasabye abagore kudahishira abasambanya abana

  • NTAWITONDA JEAN CLAUDE
  • Werurwe 10, 2022
  • Hashize imyaka 2
Image

Ubuyobozi bw’Umujyi wa Kigali bwakomoje ku cyaha cyo gusambanya abana, busaba abatuye uyu mujyi kutarebera no kudahishira abakora iki cyaha.

Ibi byagarutsweho na Dr Merard Mpabwanamaguru, Umuyobozi w’Umujyi wa Kigali wungirije ushinzwe imiturire n’Ibikorwaremezo, ubwo hizihizwaga umunsi mpuzamahanga w’umugore mu karere ka Kicukiro.

Yakomeje agaragaza icyaha gikomeye gikomeje kwiyongera mu muryango nyarwanda ndetse abantu bakakirebera rimwe na rimwe bikagira ingaruka ku muryango nyarwanda, ari icyaha cyo gusambanya abana.

Avuga ko imibare y’icyaha cyo gusambanya abana kigenda yiyongera.

Ati: “Ni yo mpamvu Umujyi wa Kigali dusaba abagore kudahishira aho iki cyaha cyabereye, gutangira amakuru ku gihe no kwegera cyane ukorerwaho iki cyaha kuko umwana wasambanyijwe bigira ingaruka mu mibereho ye y’ejo hazaza”.

Akomeza avuga ati: “Bamwe mu basambanywa babikuramo ubumuga ndetse hari n’ababikuramo inda ugasanga abana bavutse muri ubwo buryo na bo ni umusaraba ku gihugu, ibyo bikaba bidindiza iterambere ry’igihugu”.

Nibigira Ancille, Umuhuzabikorwa wa AEE mu Mujyi wa Kigali mu mushinga USAID Ubaka Ejo (OVC), agaragaza ko bafite gahunda zirimo izo kubaka umwana w’umuhungu bityo akazavamo umugabo udahohotera abana.

Nibigira Ancille yagaragaje ko AEE irimo gutoza abana b’abahungu kuzavamo abagabo badahohotera igitsina gore

Ati: “AEE nk’abafatanyabikorwa b’akarere ka Kicukiro, twahisemo kubaka umuryango w’ejo hazaza.

Twasanze abahohoterwa ari abagore, duhitamo gutoza abana b’abahungu kuzaba abagabo beza, badahohotera abana b’abakobwa”.

Imibare Urwego rw’Ubugenzacyaha (RIB) ruherutse gushyira hanze igaragaza ko ibirego byo gusambanya abana kuva mu 2018 kugeza mu 2021 byazamutseho 55% bigera kuri 12,840.

Nubwo ibi birego ari byo byagaragajwe, ubushakashatsi bw’imyaka itatu bwakozwe na RIB bwagaragaje ko abana basambanyijwe ari 13,646 biganjemo abakobwa, kuko abahungu barimo ari 392 bangana na 2.9%.

Aba b’abahungu bagera kuri 237 basambanyijwe na bagenzi babo.

Ubu bushakashatsi kandi bugaragaza ko abana benshi basambanywa ari abafite hagati y’imyaka 14 na 17, kuko mu myaka itatu abasambanyijwe ari 5,947 bagakurikirwa n’abari munsi y’imyaka icyenda bangana na 4,378.

Byagaragajwe ko abantu benshi basambanya aba bana ari urubyiruko ruri hagati y’imyaka 18 na 24, kandi benshi muri aba ari abagabo bakiri ingaragu babashukisha ibintu bitandukanye birimo impano, akazi cyangwa kubabwira ko bazashyingiranwa.

Mu kwiregura kw’aba bantu, abagera kuri 54.7% bavuze ko bisanze babasambanyije aho abandi bagiye bavuga ko babitewe n’ubusinzi, ubucucike mu nzu, imyumvire mibi n’ibindi.

60.8% by’abana basambanyijwe n’abaturanyi babo, 19.2% bagasambanywa n’inshuti zabo (boyfriend / girlfriend) mu gihe hari abandi basambanyijwe n’abagize umuryango, inshuti, abarimu, abanyeshuri bigana, abakozi cyangwa abandi bagenda mu ngo ndetse n’abaramu babo.

Ubu bushakashatsi bwakorewe ku bana bari hagati y’imyaka 10 na 17 b’ibitsina byombi bo mu turere twa Bugesera, Gatsibo, Nyaruguru n’utugize Umujyi wa Kigali.

Bwagaragaje ko ababyeyi b’abagore aribo babasha kuganira n’abana babo ku buzima bw’imyororokere kuko byagaragaye ko abakobwa 91.23% b’abangavu ari bo baganiriye na ba nyina mu gihe abahungu ari 88.53%.

Ababyeyi b’abagabo bari hasi mu kuganiriza abana kuko abakobwa baganiriye na ba se bangana na 35.77% hanyuma abahungu bangana na 10.9%.  

  • NTAWITONDA JEAN CLAUDE
  • Werurwe 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE